Ձեր վստահելի աղբյուրը

 Եվրոպայի խորհրդի տիպի կառույցները միշտ ունեն իրենց առաջ դրված խնդիր` հստակ, կոշտ արձագանքել իրենց արժեքային համակարգի կամ չափորոշիչների խախտումներին, բայց այդ դեպքում կա վտանգ, մտավախություն, որ երկիրը, որին այդ արձագանքը վերաբերում է, ընդհանրապես երես կթեքի, կմտնի ինքն իր մեջ, կոլապսի կենթարկվի և համագործակցության հնարավորությունները կնվազեն,- անդրադառնալով Եվրոպական կայունության նախաձեռնության հրապարակած փաստաթղթին, Panorama.am-ի հետ զրույցում ասաց Եվրոպական ինտեգրացիա ՀԿ ղեկավար, քաղաքագետ Կարեն Բեքարյանը:

Նշենք, որ վաղը ԵԽԽՎ-ում «Ճգնաժամային խմբի» Ադրբեջանի գլխավոր զեկուցող Պեդրո Ագրամունտը ներկայացնելու է հերթական զեկույցը, որի առնչությամբ Եվրոպական կայունության նախաձեռնությունը փաստաթուղթ է հրապարակել: Փաստաթղթում նախաձեռնող խումբը հիմնավորել է, որ զեկույցում կեղծվել է Ադրբեջանում տիրող իրական վիճակը և պահանջել է Պ. Ագրամունտի հրաժարականը` գլխավոր զեկուցողի պաշտոնից:

«Երկրորդ մոտեցումն այն է, որ եթե դու անընդհատ ձայն չհանելով, թերությունները չբարձրաձայնելով, լղոզելով փորձում ես այդ ամենից զերծ մնալ, այդ երկրի պահվածքը դառնում է ավելի ցինիկ և ավելի լկտի: Եվ նա իր «անպատժելիությամբ» դառնում է վարակիչ մյուս անդամների համար»,- նշեց զրուցակիցը:

Նա նշված երկու մոտեցումներն անվանեց խնդրի «օբյեկտիվ տարր» և, անդրադառնալով սուբյեկտիվ կողմին, ասաց. «Դա թույլատրելիի սահմաններում և այդ սահմաններից դուրս ուղղակի և անուղղակի լոբինգն է, որը տարաբնույթ գումարների ծախսմամբ և այլնով իրականացնում է Ադրբեջանը տարբեր միջազգային կառույցներում»:

Կ. Բեքարյանը հիշեցրեց, որ Եվրոպական կայունության նախաձեռնությունը 2012 թվականին հրապարակել էր «Խավիարային դիվանագիտություն» փաստաթուղթը, որտեղ անուն առ անուն անդրադարձել էր Ադրբեջանի պայմանական ասած լոբբիստներին ու նրա կողմից գնված պատգամավորներին, սակայն դրան պաշտոնական արձագանք չի եղել. «Հետևաբար ցինիկության գործընթացը շարունակվում է»:

Քաղաքագետն ասաց, որ Ադրբեջանի տարեկան զեկույցում տեղ գտած խախտումներն արվել են ԵԽԽՎ-ի անուղղակի թողտվությամբ. «Այսինքն եթե ինչ-որ պրոցես կա և չես արձագանքում համապատասխան կոշտությամբ, այսպիսի զարգացումը տրամաբանական է: Այս ամենը ցույց է տալիս, որ իրականությունը պետք է արժանի արձագանք ստանա: Սվաղելով, լղոզելով և արժեքային խնդիրնրերը քաղաքական շահին ենթարկելով ոչ մի արդյունք չի լինելու»:

Նրա խոսքերով` եթե Ադրբեջանում կան մարդիկ, ովքեր մտածում են, թե կարելի է կոծկել իրենց երկրում տիրող ներքին իրավիճակը, սխալվում են: Այլ հարց է, թե ինչքանով են այդ իրավիճակը դիմացի կողմերը շահարկում կամ չեն շահարկում»:

Պատասխանելով հրապարակված փաստաթղթի հնարավոր հետևանքների մասին հարցին, Կ. Բեքարյանն ասաց. «Այն առաջինհերթին հանրային կարծիքում և միջազգային կառույցների ներսում կբերի Ադրբեջանի իրական պատկերի ավելի հստակ տիրապետմանը: Իսկ թե կբերի կոշտ արձագանքի, ես դա առաջնային չեմ դիտարկում, քանի որ դա Հայաստանի խնդիրը չէ, այլ Եվրոպայի խորհրդի դեմքը պահելու խնդիրն է»: