Ձեր վստահելի աղբյուրը

Ընտանիքի պլանավորման և սեռական առողջության կենտրոնում երեկ առավոտյան Panorama.am-ի լրագրողն ականատես էր եղել, թե ինչպես ընդունարանի աշխատողը ծննդկանին տեսակցելու այցելած երկու քաղաքացուց 2000-ական դրամ է վերցրել: Անվճար տեսակցության մասին լսած ու այդ պահին զարմացած մորն ու որդուն աշխատակիցը բացատրել է, որ անվճար տեսակցությունները սկսվում են ժամը 15-ից ու շարունակվում մինչև ժամը 21-ը:

Հիշեցնենք, որ առողջապահության նախարարի հրամանով, 2012-ի դեկտեմբերի 1-ից ծննդկաններին տեսակցությունն իրականացվում է անվճար կերպով: Նույն իրավական ակտով, տեսակցությունները թույլատրվում է ժամը 15:00-ից մինչև ժամը 21:00-ն ընկած ժամանակահատվածում:

Առողջապահության նախարարության Մոր և մանկան առողջության պահպանման վարչության պետ Կարինե Սարիբեկյանը Panorama.am-ին պարզաբանեց, որ մինչև ժամը 15-ը տեսակցություն չի թույլատրվում:

«Բայց մենք որոշման մեջ մի կետ ենք ավելացրել, որ յուրաքանչյուր հաստատության ղեկավարություն սահմանում է ներքին ընթացակարգեր, և ըստ այդմ, հնարավոր է, որ որևէ հիմնարկություն տեսակցությունը սկսի ժամը 14-ին, ավարտի ժամը 20-ին: Մենք դա չենք համարում մեծ մեղք, պետք է նրանք տեղավորվեն 6 ժամվա մեջ: Եղան հիմնարկներ, որոնք ասեցին, իրենք ժամը 9-ին աբխոդ ենք անում, դրա համար թույլատրվում է տեսակցությունները սկսել նաև ժամը 14-ից»,-բացատրեց Կարինե Սարիբեկյանն ու ևս մեկ անգամ ընդգծեց, որ այս դեպքերում էլ ծննդկաներին տեսակցելն անվճար է:

Վարչության պետը ծննդկանին տեսակցելու համար իրենցից գումար պահանջած քաղաքացիներին խորհուրդ է տալիս անմիջապես զանգահարել թեժ գիծ` 52-88-72 և տեղեկացնել խնդրի մասին: Մինչ այսօր էլ եղել են նույն խնդրի վերաբերյալ դժգոհություն հայտնած քաղաքացիներ: Նրանց հայտնել են իրենց իրավունքների մասին, ուղղորդել տնօրինության մոտ, ասում է, խնդիրը լուծվել է:

«Խնդիրներ առաջանալու դեպքում կարող եք դիմել տնօրինությանը, իսկ դրանց չլուծման պարագայում դիմել ՀՀ առողջապահության նախարարություն` 52-88-72 կամ 52-15-59 հեռախոսահամարներով»,-սա մեջբերում է հիշյալ հրամանից:

Հիշյալ ծննդատան տնօրեն Գագիկ Արտաշեսի Բեգլարյանը Panorama.am-ին վստահեցրեց, որ պատահածը թյուրիմացություն է, և ինքը պատրաստ է քաղաքացիներին վերադարձնել գումարը:

Բեգլարյանը բացատրեց, որ հիվանդանոցում լույս չլինելու պատճառով որոշ ծննդկաներ տեղափոխվել են պաթոլոգիայի բաժանմունք, «դրա համար կարող է շփոթել ե՞ն: Մեկ-մեկ նման բաներ լինում են, որովհետև նոր հրաման է, շատ ժամանակ աշխատողները պաթոլոգիայի հետ են խառնում»:

Նկատենք, որ պաթոլոգիայի բաժնի հիվանդներին անվճար տեսակցությունը, ինչպես ասացին նախարարությունից, տևում է երկու ժամ, բացի այդ քաղաքացիները շատ հստակ ասել են, որ ծննդկանի են այցելում ու նաև զարմանք են հայտնել, որ վճարովի է: Այնպես, որ կոնկրետ այս պարագայում աշխատողի կողմից շփոթմունքն այնքան էլ ռեալ չէ, մարդը վերցրել է 4 հազար դրամն ու նրանց թույլատրել վերև բարձրանալ:

«Ծննդաբերածներին այցելողներից գումար չենք վերցնում, եթե նման բան է եղել, թող գան ինձ մոտ ես գումարը կվերադարձնեմ: Ասեք, թող չանհանգստանա, թող գա ինձ մոտ, էդ 2000-ն ի՞նչ է որ, ես դա կտամ: Էդ 2 հազարի համար ես կյանքում ըտենց բան չեմ անի»,-խոստովանեց Գ. Բեգլարյանը, նշելով, որ ինքը շատ խիստ է, նման բաներ թույլ չի տալիս: Ծննդատան տնօրենը բացառեց, որ իր աշխատողները կարող են իրենից թաքուն «գործ» անել, «որովհետև ես կիմանամ, հազար աչք ունեմ ու ականջ»:

Գումարը հետ վերադարձնելու պատրաստ տնօրենին հուշեցինք, որ մեծ ցանկության դեպքում շատ հեշտ է ճշտել ովքեր են եղել վճարողները, նրանց անուններն ու գումարը նշվել է մատյանում, դեպքը եղել է ժամը 11-ի մոտակայքում, 2 քաղաքացիները` մայր ու որդի այցելել են նույն ծննդկանին:

ԱՆ վարչության պետ Կարինե Սարիբեկյանի խոսքով, իրենք դեռ չեն հասցրել մոնիտորինգ անցկացնել ծննդատներում` հասկանալու, թե ինչպես են աշխատակիցները կատարում ոլորտի պատասխանտուի որոշումը:

«Հետագայում գուցե և կունենանք այցելություններ, բայց հիմա հարցումներ արվում են հեռախոսներով»,-ասաց Սարիբեկյանը:

Հետաքրքիր է, օրական քանի՞ ծննդատան է նման թյուրիմացություն լինում, ո՞ւր են գնում այդ գումարները: Ի վերջո, եթե նախարարը հրաման է ընդունում ու որևէ վերահսկողություն չի իրականացվում, թե հրամանի պահանջներն ինչպես են կատարվում բժշկական հաստատությունների տնօրինության կողմից, էլ ո՞ւմ են պետք նման հրամանները:

Անտեղյակ քաղաքացիներին մեկ անգամ ևս տեղեկացնում ենք, որ ծննդկանին տեսակցելն անվճար է: Զանգահարեք խմբագրություն, նախարարություն, դիմեք բուժհիմնարկի տնօրինությանը, եթե ընդունարանի կամ ծննդատան մեկ այլ աշխատակից ձեզ փորձում է համոզել, որ անվճար ժամերը հետո են լինելու:

Ի դեպ, շատերն այն համոզմանն են, որ ծննդկանին այցելելը պետք է ընդհանրապես արգելվի: Սա արդեն մեկ ուրիշ թեմա է: