Ձեր վստահելի աղբյուրը

«Լրագրողներ առանց սահմանների» («Reporters Without Borders») միջազգային կազմակերպությունը հրապարակել է աշխարհի երկրներում ԶԼՄ-ների ազատության 2013 թ-ի զեկույցն ու վարկանիշային աղյուսակը: Զեկույցի համաձայն, Հայաստանը 3 միավորով բարելավել է դիրքերը` 179 երկրների շարքում հանգրվանելով 74-րդ հորիզոնականում:

Նշենք, կազմակերպության վարկանիշային ամենամյա ինդեքսներում սա երրորդ անընդմեջ առաջխաղացումն է մեր երկրի կողմից, որը վերջին չորս հաջորդական զեկույցներում ընդհանուր առմամբ 37 հորիզոնականով բարելավել է դիրքերը:

2009 թ-ին Հայաստանը զեկույցում 111-րդն էր, 2010-ին՝ 101-րդը, 2011-2012 թթ-ին՝ 77-րդը:

Կազմակերպությունը երկրների միավորները որոշում է մի քանի չափորոշիչներով՝ դրանց թվում մամուլի նկատմամբ ճնշումները, բռնությունները լրագրողների հանդեպ, բանտարկված լրագրողների քանակը, ԶԼՄ-ների գործունեության թափանցիկությունը, գրաքննության մասին հաղորդումները, յուրաքանչյուր երկրի ԶԼՆ-ների դաշտը կարգավորող օրենսդրությունը և այլն։

Հայաստանն մամուլի ազատության ցուցիչով առաջատարն է Հարավային Կովկասում և երկրորդը՝ ԱՊՀ երկրների շարքում, Մոլդովայից հետո, որն աղյուսակում զբաղեցրել է 55-րդ հորիզոնականը:

Հետխորհրդային երկրներից, ըստ կազմակերպության փորձագետների, առավել ազատ մամուլ ունեն Էստոնիան (11), Լիտվան (33) և Լատվիան (39): Վերջիններս ընդգրկված են «Ազատ մամուլ ունեցող» երկրների խմբում:
Նրանց հաջորդում են Մոլդովան (55), Հայաստանը (74), Վրաստանը (100) և Ղրզստանը(106), որոնք ընդգկված են այսպես կոչված «որոշակի խնդիրներ ունեցող» երկրների ցանկում:
Այս խմբի մասին զեկույցում, մասնավորապես, ասված է, թե չնայած նրանց միջև սանդղակում առկա հեռավորությանը, նրանց միավորում է ընդհանուր խնդիրներ: Այս երկրներում լայնորեն ապահովված է մամուլի բազմակարծությունը, իսկ պետական գրաքննության մակարդակն աննշան է, սակայն նրանք դեռևս լուրջ մարտահրավերներ ունեն լրատվամիջոցների անկախության և լրագրողների գործունեության համապատասխան միջավայրի ստեղծման հարցերում: Վերջինի դեպքում նշվում, թե լրագրողներն հաճախակի են ճնշումների ենթարկվում տարբեր շահագրգիռ խմբերի կողմից:
Զեկույցում հետխորհրդային մնացած բոլոր երկրներն ընդգրկվախ են «դժվար վիճակում գտնվող» երկրների ցանկում և համապատասխանաբար զբաղեցնում են հետևյալ հորիզոնականները. Տաջիկստան (123), Ուկրաինա (126), Ռուսաստան (148), Ադրբեջան (156), Բելառուս (157), Ղազախստան (160), Ուզբեկստան (164) և Թուրքմենստան (177):
Հայաստանի այլ հարևաններից մեծ անկում է արձանագրել Թուրքիան, իջնելով 6 հորիզոնականով և հայտնվելով 154-րդ տեղում, մինչդեռ Իրանը, մեկ միավորով բարելավելով դիրքերը, հայտնվել է 174-րդ հորիզոնականում:
Վարկանիշային աղյուսակում ամենամեծ անկումն անձանագրել է Մալին, որը պետական հեղաշրջման պատճառով աղյուսակում նահանջել է 74 հորիզոնականով, հայտնվելով 99-րդ տեղում:

Մամուլի ազատության աղյուսակը նախորդ տարվա նման գլխավորում են եվրոպական երկրները: Առաջատարն անփոփոխ է ՝ Ֆինլանդիան, որին հաջորդում են Նիդերլանդերը, Նորվեգիա, Լյուքսեմբուրգն ու Անդորրան:
Աղյուսակը եզրափակում են Թուրքմենստանը, Էրիթրեան և ԿԺԴՀ-ն: