Ձեր վստահելի աղբյուրը

30 հազար դրամ միայն թոշակի հույսին ապրող 83-ամյա Գոհար Ամիրխանյանը, որը տիրապետում է թուրքերենին էլի մի շարք լեզուների և երկար տարիներ աշխատել է Ազգային անվտանգության ծառայությունում, այժմ անելանելի վիճակում է հայտնվել. Օր օրի սպասում է, որ դատական ակտերի հարկադիր ծառայությունը կվտարի այն բնակարանից, որտեղ ինքն այժմ ապրում է: «Տուն-տեղս խաբելով վերցրեց, ծախեց, տարավ փողը, հիմա չգիտեմ ինչ անեմ, ավանտյուրիստ, ավանտյուրիստ»,-Panorama.am-ի թղթակցի հետ զրույցում հուզված պատմում էր տիկին Գոհարը, որն այժմ ոչ մի հարազատ չունի:

Երկու բնակարանների տեր կինը դարձել է երիտասարդ տարիքից աշխատելով ու կուտակելով: Նա իր «տները վաճառած ավանտյուրիստ» է անվանում ոստիկանության համակարգի նախկին աշխատակից, կոչումով կապիտան Սերգո Ամիրխանյանին (նրանց ազգանունները նույնն են, բայց հարազատներ չեն. Հեղ.):

Տիկին Գոհարի պատմելով, Սերգոն, սկզբում իբր օգնելու նպատակով վաճառել է իր ծնողներից ժառանգություն ստացած Բագրատունյաց փողոցի տունը, այնուհետև` Վրացական փողոցում գտնվող իր բնակարանը: Գումարները չի տվել ծեր կնոջը, իսկ կնոջը սկզբում ժամանակավոր կացարան տրամադրել Արմավիր քաղաքում, այնուհետև` Զվարթոնցում, և հիմա էլ` Արզումանյան 10 հասցեում: Այս հասցեի բնակարանը, որտեղ մենք հանդիպեցինք կնոջը, վաճառված է մեկ ուրիշի, ինչը դատարանով հաստատված է ու այժմ տիկին Գոհարը ամեն րոպե սպասում է, որ կգան ու իրեն բնակարանից դուրս կվտարեն:

Ինչ վերաբերում է նախկին ոստիկանի գործողություններին, ապա դրա դեմ տիկին Գոհարն ու իր փաստաբան, Փաստաբանների պալատի անդամ Նարինե Ռշտունին դիմել են իրավապահ մարմիններին, սակայն արդեն մի քանի տարի ձգվող քաշքշոցներից հետո էլ Սերգո Ամիրխանյանին չեն պարտավորեցրել փոխհատուցել կնոջից յուրացրած գումարները:

Նարինե Ռշտունին մեզ հետ զրույցում ասաց, որ այդ ժամանակ հարուցված քրեական գործը բավարար հիմքեր չլինելու պատճառաբանությամբ 2011-ին կարճվեց, սակայն հետո, նրա խոսքով, Երևան քաղաքի դատախազությունը միջնորդություն ներկայացրեց Գլխավոր դատախազին` քրեական գործը կարճելու մասին որոշումը վերացնելու վերաբերյալ: Գլխավոր դատախազ Աղվան Հովսեփյանը, ըստ Նարինե Ռշտունու, իր որոշմամբ ցուցում է տվել նախաքննություն իրականացնող ոստիկանության Արաբկիրի քննչական բաժնին` հստակեցնել և ստուգել, թե Սերգո Ամիրխանյանն ունեցե՞լ է արդյոք խնայողություններ, թե՞ ոչ: «Սակայն ոստիկանության Արաբկիրի քննչական բաժինը նորից կարճում է գործը և այդպես էլ չի պարզում այդ ամենը և հավատում են Սերգո Ամիրխանյանի ասածներին, թե այդ գումարներն իրենն են եղել», -փոխանցեց Նարինե Ռշտունին` միևնույն ժամանակ նկատելով, թե կան գրավատներից ստացված կտրոններ, որոնց վրա նշված է, որ այս կամ այն գումարը վերցնելու համար Ամիրխանյանը իրենց մոտ ապրանքներ է գրավ դրել:

83-ամյա խաբված կինը, սակայն, պնդում է, թե ոստիկանությունը հովանավորում է իր նախկին աշխատակցին ու գործին ընթացք չի տալիս: Նրա փոքրիկ կացարանի երկու սեղաններն ու լուսամուտագոգը լի են տարբեր փաստաթղթերով ու Հայաստանի նախագահից մինչև Մարդու իրավունքների պաշտպանին ուղարկված նամակների պատճեններով: Բոլորին ուղղված տիկին Գոհարի նամակները մնացել են անպատասխան:

«Չեմ կարող ասել, թե ինչու գործը կարճեցին, որովհետև այս պարագայում եթե ոչ խարդախություն է, ապա գոնե յուրացում է: Այսինքն Սերգո Ամիրխանյանը յուրացրել է նրան վստահված տիկնոջ գումարները», -նկատեց Նարինե Ռշտունին: Փաստաբանն այժմ քրեական գործը կարճելու մասին որոշումը վերացնելու վերաբերյալ միջնորդություն է ներկայացրել Արաբկիր և Քանաքեռ-Զեյթունի ընդհանուր իրավասության դատարան և առաջիկա օրերին որոշման մասին հայտնի կլինի:

Անելանելի վիճակում հայտնված կինն սպառնում է բարձրաձայնել այն պետական գաղտնիքների մասին, որոնք իրեն հայտնի են եղել ԱԱԾ-ում աշխատած տարիներին: «Հասկանո՞ւմ ես` ես լավ ապրել եմ, ունեցել եմ ամեն ինչ, բայց այդ սրիկան խաբել է ու տարել իմ ունեցածը, ես ոնց կարող եմ հիմա ապրել», -անընդհատ կրկնում էր հուսահատված կինը: