Ձեր վստահելի աղբյուրը

Հայաստանի նախագահի թեկնածու Պարույր Հայրիկյանի նախընտրական շտաբը կատարվածի վերաբերյալ հայտարարություն կանի վաղը, «Սուրբ Գրիգոր Լուսավորիչ» բժշկական կենտրոնում կայանալիք ասուլիսում: Այդ մասին Panorama.am-ի թղթակցի հետ զրույցում տեղեկացրեց Հայրիկյանի շտաբի պետ Մանյա Այվազյանը:

«Մենք գնահատականներ կտանք վաղը հիվանդանոցում կայանալիք ասուլիսում: Այս պահին ուղղակի մեկ բան կարող ենք ասել` ձեռք բարձրացնելով Հայրիկյանի վրա, իրենք ձեռք են բարձրացրել մեր պետականության, մեր անկախության, մեր ազատության վրա», -փոխանցեց տիկին Այվազյանը:

Հարցին, թե հնարավո՞ր է Պարույր Հայրիկյանը դիմի Սահմանադրական դատարան անհաղթահարելի խոչընդոտի պատճառով ընտրությունները հետաձգելու համար, տիկին Այվազյանը պատասխանեց. «Եթե այսօր ԿԸՀ-ն նման հայտարարություն չանի, մենք ասուլիսի ժամանակ կհայտարարենք մեր ասելիքը»:

Սահմանադրության 52 հոդվածը սահմանում է. «Հանրապետության Նախագահի թեկնածուներից մեկի համար անհաղթահարելի խոչընդոտներ առաջանալու դեպքում Հանրապետության Նախագահի ընտրությունը հետաձգվում է երկշաբաթյա ժամկետով»: Վարդան Այվազյանը Panorama.am-ին հայտնել էր, որ անհաղթահարելի խոչընդոտներ ճանաչում է Սահմանադրական դատարանը: Սահմանադրության 100-րդ հոդվածի 4-րդ կետով նախատեսված գործերի քննությունը գլխում նշվում է, որ Սահմանադրության 100-րդ հոդվածի 4-րդ կետով նախատեսված` իրենց առնչվող հարցերով սահմանադրական դատարան կարող են դիմել Հանրապետության Նախագահի թեկնածուները:

Ավելի վաղ Panorama.am-ը տեղեկացրել էր, որ հունվարի 31-ին, ժամը 23.30-ի Տպագրիչների փողոցի թիվ 9 շենքի բակում անհայտ անձը հրազենից կրակ է արձակել ՀՀ նախագահի թեկնածու Պարույր Հայրիկյանի վրա` աջ անրակի շրջանում պատճառելով հրազենային վնասվածք: Պ. Հայրիկյանը տեղափոխվել է «Սուրբ Գրիգոր Լուսավորիչ» բժշկական կենտրոն: Փաստի առթիվ հարուցվել է քրեական գործ ՀՀ քրեական օրենսգրքի 34-305 հոդվածի հատկանիշներով (պետական, քաղաքական կամ հասարակական գործչի սպանության փորձ): Ստեղծվել է համատեղ օպերատիվ-քննչական խումբ, որում ընդգրկվել են ՀՀ ոստիկանության և ԱԱԾ աշխատակիցներ: Դեպքի վայրի զննությամբ հայտնաբերվել է 7.62 մմ տրամաչափի 1 գնդակ: Նշանակվել են համալիր փորձաքննություններ: Ձեռնարկվում են անհրաժեշտ օպերատիվ-հետախուզական և քննչական միջոցառումներ հանցագործություն կատարած անձի ինքնությունը պարզելու և նրան հայտանաբերելու ուղղությամբ: Քննությունը վարում է ՀՀ ԱԱԾ քննչական վարչությունը: