Ձեր վստահելի աղբյուրը

ԱԻՄ առաջնորդ, ՀՀ նախագահի թեկնածու Պարույր Հայրիկյանը facebook-յան ասուլիսի ժամանակ հայտարարեց, որ նրանք, ովքեր իշխանության հետ նույն թիմում չեն աշխատում, ընդդիմադիր են.

«Ես ընդդիմադիր դաշտում եմ 1999թ-ի փետրվարից»,- արձագանքելով ունկնդրի հարցին, թե ի վերջո ինքը որ դաշտում է`  նշեց Պ.Հայրիկյանը:

Պ.Հայրիկյան հրաժարվեց մեկնաբանել, թե ինչո՞վ կարելի է բացատրել այն հանգամանքը, որ նախագահի թեկնածու, էպոսագետ Վարդան Սեդրակյանը էլեկտրոնային ընտրության արդյունքներով առաջատարն է, իսկ ինչ վերաբերում է հացադուլ հայտարարած Անդրիաս Ղուկասյանին, ապա նշեց, թե վերջինիս ասածները շատ կարևոր են բոլորի համար:

Խոսելով կոնկրետ իր թեկնածության մասին էլ նշեց.

«Մենք կոլխոզի կամ սովխոզի նախագահ չենք ընտրում, այլ ընտրում ենք երկրի նախագահ, որը պետք է մասնագետների միջոցով շենացնի երկիրը: Ես չեմ կարող տնտեսությամբ զբաղվել, ես գնում եմ երկիրը կառավարելու»,- նշեց Հայրիկյանը:

Պ.Հայրիկյանի նախընտրական ծրագրում, ի դեպ, տեղ է գտել այն դրույթը, որը հնարավորություն կտա հայ աղջիկներին ծառայել ազգային բանակում: Թեկնածուն նշեց, որ իրենք հարցում են անցկացրել և աղջիկները «զարմանալիորեն գոհ են» նման հեռանկարից .

«Ինչպես ուսանողուհին առավոտյան գնում է դասի, այդպես էլ 18-25 տարեկան աղջիկները կարող են գնալ առավոտյան ծառայության ու երեկոյան գալ տուն: Մենք սա ենք առաջարկում մեր ծրագրով»,- տեղեկացրեց նախագահի թեկնածուն: