ԳԱԱ-ն կհամագործակցի ՌԴ-ի Միջուկային հետազոտությունների միացյալ ինստիտուտի հետ

Կրթություն, գիտություն 13:10 25/01/2013

ԳԱԱ-ն կհամագործակցի ՌԴ-ի Միջուկային հետազոտությունների միացյալ ինստիտուտի հետ

ՀՀ Գիտությունների ազգային ակադեմիայի և ՌԴ-ի Միջուկային հետազոտությունների միացյալ ինստիտուտի (ՄՀՄԻ) (ք. Դուբնա) միջև այսօր կնքվել է գիտության, նորամուծությունների և կրթության բնագավառներում համագործակցության մասին համաձայնագիր:

Այն ստորագրել են ՀՀ ԳԱԱ նախագահ, ակադեմիկոս Ռադիկ Մարտիրոսյանը և ՄՀՄԻ-ի տնօրեն, Ռուսաստանի Գիտությունների ակադեմիայի ակադեմիկոս Վիկտոր Մատվեևը:

ԳԱԱ մամուլի կենտրոնից հայտնում են, որ համագործակցության ուղղություններն են` տարրական մասնիկների ֆիզիկայի, միջուկային ֆիզիկայի, խտացված վիճակի ֆիզիկայի, նյութաբանության, նանոտեխնոլոգիաների, էներգետիկայի, տեղեկատվական տեխնոլոգիաների բնագավառներում համատեղ հետազոտությունների զարգացման ուղղությամբ համադասված գործողությունների և փոխհամաձայնեցված միջոցների ձեռնարկումը, համատեղ գիտական խմբերի և կոլեկտիվների ստեղծումը և այլն:

Ինչպես հանդիպման ընթացքում նշել է ՀՀ ԳԱԱ նախագահ Ռադիկ Մարտիրոսյանը, դեռ խորհրդային տարիներից սկսած լավ նախադրյալներ կան համագործակցության համար: Հայ ֆիզիկոսները մասնակցում են ՄՀՄԻ-ի ծրագրերի իրականացմանը, գիտաժողովներին, փորձի փոխանակմանը:

Ներկայումս ՄՀՄԻ-ում աշխատում են ՀՀ ԳԱԱ ինֆորմատիկայի և ավտոմատացման պրոբլեմների ինստիտուտի գիտնականները: ՄՀՄԻ-ի տնօրեն Վիկտոր Մատվեևը ներկայացրեց հեռանկարային գիտական ուղղությունները, որոնք այժմ առաջնահերթային են ՄՀՄԻ-ի համար և հայ գիտնականներին հրավիրեց մասնակցել ինստիտուտի աշխատանքներին: Ռադիկ Մարտիրոսյանը Վիկտոր Մատվեևին հրավիրել է մասնակցելու ՀՀ ԳԱԱ-ի 70-ամյակին նվիրված հոբելյանական միջոցառումներին, որոնք տեղի կունենան 2013թ. հոկտեմբերին:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: