Ձեր վստահելի աղբյուրը

«Զատիկ» մանկատանը (երկու օրից այն այլևս մանկատուն չի համարվի) եռուզեռ էր: Ի տարբերություն հաստատության սառը ու լուռ միջանցքների, սենյակներում երեխաները խառը գործերով էին զբաղված ու ըստ այդմ աղմկում` զարդարում էին տոնածառը, դաստիարակների հետ ակտիվ քննարկում նախատոնական պատրաստությունները, խաղում և միայն ամենափոքրիկների խումբն էր, որ Ձմեռ պապի այցելության ժամին քնած էր: «Հայփոստ» ՓԲԸ-ն տոներին ընդառաջ տոնական ակցիա էր կազմակերպել, որի շրջանակում Ձմեռ պապն ու ընկերության աշխատակիցները, նվերներով, այցելեցին Երևանի 3 պետական մանկատներ:

Սակայն այս պատերի ներքո միայն տոնական տրամադրությունը չէ, որ տիրում էր` երեխաներից շատերը հեռանում էին ընդմիշտ: Մեր այցելության պահին հենց այդպիսի հուզիչ տեսարանի ականատես եղանք` 10 տարի հաստատությունում ապրած քույր ու եղբայր, «Զատիկը» ցերեկային խնամքի կենտրոն վերափոխվելու կապակցությամբ տեղափոխվում էին այլ մանկատուն: Ու ոչ միայն երեխաներն էին լացում, այլև դաստիարակները…

Ձմեռ պապը կատարեց իր առաքելությունը` նախ բաժանեց երեխաների համար պատրաստած նվերները ու բացի այդ էլ տրամադրեց նրանց թուղթ ու գունավոր մատիտներ, որպեսզի երեխաները նամակ գրեն, թե ի՞նչ են ցանկանում տարվա ամենակախարդական գիշերը հենց նրանից նվեր ստանալ: Այս դեպքում Ձմեռ պապի դերակատարում կստանձնի «Հայփոստը» և գուցե երեխաներից շատերի երազանքը իրականություն դառնա:

Վերջում, երբ նամակները հանձնվեցին հասցեատիրոջը, վերջինս անկեղծ զարմանում էր, թե ինչ բարդ ցանկություններ ունեն այսօրվա երեխաները` էլ համակարգիչ ու «նոութբուք», էլ վերջին մոդելի Playstation ու անգամ միկրոֆոն, էլ բջջային ու լուսանկարչական ապարատ: Սակայն կային և այլ կարգի ցանկություններ, դրանք հատկապես գրառում էին «Զատիկում» ժամանակավոր խնամքի տակ գտնվող երեխաները, ում ծնողները ինչ-ինչ պատճառներով չէին կարող այս պահին խնամել իրենց երեխաներին:

Այդպես, 10-ամյա Էսմերալդան իր նամակում Ձմեռ պապից բացի համակարգչից, նաև խնդրել էր, որպեսզի «հայրիկս շուտ վերադառնա»: Պարզվեց, որ հայրը մեկնել էր Ռուսաստան ` խոպան, ու երեխային թողել հաստատությունում: Խոստացել էր, որ կվերադառնա Ամանորին, կվերցնի գեղեցկուհի դստերը ու նրանք միասին կդիմավորեն տոները…Էսմերալդան էլ սպասում էր` հույսը դնելով Ձմեռ պապու բարի կամքի վրա:

3-ամյա Արթուրը քնից արթնացավ տարօրինակ աղմուկից ու սենյակում հրմշտոցից (դե ամեն օր չէ, որ նման հյուր է լինում հաստատությունում), աչուկները բացեց ու զարմացավ` Ձմեռ պապը կռացել էր անկողնու վրա, շոյում իր գլուխն ու փորձում գտնել քնաթաթախ մանչուկի ձեռքերը, որպեսզի նվերը հանձնի նրան: Դեռևս լավ չհասկանալով, թե ինչ է կատարվում, բայց ուրախանալով կոնֆետներով լի տոպրակի գունեղությանը, Արթուրը ամաչելով գլուխը պահեց վերմակի տակ ու տակից սկսեց ծիկ ու վիկ անել: Դաստիարակչուհին ասաց, որ վերջինս այստեղ է ժամանակավոր, մինչև որոշվի նրա ճակատագիրը, բայց սկզբում իրենք հույս չունեին, որ երեխան ոչ միայն երբևէ կժպտա, ինչպես հիմա է ժպտում Ձմեռ պապիկի կատակներին, այլև ընդհանրապես կենդանի կմնա` չորս ամիս առաջ նրան բերել էին «Զատիկ» անմխիթար վիճակում, քանի որ մոր հետ փողոցում էր օրերն անցկացնում, թափառաշրջիկ էին….

Հաջորդ կանգառը «Մարի Իզմիրլյան» մանկատանն էր, որը ևս հունվարի 1-ից փոխում է իր պրոֆիլը և վերակազմավորվում, այստեղ նախատեսվում է իրականացնել կենտրոնական նյարդային համակարգի օրգանական ու ֆունկցիոնալ ախտահարումով, բնածին և ձեռքբերովի ֆիզիկական և մտավոր խնդիրներ ունեցող 0-18 տարեկան երեխաների խնամքը և դաստիարակությունը, նրանց իրավունքների և օրինական շահերի պաշտպանությունը։ Առաջինը Ձմեռ պապն այցելեց հատուկ կարիքներով երեխաների խումբ, այցելեց, նվերներ բաժանեց ու շատ հուզված դուրս եկավ սենյակից… Panorama.am-ի հետ զրույցում խմբի դաստիարակը նշեց, որ այստեղ ապրում են աուտիկ, մանկական ուղեղային կաթվածով, հեդրոցեֆալիայով, դաուն սինդրոմով, ինչպես նաև մտավոր ու հենաշարժողական խնդիրներով երեխաներ, որոնք հաճախում են օժանդակ դպրոց կամ սովորում ներառական համակարգում: Իսկ նրանցից մի քանիսի համար ուսուցիչները գալիս են հենց մանկատուն:

Այս երեխաները Ձմեռ պապից ոչինչ չխնդրեցին ու գրեթե ոտանավորներով նրան չուրախացրեցին, միայն մեկը արտասանեց: Բայց փոխարենը նրանք շատ ուրախացան նվերներին ու թեկուզ միայն այն ուշադրությանը, որ Ձմեռ պապն ու օտար մարդիկ իրենց նկատմամբ ցուցաբերեցին` թույլատրելով երեխաներին փարվել այս օտարների ոտքերին, բռնել նրանց ձեռքը ու բարձրանալ նրանց գիրկը:

Ձմեռ պապին հաճելիորեն զարմացրեցին այս հաստատության տարիքով մեծ խմբի երեխաները, որոնք բացի այլ նվերներից նաև «երջանկություն ու խաղաղություն» ուզեցին:

Երրորդ մանկատունը, որով ավարտվեց Ձմեռ պապի նախատոնական այցելությունների շարքը, Նորքի «Մանկան տունն» էր: Այս հաստատությունը աչքի ընկավ նրանով, որ երեքից միայն այստեղ ստացական կազմեցին, թե «Հայփոստն» ինչ նվերներ է բերել երեխաների համար և այդ ստացականը տրամադրեցին նաև ընկերությանը: Ի դեպ, ընկերությունից բացի երեխաների մոտ առատ ու բազմազան նվերներով այցի էին եկել նաև հայտնի ատամնաբուժական մի ցանցի աշխատակիցներ ևս:

Հ.Գ. Հայաստանյան մանկատներում խնամվում է 757 երեխա , նրանցից 514-ը հաշմանդամ են` 80-ը   0-3 տարեկան տարիքային խմբում են:

Նախորդիվ` 

Ա.Ասատրյան. Ամենակարևոր գործիքը որդեգրումն է…

Ունենք այն, ինչ ունենք` 6 պետական մանկատուն, 757 երեխա, նրանցից 514-ը հաշմանդամ (լուսանկարներ)

Կառավարությունը որոշեց` մանկատունը կվերափոխվի. Ի՞նչ է լինելու առողջ երեխաների հետ