Ձեր վստահելի աղբյուրը

Եվրոպայի խորհրդի խորհրդարանական վեհաժողովում (ԵԽԽՎ) Հայաստանի պատվիրակության ղեկավար Դավիթ Հարությունյանն այսօր ստիպված էր գաղտնազերծել ԵԽԽՎ մոնիտորինգի հանձնաժողովի սեպտեմբերյան նիստի արձանագրությունը, որը հրապարակային չէ:

ԵԽԽՎ ձմեռային նստաշրջանի աշխատանքների ամփոփման նպատակով այսօր ԱԺ-ում կազմակերպված ասուլիսում Դավիթ Հարությունյանն այս քայլին գնաց Ադրբեջանի հարցով համազեկուցող Պեդրո Ագրամունտի այն հայտարարությունից հետո, թե ԵԽԽՎ մոնիտորինգի հանձնաժողովի նիստում հայաստանյան պատվիրակության ղեկավար Դավիթ Հարությունյանը հայտարարել է իբր, թե այն տարածքները, որոնք Հայաստանը համարում է ազատագրված, իրականում «օկուպացված են»: 

«Առաջին դեպքը չէ, որ մեր խոսքերը փորձ է արվում աղավաղել. այդպիսի դեպք եղել է սեպտեմբերին, երբ Ադրբեջանի հարցով համազեկուցողը և Ադրբեջանի պատվիրակության ղեկավարը փորձ արեցին աղավաղել իմ խոսքը և անգամ դա տեղ գտավ նախնական արձանագրության մեջ: Մենք անմիջապես նկատեցինք դա, ներկայացրինք մեր առարկությունները և, քանի որ հանձնաժողովի բոլոր անդամները ներկա էին, շատ լավ հիշում էին, թե ինչ եմ ասել, ու արձանագրությունում բոլոր հարցադրումները շտկվեցին: Ցավոք, Մոնիտորինգի հանձնաժողովի բոլոր արձանագրությունները գաղտնի են, և ես չեմ կարող ձեզ դրանք տրամադրել: Այնուամենայնիվ, դրանք իմ ձեռքի տակ են, և ես կարող եմ ցույց տալ միայն: Համապատասխան տողը ահա` «Պարոն Հարությունյանը հերքեց օկուպացված տարածքներ հասկացությունը»», -այսօրվա ասուլիսում հայտարարեց Դավիթ Հարությունյանը:

Հիշեցնենք, որ ԵԽԽՎ ձմեռային նստաշրջանում եվրոպացի պատգամավորները Ադրբեջանի հարցով համազեկուցողներ Պեդրո Ագրամունտի և Ժոզեֆ Գրեշի զեկույցի հիման վրա Եվրոպայի խորհրդի առջև ստանձնած Ադրբեջանի պարտավորությունների վերաբերյալ բանաձև ընդունեցին, որի համաձայն Ադրբեջանը շարունակում է մնալ ԵԽԽՎ մոնիտորինգի ներքո: Այդպիսով, ԵԽԽՎ-ն Ադրբեջանի իշխանություններին կոչ է անում «քայլեր ձեռնարկել ժողովորդավարական ինստիտուտների գործունեությանը վերաբերող օրենսդրական դաշտի կատարելագործման ուղղությամբ»: Ի տարբերություն այս զեկույցի, Ադրբեջանում քաղբանտարկյալների հարցով համազեկուցող Քրիստոֆ Շտրասսերի (Christoph Strasser) զեկույցը ԵԽԽՎ-ն մերժեց, որը սակայն ԵԽԽՎ Իրավական հարցերի հանձնաժողովն ընդունել էր:

Դավիթ Հարությունյանի խոսքով, Մոնիտորինգի հանձնաժողովի երկու համազեկուցողներ Պեդրո Ագրամունտի և Ժոզեֆ Գրեշի հրապարակած նյութում զգալի էին ադրբեջանական քարոզչամեքենայի օգտագործած ջանքերը:

«Պատահական չէ, որ նրանք դիտավորյալ աղավաղել էին Լեռնային Ղարաբաղի հակամարտության անվանումը` փորձելով տպավորություն ստեղծել, որ խնդիրը վերաբերում է ԼՂ հետ կապված Հայաստանի ու Ադրբեջանի միջև տարածքային վեճին: Քանի որ մեզ չէր հաջողվել դրդել նրանց, որ փոփոխություններ կատարվեն զեկույցում, ԵԽԽՎ-ի կողմից ընդունված մեմորանդումին մենք կցեցինք մեր պատվիրակության հատուկ կարծիքը, որը համարվում է իրենց զեկույցի 2-րդ հավելվածը, այսինքն` դրանք նույն կարգի փաստաթղթեր են և որևէ բանով իրարից չեն տարբերվում», -հավելեց Հարությունյանը:

Հայաստանի պատվիրակության ղեկավարի խոսքով, այս անգամ ակնհայտ դարձավ, որ ԵԽԽՎ-ում «ամեն ինչ հարթ չէ» ու Ադրբեջանի վերաբերյալ զեկույցին մասնակցել են այնպիսի պատգամավորներ, որոնք երկար ժամանակ որևէ նիստի չեն մասնակցել:

«Պատահական չէ, որ վճարովի լոբբիստական աշխատանքը ԵԽԽՎ-ում վերջին տարիներին շատ լուրջ ծաղկել է: Այս նստաշրջանում մեզ համար պարզ դարձավ, որ Վեհաժողովի անդամների մի զգալի մասը ղեկավարվում են բացարձակապես ոչ թե կազմակերպության արժեքներով, այլ շահերով», -նկատեց Հարությունյանը:

Հարակից հրապարակումներ. Ադրբեջանը կշարունակի մնալ ԵԽԽՎ մոնիտորինգի տակ

Եվրախորհուրդը այլևս սամադսեիդովների ու Ադրբեջանի եվրախորհուրդն է. Նաիրա Զոհրաբյանը` ձախողված բանաձևի մասին

Խավիարի գինը ԵԽԽՎ-ում և դրա դեմ հայկական պայքարը. Հարությունյանի դիտարկումները