Ձեր վստահելի աղբյուրը

Ադրբեջանի նախագահ Իլհամ Ալիևը հայտարարել է, որ «միջազգային հանրությունը, որը դեռևս հանդուրժում է Ղարաբաղի շուրջ ստեղծված իրավիճակը, պետք է լուրջ եզրակցություններ անի, քանի որ Ադրբեջանի կարողություններն ու բանակի հզորությունը աճում է: Օգտագործելով բոլոր հնարավորությունները, մենք մեր տարածքային ամբողջականությունը կվերականգնենք: Մենք հաղթանակի օրը տեսնելու ենք»: Այս հայտարարությունը զետեղված է Ադրբեջանի նախագահի պաշտոնական կայքում (http://ru.president.az/articles/6999):

Իսկապես որ, միջազգային հանրությունը պետք է լուրջ հետևություններ անի. պաշտոնական Բաքուն ոչ միայն հետևողականորեն մեծացնում է իր ռազմական բյուջեն ու մեծաքանակ սպառազինություն գնում, այլ բացեիբաց հայտարարում, որ պատրաստ է նաև ռազմական ճանապարհով լուծելու Ղարաբաղի հարցը: Այն, որ Ադրբեջանը շարունակում է իր օրակարգում պահել խնդրի ռազմական լուծումն ակնհայտ է ոչ միայն Բաքվից հնչող հայտարարություններից, այլ նրա կողմից իրականացվող ագրեսիվ քաղաքականությունից:

Մյուս կողմից, Ադրբեջանը միջազգային հանրության սպառնում է պատերազմի վերսկսմամբ՝ ակնկալելով, որ ԼՂ հիմնախնդիրը ուժի կիրառմամբ լուծելու դեմ հանդես եկող միջազգային հանրությունը ճնշում կգործադրի հայկական կողմի վրա, իսկ Ադրբեջանը ինչպես այդ երկրի նախագահն է իր խոսքում շեշտում՝ կհաղթի:

Նկատենք, որ նախագահ Ալիևը ոչ թե խոսում է խաղաղ կարգավորումից, այլ ընդգծում է, որ հաղթելու են, այսինքն՝ կարգավորման հիմքում դնում ոչ թե տարածաշրջանում խաղաղության և կայունության ապահովման հարցը կամ խնդրի կարգավորման շուրջ պայմանավորվածության հասնելը, այլ շեշտում իր միակողմանի ակնկալիքները:

Եվ որքան էլ Ադրբեջանը տարբեր հարթակներից հայտարարի, որ բանակցային գործընթացում էական առաջընթաց չի գրանցվում «հայկական կողմի դրսևորած ապակառուցողական քաղաքականության պատճառով», իրականում բոլորի համար էլ պարզորոշ է, որ բանակցային պրոցեսում լուրջ առաջընթացին նախևառաջ խոչընդոտում է հետևյալ գործոնները:

Առաջին, Ադրբեջան հետ է կանգնում նախկինում ձեռք բերված պայմանավորվածություններից, երկրորդ, Ադրբեջանի ղեկավարությունը շարունակում է ռազմատենչ հայտարարությունները, երրորդ, պաշտոնական Բաքուն հետևողականորեն մերժում է շփման գծում լարվածության թուլացման ուղղված միջոցառումների իրականացումը՝ դիպուկահարներին առաջնային գծից դուրս բերում, շփման գծում տեղի ունեցող միջադեպերի առնչությամբ հետաքննության մեխանիզմների ներդրում, չորրորդ, տարածաշրջանում սպառազինությունների մրցավազք հրահրում: Այս գործոնների ոչ ամբողջական ցանկը հուշում է, որ Ադրբեջանը ոչ միայն չի ձգտում խնդրի խաղաղ կարգավորմանը, այլ իր քայլերով նպաստում է տարածաշրջանում անկայունության խորացմանն ու իրավիճակի սրմանը:

Հեղինակ` Քաղաքական հարցերով փորձագետ Տիգրան Աբրահամյան