Ձեր վստահելի աղբյուրը

Եվրոպայի խորհուրդը կորցնում է իր բուն արժեքները, սկսում է հետապնդել շահեր և այստեղ ավելի լայն տարածում է գտնում լոբբիզմը: Այդ մասին Panorama.am-ի թղթակցի հետ զրույցում մեկնաբանելով հունվարի 23-ին ԵԽ առջև Ադրբեջանի ստանձնած պարտավորությունների մասին ԵԽԽՎ-ի կողմից ընդունված Պեդրո Ագրամունտի հեղինակած զեկույցը` հայտարարեց ԵԽԽՎ-ում հայկական պատվիրակության ղեկավար Դավիթ Հարությունյանը:

Նշենք, որ այս զեկույցը, ինչպես Դավիթ Հարությունյանը և հայաստանյան պատվիրակության մյուս անդամներն էին հայտարարել նիստի ընթացքում, միակողմանի է, կազմվել է Ադրբեջանի նախագահի աշխատակազմում և ղարաբաղյան հակամարտության վերաբերյալ դրանում կան սխալ արտահայտություններ ու ձևակերպումներ:

Այդ կապակցությամբ, ինչպես Դավիթ Հարությունյանը տեղեկացրեց, հայկական պատվիրակությունը, փորձելով «չեզոքացնել իրավիճակը», որպես հակազդեցություն ադրբեջանամետ զեկույցին, ներկայացրել է հատուկ կարծիք (Դավիթ Հարությունյանի և Արմեն Ռուստամյանի հեղինակած), որը ևս կցվել է ԵԽԽՎ-ի կողմից ընդունված փաստաթղթին:

«Նրանց նպատակն էր Լեռնային Ղարաբաղի հարցում առնվազն ամրագրում կատարել փախստականների թվի հետ կապված այն ստահոդ տեղեկատվությանը, որն ընդամենը Ադրբեջանի և այդ երկրի պատվիրակության կռվաններից է: Բայց մենք փորձեցինք այնպես անել, որ դա չլինի բուն զեկույցում: Այն չնայած մնաց զեկույցում, բայց մենք հասցրեցիքն ներկայացնել հատուկ կարծիք, որը իհարկե, կցվեց զեկույցին», -ներկայացրեց Հարությունյանը:

ԵԽԽՎ-ում հայաստանյան պատվիրակության ղեկավարն ընդունում է, որ ադրբեջանական ակտիվ լոբբինգի դեմ պայքարում իրենց գործադրած ջանքերը սահմանափակ արդյունքներ են տվել:

Նշենք, որ Ադրբեջանի պարտավորությունների մասին համազեկուցող իսպանացի Պեդրո Ագրամունտը «Եվրոպական կայունություն» (ESI) նախաձեռնության կողմից համարվում էր «խավիարային դիվանագիտության» ակտիվ ներկայացուցիչ և ԵԽԽՎ-ում զբաղված է ադրբեջանական լոբբինգով:

Ի դեպ, այս նախաձեռնությունը ԵԽԽՎ-ում ձմեռային նստաշրջանի մեկնարկին շրջանառության մեջ էր դրել «Խավիարային դիվանագիտություն» անվանումով վերլուծությունը, որտեղ նկարներով ու անուններով նշվում էր այն մարդկանց անունները, որոնք այսպես ասած, խավիարի դիմաց զբաղվում են ադրբեջանական լոբբինգով, և Ագրամունտի անունն այդ շարքում առաջինն էր: Օրինակ, նախաձեռնությունը, վկայակոչելով իր աղբյուրներին, նշել էր, որ «խավիարի մեկ կիլոգրամն արժե 1300-1400 եվրո: ԵԽԽՎ-ում Ադրբեջանի ընկերներից յուրաքանչյուրը (10-12 մարդ) ամեն նստաշրջանում՝ տարին 4 անգամ, առնվազն 0,4-0,6 կգ խավիար է ստանում: Մի 3-4 մարդ էլ քարտուղարությունում կա»: Նկատենք, որ ԵԽԽՎ-ում Ադրբեջանի վերաբերյալ ամբողջ քննարկումների ընթացքում նախաձեռնության ներկայացրած վերլուծության վերաբերյալ որևէ քննարկում չի կայացել:

«Ես չեմ կարծում, որ մենք ի վիճակի ենք այնպես անել, որ եվրոպական կառույցը ուղղենք ճիշտ ռելսերի վրա: Մենք ունենք մեր հավատարմությունը այդ արժեքներին և, եթե մենք խորապես գիտակցում ենք, որ դրանք իսկապես արժեքներ են, պետք է փորձենք դրանք կյանքի կոչել մեր երկրում` չսպասելով, որ մեզ պահանջներ ներկայացնեն կամ հետևեն: Ի վերջո այդ կարծիքները շատ հաճախ դառնում են ընդամենը գործիք աշխարհաքաղաքական պայքարում: Մեր խնդիրն է գիտակցել, որ այդ արժեքները ինքնին արժեք են Հայաստանի համար», -մեզ հետ զրույցում նկատեց պարոն Հարությունյանը` ընդգծելով, որ Եվրոպական խորհրդարանը «շեղվել է դեպի նյութապաշտություն»:

Հայկական պատվիրակության ղեկավարը հիշեցրեց, որ դեռևս երկու նստաշրջան առաջ ինքը ԵԽԽՎ-ին ներկայացրել է առաջարկություն այն մասին, որ Վեհաժողովի անդամը, անդամությունը դադարեցնելուց հետո իրավունք չունի զբաղվել լոբբիզմով երեք տարի, քանի որ նա օգտագործում է վեհաժողովի իր կապերը լոբբիզմ անելու համար: Սակայն Հարությունյանի այս առաջարկությունը մերժվել է:

«Ի սկզբանե, մարդիկ գիտեն, որ երբ դադարի նրանց անդամակցությունը, կունենան լոբբիստ աշխատելու առաջարկություն: Նրանք անգամ այժմ էլ` լինելով Վեհաժողովի անդամ, աշխատում են որպես լոբբիստներ: Ցավոք, այդ անձանց թիվը մեր Վեհաժողովում աճեց, երևի դրան նպաստեց նաև ֆինանսատնտեսական ճգնաժամը», -նկատեց Դավիթ Հարությունյանը:

Հարակից հրապարակում. Եվրախորհուրդը այլևս սամադսեիդովների ու Ադրբեջանի եվրախորհուրդն է. Նաիրա Զոհրաբյանը` ձախողված բանաձևի մասին