Ձեր վստահելի աղբյուրը

 Անցնող տնտեսական շաբաթվա իրադարձությունները սկսվեցին կառավարության այս տարվա առաջին նիստով, որի ընթացքում վարչապետ Տիգրան Սարգսյանը նշեց, որ 2013թ-ին լարված աշխատանք է սպասվում: ՀՀ կառավարության նիստում հաստատվեց ընտանեկան նպաստի և միանվագ դրամական օգնության վճարման համար նախատեսված ֆինանսական միջոցների չափերն ըստ սոցիալական ծառայություններ տրամադրող տարածքային մարմինների։

Կառավարության նիտին հաջորդեց ՀՀ էկոնոմիկայի նախարար Տիգրան Դավթյանի նախագահությամբ արդյունաբերության զարգացման հիմնադրամի հոգաբարձուների խորհրդի անդրանիկ նիստը:

Անդրադառնալով նախորդ տարվա ցուցանշներին նախարարը տեղեկացրեց, որ առաջին անգամ Հայաստանի արդյունաբերական արտադրանքի ծավալը գերազանցել է 1 տրիլիոն դրամը և հույս հայտնեց, որ ակնկալվում է 2013թ-ին արդյունաբերության աճը կկազմի 9.2% աճ:

Փաստորեն անկախությունից հետո առաջին անգամ է Հայաստանի արդյունաբերությունը նման ծավալի արտադրանք թողարկել:
2011 թվականի հունվարի 1-ից Հայաստանում ավտոտրանսպորտային միջոցների պարտադիր ապահովագրության (ԱՊՊԱ) մասին օրենքի ուժի մեջ մտնելուց հետո ոլորտի պատասխանատուները հայտարարեցին, որ ներդրվելու է ևս մի կարևոր համակարգ, որն ավելի արդյունավետ կդարձնի ԱՊՊԱ ոլորտի աշխատանքները: Խոսքը Bonus Malus համակարգերի մասին է, որը ներդրվել է արդեն այս տարվա հունվարի մեկից։ Ինչպես վստահեցնում է Կենտրոնական բանկի նախագահ Արթուր Ջավադյանը, ԱՊՊԱ-ի բոնուս համակարգը թույլ կտա կարգապահ վարորդներին կնքել ԱՊՊԱ պայմանագրեր` ավելի ցածր սակագներով։
Թե ինչպե՞ս և որքա՞ն ժամանակ կգործի այս համակարգը, ցույց կտա ժամանակը։

Անցնող տնտեսական շաբաթվա վերջին կարևոր իրադարձությունը հանրապետության նախագահ Սերժ Սարգսյանի շրջայցն էր հարկային տեսչության ուսումնական կենտրոններում։

Արարատյան մաքսատան հարկ վճարողների սպասարկման վարչության պետի տեղակալ Սուրեն Իսրայելյանը նշեց, որ այս կենտրոնն առաջինն է տարածաշրջանում և եզակի է իր ներկայացրած արդիական սարքավորումներով:

Երկրի ղեկավարի հաջորդ կանգառը ՊԵԿ Արաբկիրի տարածքային հարկային տեսչությունն էր: Այստեղ Սերժ Սարգսյանին ներկայացրեցին ստորաբաժանման կողմից մատուցվող ծառայությունների լայն շրջանակը:
Լրագրողների հետ ճեպազրույցում տեսչության հարկ վճարողների սպասարկման կենտրոնի ղեկավար Ալինա Ալեքսանյանը նշեց, որ 2013 թվականը նշանավորվում է մատուցվող ծառայությունների քանակի ու որակի ավելացմամբ, մասնավորապես էլեկտրոնային եղանակով հաշվետվություններ ներկայացնող հարկ վճարողների քանակը կավելանա 4-5 անգամ, դրա նպատակով ապահովվել են անհրաժեշտ բոլոր պայմանները:

Նախագահ Սերժ Սարգսյանը ՊԵԿ ստորաբաժանումների շրջայցն ավարտեց Քանաքեռ-Զեյթուն հարկային տեսչության ուսումնական կենտրոնում:

«ՊԵԿ-ը իմ գնահատմամբ, բնականոն կատարել է 2012-ին իր առջև դրված խնդիրները և խոսքը միայն եկամուտների հավաքագրմանը չի վերաբերումե,-ՊԵԿ ստորաբաժանումներում շրջայցից հետո հայտարարեց ՀՀ նախագահ Սերժ Սարգսյանը:

Նույն օրը կայացավ «Հայաստանի հարավային երկաթուղի» և «Հայաստանի հարավային արագընթաց ճանապարհ» ծրագրերի մեկնարկի շնորհանդեսը, որի ընթացքում Հանրապետության նախագահի հանձնարարությամբ, ՀՀ տրանսպորտի և կապի նախարար Գագիկ Բեգլարյանը հայտարարեց 3 միլիարդ ԱՄՆ դոլար արժողությամբ «Հայաստանի հարավային երկաթուղիե և Հայաստանի հարավային արագընթաց ճանապարհե ծրագրերի մեկնարկի մասին։

Ծրագրերի իրականացման արդյունքում ունենալու ենք Սև ծովի նավահանգստից դեպի Պարսից ծոցի նավահանգիստները կատարվող փոխադրումների ամենակարճ երկաթուղին` օգտագործելով Հայաստանի ստրատեգիական դիրքի ողջ պոտենցիալը, ինչը կհանգեցնի տրանսպորտային ծախսերի և ժամանակի խնայողության զգալի բարելավման` նպաստելով առևտրի խթանմանը և տնտեսական աճին տարածաշրջանում։ Արդյունքում կամրապնդվի Հայաստանի տնտեսությունը` ապահովելով միջազգային ժամանակակից հաղորդակցություն: