Ձեր վստահելի աղբյուրը

Նախընտրական քարոզչության շրջանակում ՀՀ նախագահի թեկնածու Սերժ Սարգսյանը Տավուշի մարզից ուղևորվեց Լոռու մարզ, որտեղ առաջին կանգառը Ալավերդիում էր: Ալավերդցիների հետ հանդիպմանը Սերժ Սարգսյանը կարևորեց երկրի առաջընթացը, իսկ առաջընթաց կարող է արձանագրել միայն այն պետությունը, որտեղ հարգված, գնահատված ու պաշտպանված է քաղաքացու արտահայտվելու իրավունքը.

«Այս ուղղությամբ վերջին հինգ տարիներին կատարվել է բազմաթիվ աշխատանք և համոզված եմ` բոլորդ էլ ականատեսն եք այն բարեփոխումներին, որ կատարվել են հատկապես խոսքի արտահայտման ազատության ոլորտում»,- հայտարարեց ՀՀ նախագահի թեկնածուն:

Սակայն, շարունակեց նա, երկիրը չի կարող արձանագրել ակնկալվող առաջընթացը, եթե չկա վստահություն պետական մարմինների, դատարանների և արդարադատության համակարգի նկատմամբ և այդ մարմինների կողմից իրենց լիազորությունների թափանցիկ ու արդյունավետ իրականացումը լինելու է առաջնահերթությունների շարքում.

«Վստահ եմ, որ այդ համակարգերի աշխատանքը լրջորեն բարելավվելու է, քանի որ առանց այդ մարմինների բարեփոխման ես անգամ չեմ կարող պատկերացնել այն Հայաստանը, որին ձգտում ենք` ապահով Հայաստանը»,- համոզմունք հայտնեց նա:
Շեշտադրումներից մեկը, որ հասցրեց Սերժ Սարգսյանը ալավերդցիներին, այն է՝ առաջիկա հինգ տարիներին հիմնական խնդիրը պետք է լինի հայրենադարձությունը.«Մենք այնքան ենք քչացել, որ այլևս տեղ չունենք պակասելու: Սակայն սա միայն պետության խնդիրը չէ, այլ բոլորիս. պետք է համապատասխան մթնոլորտ ստեղծենք»,- ընդգծեց նախագահի թեկնածուն ու հավելեց, որ այդ քաղաքականության շրջանակում առաջնային ուշադրության կենտրոնում է լինելու մայրությունն ու երիտասարդությունը: Իսկ ամենակարևորը` Հայաստանը պետք է հարուստ լինի առողջ ընտանիքներով:
Նշենք, որ այսօր Սերժ Սարգսյանը կշարունակի քարոզչության շրջանակում հանդիպումները Լոռու մարզում, նա կհանդիպի Ստեփանավանի, Սպիտակի և Վանաձորի բնակիչների հետ: