Ձեր վստահելի աղբյուրը

Հունվարի 3-ի լույս 4-ի գիշերը, Երևանի Շտապօգնության ծառայությունը սպասարկել է 640 կանչ, ինչը նախորդ տարվա նույն ժամանակահատվածի համեմատ 41-ով պակաս է: Ինչպես Panorama.am-ի թղթակցի հետ զրույցում ասաց «Շտապ բուժօգնություն» ՓԲԸ տնօրեն Թագուհի Ստեփանյանը, կանչերը հիմնականում կապված են սրտային հիվանդությունների, ճնշման տատանումների, բարձր ջերմության հետ:

Թ.Ստեփանյանի խոսքերով` նախորդ տարվա հետ համեմատած այս տարի կանչերի թիվը նվազել են: Այսպիսով, ըստ նրա, հունվարի 1-ի լույս 2-ի գիշերը Երևանում գրանցվել է 705 կանչ` նախորդ տարվա 725 կանչի դիմաց, հունվարի 2-ի լույս 3-ի գիշերը գրանցվել է 655 կանչ, ինչը նախորդ տարվա նույն ժամանակահատվածի համեմատ 67-ով պակաս է:

Ինչ վերաբերում է ստամոքսի խանգարման կանչերին, ապա Թ.Ստեփանյանը նշեց, որ միայն հունվարի 3-ին է գրանցվել 14 դեպք. հիմնականում դրանք կապված են եղել ուտելիքի չարաշահման հետ: Ալկոհոլային թունավորումների դեպքեր նույնպես չեն գրանցվել, պարզապես եղել են ալկոհոլային խմիչքի չարաշահման դեպքեր: Մասնավորապես, հունվարի 2-ին և 3-ին գրանցվել է 17 –ական կանչ: