Ձեր վստահելի աղբյուրը

«Ամերիաբանկ» ընկերությունն իր հաճախորդներին տեղեկացնում է, որ փետրվար 8-ի լույս 9-ի գիշերը ԱրՔա ընկերությունն իրականացնելու է ծրագրային ապահովման փոփոխություն, որի ընթացքում քարտերը կարող են մի քանի ժամ չսպասարկվել:

«Ինչպես նաև ս.թ.-ի հունվարի 26-ից սկսած 9 աշխատանքային օրերի ընթացքում, ԱրՔա համակարգի փոփոխությունների հետևանքով, քարտերով որոշ նոր ծառայությունների տրամադրումը (այդ թվում՝ վարկային սահմանաչափերի փոփոխություններ, վիրտուալ քարտերի գրանցում, փոփոխությունների կատարում քարտերի տվյալներում SMS-ի միջոցով) հասանելի չի լինի»,-ասված է ընկերության տարածած հաղորդագրության մեջ:

Մանրամասն տեղեկությունների համար հաճախորդները կարող են զանգահարել Ամերիաբանկ (010) 56 11 11 կամ ԱրՔա (010) 44 03 80; (010) 44 02 24 հեռախոսահամարներով։

Ընկերությունը նաև հայտարարությանը կցել է «Արքա» ընկերությունից ստացված հաղորդագրությունը, ըստ որի.

«Բանկի ArCa, Visa, Master քարտերի թողարկումն ու սպասարկումն իրականացնող «Արմենիան Քարդ» Պրոցեսինգային կենտրոնը մեկնարկում է նոր ծրագրային ապահովման անցման աշխատանքները` նպատակ ունենալով էապես բարելավել քարտերի սպասարկման որակը:

Այդ կապակցությամբ ս.թ. հունվարի 29-ից ժամանակավոր դադար է հայտարարվում բանկի կողմից նոր քարտերի թողարկման, քարտերի փոխարինման, ինչպես նաև առևտրի և սպասարկման կետերում նոր POS տերմինալների ակտիվացման և ԱԳՄ տեղադրման գործողությունների մասով:

Նշենք, որ շրջանառության մեջ գտնվող քարտերը և դրանք սպասարկող տեղադրված սարքավորումները շարունակելու են գործել: Այնուամենայնիվ, մինչև նոր ծրագրային ապահովման անցման գործընթացի ավարտը չեն բացառվում համակարգի բնականոն աշխատանքի խափանումներ (այսպես կոչված «անցումային ժամանակահատվածի» հետ կապված խնդիրներ), որոնք անխուսափելի են նմանատիպ խոշորածավալ նախագծերի իրականացման ժամանակ:

Մենք ներողություն ենք խնդրում պատճառած հնարավոր անհարմարությունների համար և տեղեկացնում, որ բոլոր հարցերի դեպքում կարող եք զանգահարել Ձեզ սպասարկող բանկի հեռախոսահամարով»:

«ԱՐՔԱ»-ից Panorama.am-ին հայտնեցին հետևյալը.

ԱՐՔԱ համակարգում մեկնարկում է ամբողջովին նոր ծրագրային հենքին անցման աշխատանքների վերջին` միգրացիայի փուլը:
ԱՐՔԱ համակարգում նոր ծրագրային հենքի ներդրմանը նախորդել են մեկ տարուց ավել տևած խոշորածավալ աշխատանքներ: Այդ ընթացքում տեղադրվեցին նոր սերվերային հզորություններ, վերազինվեցին և համալրվեցին ենթակառուցվածքային համակարգերը (էլեկտրամատակարարում, հովացման համակարգեր և այլն): Նոր ծրագրային հենքի ներդրման և տեղայնացման շրջանակներում Ընկերությունը սերտորեն համագործակցել է միջազգային վճարային համակարգերի (AmEx, DinersClub, MasterCard, VISA), բանկային ավտոմատացված համակարգեր մշակող ընկերությունների, մասնագիտացված սարքավորումներ (ԱԳՄ, ՊՈՍ տերմինալներ) մատակարարող կազմակերպությունների հետ և ամենակարևորը համակարգի անդամ բանկերի հետ, որոնք վերազինման գործընթացի հիմնական պատվիրատուն են և որոնց նպատակն է իրենց հաճախորդներին ծառայությունների ավելի բարձր որակի և լայն շրջանակի մատուցումը:

Նոր ծրագրային հենքին անցման նպատակով թեստային միջավայրում (թեստային քարտերով, թեստային միջավայրում գրացված բանկոմատներով, POS տերմինալներով և այլ հատուկ սարքավորումներով) փորձարկվել են քարտերի թողարկման, սպասարկման, գործարքների ֆինանսական արդյունքների մշակման և այլ հարակից գործընթացները:
Նոր համակարգի միջոցով աշխատանքին անցման հետ կապված որոշակի փոփոխություններ են կատարվել նաև բանկերի ավտոմատացված ծրագրային համակարգերում: Միգրացիոն աշխատանքներին մասնակցել են նաև համակարգի անդամ բանկերի համապատասխան մասնագետները:

Նոր ծրագրային հենքին անցման ժամանակահատվածում չեն բացառվում համակարգի բնականոն աշխատանքի որոշակի խաթարումներ (այսպես կոչված «անցումային ժամանակահատվածի» հետ կապված խնդիրներ), որոնք անխուսափելի են նմանատիպ խոշորածավալ նախագծերի իրականացման ժամանակ:
Այնուամենայնիվ այդ ժամանակահատվածի անցումից հետո նոր ծրագրային հենքի ներդնումը էականորեն կբարելավի համակարգի աշխատանքը և քարտապանների սպասարկումը, այդ թվում վիրտուալ տիրույթում:
ԱրՔա պրոցեսինգային կենտրոնի ներկայիս ծրագրային ապահովումը ներդրվել է շուրջ 13 տարի առաջ և այլևս չէր համապատասխանում բանկային և քարտային բիզնեսի արդյունավետ զարգացման արդի պահանջներին:
Ներդրվող ծրագրային համակարգը բավարարում է ոլորտի ժամանակակից պահանջներին: Վերջինիս կարևորագույն առանձնահատկությունն է բազմաբանկ կառուցվածքը, որը հնարավորություն կընձեռի համակարգի անդամ բանկերին լինել անկախ և յուրահատուկ քարտային ծրագրերի իրականացման իրենց մոտեցումներում:

Նոր ծրագրային համակարգը ամբողջությամբ համապատասխանում է անվտանգության միջազգային խստագույն պահանջներին, մասնավորապես PA DSS (Payment Application Data Security Standards) վկայականի առկայությունը վկայում է նշված ծրագրի միջազգայնորեն ճանաչված` առավել անվտանգ համակարգ լինելու մասին:
Նշենք, որ 2013 թվականի հունվարի 1-ի դրությամբ, ԱՐՔԱ համակարգում գործում է 6068 POS-տերմինալ (տարեկան աճը` 28%-ով), որից 560-ը գտնվում է կանխիկացման կետերում (տարեկան աճը`11.6%), իսկ 5508-ը` առևտրի կետերում (տարեկան աճը` 30%): Համակարգի բանկոմատների թիվը ամբողջ Հայաստանի տարածքում հունվարի սկզբին կազմել է 960: Մեկ տարում գործարկվել է 123 նոր բանկոմատ: Ընդհանուր հաշվով այս տարվա հունվարի 1-ի դրությամբ Արմենիան Քարդ համակարգի ակտիվ քարտերի թիվը հասել է 1.008.9 հազարի: Անցած տարվա նույն ժամանակի համեմատ այս ցուցանիշն ավելի է 32%-ով: