Ձեր վստահելի աղբյուրը

«Հանրապետություն» կուսակցությունն ընթացիկ ընտրություններում նախընտրած թեկնածու ունի: Այս մասին Panorama.am-ին հայտնեց կուսակցության առաջնորդ Արամ Սարգսյանը: Միաժամանակ վերջինս հայտնեց, որ ընտրություններում իրենց դերակատարությունը կլինի մեկը` պարզապես գնալ տեղամասեր և ձայն տալ կուսակցության որոշմամբ նախընտրելի համարված թեկնածուին:

«Մենք քարոզարշավին չենք մասնակցում, բայց ընտրատեղամաս գնալու ենք և կատարելու ենք փակ գաղտնի քվեարկություն»,- ասաց Արամ Սարգսյանը` ընդգծելով, որ իրենց կուսակիցների քվեարկությունը կլինի ուղղորդված: Նա միաժամանակ հրաժարվեց հայտնել, թե որ թեկնածուն է վայելում իրենց աջակցությունը` խոստանալով այդ մասին հայտարարել ընտրություներից հետո, եթե «անհրաժեշտ համարվի»:

«Փաստացի մենք քարոզչությանը չենք մասնակցելու, դրա համար էլ անուններ չենք տալիս»,- ասում է Արամ Սարգսյանը:

Ինչ վերաբերում է սատարելուն` գնալ թեկնածուի հետ ընտրատեղամասեր, մասնակցել ընտրողների հետ հանդիպումների և այլն, ապա Արամ Սարգսյանը չի պատրաստվում անել. «Ժամանակին մենք սատարեցինք Ստեփան Դեմիրճյանին, սատարեցինք Լևոն Տեր-Պետրոսյանին, էսօր մենք որևէ մեկին չենք սատարում, պարզապես եղած թեկնածուներից մեկին` մեր նախըտրելի թեկնածուին, տալու ենք մեր քվեն»:

«Հաջողություն ենք մաղթում նրանց, ովքեր առաջադրվել են: Չենք ուզում կասկածի տակ դնել նրանց հաղթանակը: Չենք ուզում Աստծո փոխարեն որոշել, թե ով կհաղթի: Իսկ թե ում ենք պատրաստվում տալ մեր անձնական քվեն, երևի թե կհայտնեմ ընտրություններից հետո»,- նշեց նա:

Այն ենթադրություններին, թե ազատական ուղղվածության «Հանրապետություն»-ը պիտի որ աջակցի նույն դաշտում գործող Հրանտ Բագրատյանին, մանավանդ որ` ընդամենը վերջերս երկուսն էլ Կոնգրեսի կազմում էին, պարոն Սարգսյանն այնքան էլ տրամաբանական չհամարեց. «Գիտե՞ք` երբ ես ՀԱԿ-ում պրոբլեմներ ունեի, Հրանտ Բագրատյանը չուներ այդ պրոբլեմները: Ազատական դաշտում էլի մարդիկ կան, էնպես որ չէի ուզենա խնդիրը միայն էդ դաշտով նայել: Կուսակցությունում շատ-շատ են մարդիկ, ովքեր նայում են Հրանտ Բագրատյանի ծրագրերը` որպես ընկալելի և ընդունելի, մենք կողմ ենք եղել այդ «100 քայլին», բայց որևէ մեկի անունը տալ, նշանակում է քարոզարշավին մասնակցել, մինչդեռ մեր համագումարը որոշում ունի` քարոզարշավին չմասնակցել»:

Արամ Զավենիչն հավաստիացրեց, որ թեկնածուներից որևէ մեկի անունը չհնչեցնելու համար հատուկ միտում կամ մտավախություն չունի, որ շահարկումների առիթ կդառնա: «Եթե մենք մտնում ենք դրա մեջ ամբողջ թափով, եթե ես տալիս եմ որևէ մեկի անունը, ես էդ թեկնածուի հետ պիտի գնամ քարոզարշավի, պիտի պայքարեմ, պիտի փորձեմ տեղերում պաշտպանել էդ քվեն: Ես չեմ տեսնում, որ դա խնդիր է լուծելու, ես չեմ տեսնում, որ այդ թեկնածուները… Ես պիտի ժողովրդին ասեմ, որ այդ մարդը հաղթելու է, բայց ես չեմ տեսնում էդտեղից մեկին, որը հաղթելու է ու սուտ չեմ ուզում ասել»:

Արամ Սարգսյանը համաձայնեց այն դիտարկման հետ, որ այնուամենայնիվ հասարակության մի ստվար զանգված էլ կողմնորոշման համար սպասում է իր խոսքին, բայց չի ուզում հիասթափեցնել նրանց: «Ես չեմ ուզում ժողովրդի մեջ մեզ համակրող զանգվածին եղած թեկնածուներից մեկի համար ուղղորդել: Ես միայն կարող եմ ասել, որ իշխանական թեկնածուին մեր կուսակցությունից ու մեր համակիրներից որևէ մեկը ձայն չի տա, մնացածը կորոշենք համատեղ և միաձայն»:

Սպարապետ Վազգեն Սարգսյանի եղբայր Արամ Սարգսյանը գլխավորում է «Հանրապետություն» կուսակցությունը: Վերջինս 2008թ. նախագահական ընտրություններում սատարել էր Լևոն Տեր-Պետրոսյանի թեկնածությունը, իսկ ընտրություններից հետո ընդգրկվել էր Հայ ազգային կոնգրեսի կազմում: Կոնգրեսի հետ ունեցած տարաձայնությունների պատճառով Արամ Սարգսյանի գլխավորած կուսակցությունը նախորդ տարի տեղի ունեցած խորհրդարանական ընտրություններից հետո դուրս էր եկել ՀԱԿ-ի կազմից:

Սյուզի Բադոյան