Ձեր վստահելի աղբյուրը

«Մենք այստեղ ենք դիտելու, ոչ թե քննադատելու, ինչ որ բան պարտադրելու նպատակով: Մենք գնահատելու ենք նախագահական ընտրությունների համապատասխանությունը ԵԱՀԿ պարտավորություններին, որ նախընտրական, ընտրական գործընթացները համապատասխանեն միջազգային չափանիշներին, ազգային օրենսդրությանը»,- լրագրողների հետ հանդիպման ժամանակ ասաց ԵԱՀԿ/ԺՀՄԻԳ դիտորդական առաքելության ղեկավար՝ դեսպան Հայդի Թալիավինին:

ԵԱՀԿ-ի Ժողովրդավարական հաստատությունների և մարդու իրավունքների գրասենյակը (ԺՀՄԻԳ) դիտորդական առաքելություն է իրականացնելու փետրվարի 18-ին կայանալիք նախագահական ընտրությունների ժամանակ: Հ. Թալիավինին ասաց, որ իրենք հրավեր են ստացել ՀՀ վարչապետից, ժամանել են հունվարի 8-ի երեկոյան, արդեն հանդիպել են ՀՀ ԿԸՀ նախագահի, ԱԳ նախարարի, փոխնախարարի հետ: ԿԸՀ նախագահի հետ հանդիպումը նա գնահատեց «բովանդակալից»:

Դիտորդական առաքելության ղեկավարն ասաց, որ առաքելությունը բացկացած է 13 միջազգային փորձագետներից, 24 երկարաժամկետ դիտորդներից, որոնք տեղաբաշխվելու են ամբողջ երկրի տարածքով, հրավիրելու են 250 կարճաժամկետ դիտորդների` ընտրությունների օրը, ինչպես նաև արդյունքների հաշվման գործընթացները հետևելու համար, դիտարկելու են նաև ԶԼՄ-ների կողմից ընտրությունների լուսաբանումը: Դիտորդները Հայաստանում կմնան մինչև փետրվարի վերջ` հետևելու նաև հետընտրական գործընթացներին, իսկ եթե լինի երկրորդ փուլ` կշարունակեն իրենց աշխատանքները:

Հայդի Թալիավինին ասաց, որ որպես դիտարկման գործընթացի մի մաս, առաքելությունը հանդիպելու է նախագահի թեկնածուների, համապատասխան իրավասու մարմինների ու քաղաքական կուսակցությունների, դատական համակարգի աշխատակիցների, քաղաքացիական հասարակության և լրատվամիջոցների ներկայացուցիչների հետ:
Առաքելությունը հրապարակելու է երկու միջանկյալ զեկույց և մեկ վերջնական զեկույց` ընտրական գործընթացների ավարտից երկու ամիս անց:

Նշենք, որ լրագրողների կողմից հնչած հարցերից և ոչ մեկը որևէ հստակ պատասխան չստացան առաքելության ղեկավարի կողմից` այն պատճառաբանությամբ, որ իրենք նոր են ժամանել, պետք է հանդիպեն քաղաքական ուժերի, թեկնածուների հետ ու ամեն ինչ կներկայացնեն իրենց միջանկյալ զեկույցներում:

Պատասխանելով այն հարցին, թե արդյո՞ք այն հանգամանքը, որ Հայաստանի երկրորդ հզոր քաղաքական ուժը` ԲՀԿ-ն ու մասնավորապես հիմնական ընդդիմադիր ուժերը հրաժարվել է մասնակցել ընտրություններին, մրցակցային ու արդար ընտրությունների անցկացմանը չեն խանգարի, Հայդի Թալիավինին ասաց, որ վաղաժամ է խոսել այդ մասին. «Մենք պետք է հանդիպենք բոլոր ուժերի հետ, ներառյալ այն ուժերի, ովքեր հրաժարվել են մասնակցել ընտրություններին: Այդ հանդիպումների ընթացքում հնարավորություն կստանանք գնահատել իրավիճակը ու կարծիք կարտահայտենք երկու միջանկյալ զեկույցներում»: