Ձեր վստահելի աղբյուրը

 «Մեզ համար շատ վիրավորական է, որ ստոմատոլոգիան, լինելով բժշկություն, հարկվում է այնպես, ինչպես մետաղադրամով ավտոմատը, սեղանի թենիսը: Ստոմատոլոգիան բժշկություն է, ու փոխանակ հարկը քչացվի, որպեսզի ծառայություններն ավելի մատչելի դառնան, բարձրացվում են»,- «Արտոնագրային վճարների մասին» օրենքում կատարված փոփոխություններից Panorama.am-ի հետ զրույցում իր դժգոհությունը հայտնեց ատամնաբույժ Սուրեն Ավետյանը:

Նշենք, որ հունվարի 1-ից ուժի մեջ է մտել «Արտոնագրային վճարների մասին» օրենքում կատարված փոփոխությունները, որոնք վերաբերում են նաև ստամատոլոգներին: Ըստ նրանց, մինչև 3 բազկաթոռ ունեցող ատամնաբուժարանները ստիպված կլինեն յուրաքանչյուր բազկաթոռի համար վճարել 60-100 հազար դրամ, իսկ 3-ից ավել աթոռ օգտագործող ատամնաբուժարանները յուրաքանչյուր ավել բազկաթոռի համար պետք է վճարեն 48 հազար դրամ: Այս ամենը, ըստ Ս. Ավետյանի, կբերի նաև մատուցվող ծառայությունների գների թանկացման:

«Այժմ հստակ չեմ կարող ասել, թե մեկ պլոմբը որքան կարժենա, քանի որ ստամատոլոգները բողոքում են, խմորումները դեռ շարունակվում են, չգիտենք` ինչ կլինի»,- ասաց նա` շարունակելով, որ ստամատոլոգներով ուզում ենք բողոքարկել, նամակ են պատրաստում: Հիշեցնենք, որ հունվարի 14-ին արդեն ստամատոլոգները բողոքի ակցիա էին կազմակերպել նախագահական նստավայրի առջև:

Ատամնաբույժն ասաց, որ իրենց կլինիկայի գնացուցակի համաձայն, բարձրորակ պլոմբանյութն արժե 15-27 հազար դրամ, ու փոփոխությունների կիրառման դեպքում այդ գինը կվարձրանա, կամ էլ մատուցվող ծառայությունների որակը կընկնի: Ամեն դեպքում, ըստ նրա, տուժելու է ժողովուրդը: «Արդեն այսօր, եթե որակյալ օգնություն ենք ցույց տալիս, շահույթը բավական փոքր տոկոս է կազմում, մոտ 10 տոկոս»,- նշեց նա:

Ստամատոլոգ Հասմիկ Ավետյանը նույնպես նշեց, որ փոփոխությունների կիրառման դեպքում թանկացումներն անխուսափելի կլինեն, բայց դեռ հստակեցվաց չէ, թե ինչքանով կթանկանան ծառայությունները:

Նշենք, որ նախօրեին ՀՀ առողջապահության նախարար Դերենիկ Դումանյանն ընդունել է ստոմատոլոգիական ծառայությունների մի խումբ ղեկավարների, ովքեր նախարարին են ներկայացրել իրենց մտահոգությունները և դժգոհությունները` կապված «Արտոնագրային վճարների մասինե ՀՀ օրենքում կատարված փոփոխությունների հետ։ Քննարկման առարկա են դարձել մասնավորապես մանկական ստոմատոլոգիայի, ինչպես նաև ստոմատոլոգիական բազկաթոռին կից ռենտգեն սարքի, օրթոպեդիկ, զննման կաբինետների հարկման խնդիրները, որոնք փաստացի հայտնվել են կրկնակի հարկման դաշտում։ Այս մասին տեղեկացնում են առողջապահության նախարարության մամուլի ծառայությունից:

Նախարար Դումանյանը համապատասխան ստորաբաժանումներին հանձնարարել է առողջապահության նախարարության գլխավոր ստոմատոլոգի և բժշկական կենտրոնների ներկայացուցիչների մասնակցությամբ սեղմ ժամկետում շահագրգիռ կազմակերպությունների և այլ գերատեսչությունների հետ ուսումնասիրել բարձրացված հարցերը և տնտեսական վերլուծությունների արդյունքում կատարված հաշվարկներով ներկայացնել համապատասխան առաջարկներ։ Անհրաժեշտության դեպքում դրանք կներկայացվեն լիազոր այլ մարմիններին, ինչպես նաև ՀՀ կառավարություն։