Ձեր վստահելի աղբյուրը

 Գալիք նախագահական ընտրություններում թեկնածության հայտ ներկայացրած Անդրիաս Ղուկասյանն այսօր կոչ է արել նախագահի թեկնածության հայտ ներկայացրած Արամ Հարությունյանին, Արման Մելիքյանին, Հրանտ Բագրատյանին, Պարույր Հայրիկյանին, Վարդան Սեդրակյանին, Րաֆֆի Հովհաննիսյանին «միասնաբար դուրս գալ ՀՀԿ-ի կողմից նախագծված ու կանխորոշված ընտրությունների պայքարից»:

Այս առնչությամբ Panorama.am-ը փորձեց զրուցել կոչի հասցեատեր քաղաքական գործիչների հետ:

«Ժառանգություն» կուսակցության մամլո քարտուղար Հովսեփ Խուրշուդյանն այս ամենի կապակցությամբ Panorama.am-ին մասնավորապես ասաց, թե Ա. Ղուկասյանն իր կոչի համար սխալ հասցեատեր է ընտրել. «Ես կարծում եմ, որ պարոն Անդրիաս Ղուկասյանը սխալ հասցեով է դիմել և եթե նա կարծում է, որ ընտրությունները օրինական անցկացնելու խոչընդոտը գործող իշխանությունն ու գործող նախագահն են, նա թեկնածությունը հանելու առաջարկով առաջին հերթին պետք է դիմի գործող նախագահին, այլ ոչ թե ընդդիմադիր թեկնածուներին: Հասարակության պահանջը իշխանափոխությունն է, իսկ դրա համար անհրաժեշտ է այլընտրանք: Իսկ այսօր ալընտրանքը գոնե մեր համար Րաֆֆի Հովհաննիսյանն է»:

«Կարծում եմ պարող Ղուկասյանը որոշակի անձնական նպատակ է հետապնդում: Առկա է նաև անձնական PR-ի խնդիր: Դա իր իրավունքն է: Ցանկացած մարդ կարող է առաջ քաշել ցանկացած գաղափար»,- հավելեց Հ. Խուրշուդյանը:

Իր հերթին «Ազգային համաձայնություն» կուսակցության նախագահ Արամ Հարությունյանը համաձայն է ՀՀ նախագահի թեկնածու Անդրիաս Ղուկասյանի առաջարկին, սակայն կարծում է, որ դա պետք է արվի ընտրություններից տաս օր առաջ:

«Իմ կարծիքով ճիշտ կլինի ինքնաբացարկ հայտնել ընտրություններից 10 օր առաջ: Քարոզարշավը հնարավորության է ընձեռում բացատրել հանրությանը, թե ինչու է այդպես արվում: Ավելի լավ է 17 օր բացատրել, քան թե մեկ օր բացատրել: Եթե մենք դուրս ենք գալիս ընտրապայքարից մինչև նշված ժամկետը, մենք զրկվում ենք նաև մեր խոսքը հասցնելու հնարավորությունից»,- նշեց Արամ Հարությունյանը:

ԼՂՀ նախկին արտգործնախարար Արման Մելիքյանն էլ, ով արդեն երկրորդ անգամ է հայտ ներկայացնում նախագահական ընտրություններում, նշեց. «Ես նախագահական ընտրությունների վերաբերյալ մեկնաբանություններ կտամ միայն պաշտոնապես գրանցվելուց հետո: Դեռևս որևէ թեկնածու չկա: Անգամ ինքը թեկնածու չէ: Թեկնածուներին կարելի է դիմել միայն որպես թեկնածու գրանցվելուց հետո:

Իր հերթին, արձագանքելով Ա. Ղուկասյանի հայտարարությանը, հետևյալ տեսակետն է հայտնել էպոսագետ Վարդան Սեդրակյանը. «Իմաստ չեմ տեսնում դրա մեջ: Ընտրական օրենսգրքով ընտրությունները կկայանան անգամ մեկ թեկնածուի դեպքում: Սերժ Սարգսյանը նույն կերպ միայնակ ընտրություններ կանցկացնի, քվեաթերթիկի վրա կլինի իր անունը և «դեմ»: Կհավաքի անհրաժեշտ քվեները, և դրանից հետո ի՞նչ: Եթե որոշենք չմասնակցել՝ հետո՞: Ի՞նչ շարժում կամ քաղաքացիական նախաձեռնություն, եթե միայնակ մնացած թեկնածուն կհաղթի ընտրություններում: Եթե օրենքով լիներ, որ մի թեկնածու չի կարող լինել, այդ դեպքում իմաստ կունենար: Ինչ վերաբերում է ինձ, ապա ես գալիս եմ կոնկրետ նպատակի համար: Խնդիրը մենակ չմասնակցե՞լ, բոյկոտե՞լն է: Դա ճիշտ չէ»:

ԱԻՄ առաջնորդ Պարույր Հայրիկյանը կարծում է, որ ընտրությունները բոյկոտել նշանակում է աջակցել գործող նախագահ Սերժ Սարգսյանին, որպիսի նա միանգամից, առանց դժվարության դառնա նախագահ:

«Եթե լինեն այնպիսի պատճառներ, որ ընտրությունը լուրջ կասկածի տակ կդնեն, ես էլ կմիանամ բոյկոտին: Սակայն կլինեմ նախավերջին թեկնածուն, երբ կարող է միասնական բոյկոտի հարց ծագել: Բոյկոտի վերաբերյալ խոսակցությունները չեն կարող լինել սպառնացող շեշտադրումներով: Էդ էր մնացել պակաս, որ ինչ-որ նորելուկ ինձ ասի, թե ես ինչ անեմ»,- նշեց Պարույր Հայրիկյանը, ապա հավելեց.

«Այս փուլում վերջնագրով և սպառնալիքով այդպիսի հայտարարություն անել, որ եթե դուք չհանեք ձեր թեկնածությունը, ապա աջակցում եք գործող նախագահին, պարկեշտ և գեղեցիկ չէ: Կարող է և աջակցեմ, դու նախագահից լա՞վն ես: Այդ ի՞նչ անհամեստ դրսևորում է: Ես կոչ եմ անում բարեկրթությունը մշտապես պահպանել»:

Մեզ չհաջողվեց կապվել ՀՀ նախկին վարչապետ, «Ազատություն» կուսակցության ղեկավար Հրանտ Բագրատյանի հետ: