Ձեր վստահելի աղբյուրը

«Մատաղիսի գործ»-ով Շիրակի մարզի ընդհանուր իրավասության դատարանի` դեկտեմբերի 18-ին կայացված արդարացման վճիռը Հայաստանի Զինվորական դատախազությունը դեռևս չի բողոքարկել: «Մենք այս պահի դրությամբ որևէ բողոք չենք ստացել: Եթե բողոքարկեն մենք դատարանից պետք է օրինակը ստանանք, բայց այս պահի դրությամբ որևէ բան չենք ստացել», -Panorama.am-ի թղթակցի հետ զրույցում ասաց «Մատաղիսի գործ»-ով անցնող երեք երիտասարդներ Արա Զալյանի, Մուսա Սերոբյանի և Ռազմիկ Սարգսյանի փաստաբան Հայկ Ալումյանը:

Դատարանի կայացրած վճռից հետո մեղադրող կողմը բողոքարկման համար ունի մեկ ամիս ժամանակ, որը կլրանա հունվարի 18-ին:
Ավելի վաղ Panorama.am-ի թղթակցի հետ զրույցում զինդատախազ Գևորգ Կոստանյանը ասել էր, որ զինդատախազությունը ամենայն հավանականությամբ կբողոքարկի վճիռը դրան ծանոթանալուց հետ: Վերջնաժամկետը մոտենում է, սակայն այս պահին բողոքարկման մասին որոշման վերաբերյալ ոչինչ հայտնի չէ: Զինդատախազությունից խոստացել են պատասխանել մեր հարցին ավելի ուշ:

«Եթե զինդատախազությունը բողոքարկի մենք խնդիր կտեսնենք, քանի որ դատական համակարգն այնքան էլ կանխատեսելի չէ և բավականին ենթակա է տարբեր ճնշումների: Բայց համենայնդեպս ավելի օպտիմիստորեն ենք տրամադրված, քան նախկինում, որ կարողանանք դիմակայել դատախազությանը», -մեզ հետ զրույցում ասաց պարոն Ալումյանը:

Հարակից հրապարակումներ. Մատաղիսի գործով արդարացման դատավճիռ կայացվեց (Տեսանյութ)

Մատաղիսի գործ. ապտակ Ջհանգիրյանին

«Մատաղիսի գործ»-ով փաստաբանները պարգևատրվել են