Ձեր վստահելի աղբյուրը

«Իրավիճակը Կոսովոյում և ԵԽ-ի դերը» թեմայով ԵԽԽՎ շվեդ պատգամավոր Բյորն ֆոն Սիդովի զեկույցը ԵԽԽՎ հայաստանյան պատվիրակության անդամ Նաիրա Զոհրաբյանին ստիպել է զուգահեռներ անցկացնել Եվրոպայի տարածքում գտնվող մեկ այլ, դեռևս չճանաչված պետության` Լեռնային Ղարաբաղի հետ, որն իր անկախությունը հռչակել է նույն հիմքերով, ինչ որ Կոսովոն:

Ինչպես Ստրասբուրգից հայտնում է Panorama.am-ի թղթակիցը, տիկին Զոհրաբյանը եվրոպացի պատգամավորներին հիշեցրեց, որ Լեռնային Ղարաբաղի ժողովուրդը իր անկախությունը հռչակել է միջազգային բոլոր նորմերին համաձայն, և Հաագայի արդարադատության դատարանի վճիռը Կոսովոյի վերաբերյալ ևս փաստում է, որ անկախության միակողմանի հռչակումը չի հակասում միջազգային իրավունքին: Ավելին, նրա ներկայացմամբ, չլինելով ԵԽ անդամ, Լեռնային Ղարաբաղի հանրապետությունը կամովին ստանձնել է ԵԽ բազմաթիվ պարտավորություններ` միակողմանի միանալով միջազգային տարբեր կոնվենցիաների և դրանիվ իսկ հավաստելով իր հավատարմությունը եվրոպական արժեքներին:

«Միանգամայն ընդունելի է ժամանակին մեր Վեհաժողովի Բյուրոյի գործունեության վերաբերյալ ընդունված զեկույցի այն եզրահանգումը, որ բոլոր այն դեպքերում, երբ մեր կառույցի օրակարգում քննարկվելու է Կոսովոյին առնչվող կոնկրետ հարց, այդ երկրի խորհրդարանի ներկայացուցիչները կարող են հրավիրված լինել այդ քննարկումներին: Մենք ողջունում ենք այդ մոտեցումը: Սակայն, ես ուզում եմ հարցնել` ինչո՞ւ նույնը չի կարելի կիրառել Լեռնային Ղարաբաղի հանրապետությանն առնչվող հարցերի քննարկումների ժամանակ և ապահովել այդ երկրի խորհրդարանի պատգամավորների ներկայությունն ու մասնակցությունը: Սա կլիներ իրապես արդար որոշում` համահունչ մեր կառույցի հիմնարար արժեքներին», -հավելեց հայաստանյան պատվիրակության անդամը:

Նա մատնանշեց Բյուրոյի գործունեության վերաբերյալ նույն զեկույցի մեկ այլ հատված, որտեղ նշվել է Կիպրոսի հյուսիսային մասի և Պաղեստինի համայնքների ներկայացվածությունը ԵԽԽՎ-ում, այնուհետև հետաքրքրվեց` արդյո՞ք կարող է դա նախադեպ լինել Լեռնային Ղարաբաղի, Աբխազիայի, Հարավային Օսեթիայի համար:

«Կարծում եմ, կարող է լինել և սրա շուրջ արժե մտածել: Այլապես, մեր Վեհաժողովը փորձում է Լեռնային Ղարաբաղի հարցի քննարկման ինչ-ինչ հանձնաժողովներ ստեղծել, որոնք, վստահաբար, կարող են վնասել այն բարի նպատակներին, որոնք, հույս ունեմ, ունի մեր կառույցը», -հավելեց տիկին Զոհրաբյանը:

Նա համաձայնություն հայտնեց շվեդ պատգամավոր Սիդովի հետ այն համատեքստում, որ ԵԽ-ն պետք է առավել ակտիվացնի իր ազդեցությունն ու ներգրավվածությունը Կոսովոյում` ապահովելով Կոսովոյի իշխանությունների հետ կապերը բոլոր մակարդակներում:

«Եվ ես հույս ունեմ, որ հեռու չէ այն ժամանակը, երբ Եվրոպայի խորհուրդը, այստեղ նստած իմ գործընկերները կընդունեն, որ չկարգավորված հակամարտությունը չի կարող արդարացնել մարդու իրավունքի որևէ ոտնահարում։ Եվ որ Լեռնային Ղարաբաղում ապրում են մարդիկ, որոնք ունեն նույն իրավունքները, ինչ որ այստեղ նստած մեզանից յուրաքանչյուրը:  Կոսովոյի ժողովուրդը, իրացնելով ինքնորոշման իր իրավունքը, նվաճել է իր անկախությունը և այսօր մենք այստեղ քննարկում ենք, թե ինչպե՞ս օգնենք Կոսովոյին` կառուցելու իրապես ժողովրդավար պետություն: Ես ուզում եմ հավատալ, որ Կոսովոյի իշխանություններն ու ժողովուրդը, միջազգային հանրության, նաև մեր աջակցությամբ, կփորձեն կառուցել իրապես դեմոկրատական պետություն: Այնպիսի պետություն, որը այսօր կառուցում է դեռևս չճանաչված Լեռնային Ղարաբաղի հանրապետությունը», -դիմելով եվրոպացի պատգամավորներին հայտարարեց Զոհրաբյանը:

Հարակից լուր. Կոսովոյում կանանց բռնության են ենթարկում. ԵԽԽՎ-ն մտահոգված է այդ երկրում տիրող վիճակով