Ձեր վստահելի աղբյուրը

Նախընտրական քարոզարշավի ընթացքի շուրջ Panorama.am-ը զրուցեց ԱԺ նախկին նախագահ, ՀՀԿ շտաբի անդամ Սամվել Նիկոյանի հետ:

-Պարոն Նիկոյան, հաշվի առնելով նախօրեին նախագահի թեկնածուներից Պարույր Հայրիկյանի ուղղությամբ արձակված կրակոցները, ինչպե՞ս կգնահատեք ստեղծված իրավիճակը: Տարաբնույթ կարծիքներ հնչեցին այն մասին, որ իշխող ՀՀԿ-ի թեկնածուի կարգախոսն անմիջականորեն կապված է ապահովության հետ, սակայն քարոզարշավի հենց մեկնարկում նման միջադեպ է գրանցվում:

-Եթե նույնիսկ պարզվի, որ տեղի ունեցածը կենցաղային հողի վրա է եղել, միևնույն է՝ հետևանքները քաղաքական են: Իմ համոզմամբ, այդ կրակոցներն ուղղված էին ոչ թե նախագահի թեկնածուի ուղղությամբ, այլ ընտրական պրոցեսների դեմ: Դեռ հայտնի չեն հանցագործության հեղինակները, սակայն ակնհայտ է դրա նպատակը՝ ստվեր նետել ներքաղաքական դաշտում ստեղծված հանդուրժողական իրավիճակի վրա և փորձ կատարել խաթարել խաղաղ մթնոլորտը: Փորձ է կատարվում անվստահության միջավայր ստեղծել ու ստվեր նետել նախընտրական գործընթացների վրա: Կան ուժեր, անհատներ, որոնց կարծես թե ձեռնտու չէ ընտրությունների խաղաղ ընթացքը:

-Ինչո՞ւ են ՀՀԿ թեկնածուի հանդիպումները տեղի ունենում փակ դահլիճներում, որտեղ սահմանափակ թվով մարդիկ կարող են ներկա գտնվել: Տեղեկատվություն կա, որ այդ հանդիպումների ժամանակ հիմնականում ՀՀԿ-ականներ ու պետական կառույցների ներկայացուցիչներ են լինում:

-ՀՀԿ թեկնածուն հանդիպումներ է ունենում նաև ՀՀԿ ակտիվի հետ, սակայն դա չի նշանակում, որ հանդիպումները միայն այդ ձևաչափում են: Ինչ վերաբերվում է փակ դահլիճներում հանդիպումների անցկացմանը, ապա նշեմ, որ հանդիպումները պլանավորվում ու կազմակերպվում են հաշվի առնելով ինչպես եղանակային պայմանները, այնպես էլ տվյալ համայնքում մեծ հանդիպումներ կազմակերպելու համար առկա պայմանները: Երկրորդ, նախագահը հանդիպման վայր գնալուց կամ հանդիպումն ավարտելուց հետո անմիջական շփումներ է ունենում տեղի բնակիչների հետ, պատասխանում բարձրացված հարցերին:

-Օրեր առաջ տեղեկատվություն շրջանառվեց, որ Կապանում ՀՀԿ նախագահի թեկնածուի հանդիպմանը մասնակցելու համար այլ համայնքներից ևս ավտոբուսներով մարդիկ են բերել: Արդյո՞ք ՀՀԿ-ն իր թեկնածուի հետ հանդիպման համար մարդ հավաքելու խնդիր ունի:

-Հայաստանում 900-ից ավելի համայնքներ կա և բնականաբար նախագահի թեկնածուներն ի վիճակի չեն լինել բոլոր համայնքներում ու տեղում ներկայացնել նախընտրական ծրագրերը: Իհարկե այդ հանդիպման հետ կապված նման մանրամասների չեմ տիրապետում, սակայն նշեմ, որ դրանում ոչ մի խնդիր չեմ տեսնում: Խնդիրը ոչ թե «մարդ ապահովելն է» այլ այն, որ նախագահը չի հասցնում բոլոր համայնքներում լինել, դրա համար էլ հարևան համայնքների բնակիչներն օգտագործելով առիթը գալիս են ներկա գտնվելու ՀՀԿ-ի թեկնածուի հետ հանդիպումներին ու հնարավորություն ստանալու բարձրացնել իրենց համայնքներում առկա խնդիրներ՝ ակնկալելով նախագահի թեկնածուի լուծումները: Դրանից զատ, նկատենք, որ նախագահի այցը ցանկացած մարզ, շրջան քաղաքական կարևոր միջոցառում է և յուրաքանչյուր քաղաքացի փորձում է իրեն հուզող հարցերի պատասխանը տեղում ստանալ:

-Ինչպե՞ս խորհրդարանական, այնպես էլ նախագահական ընտրությունների ընթացքում նախընտրական քարոզարշավի հիմնական բեռն իր վրա է վերցրել ՀՀԿ ղեկավար: Ինչո՞վ է դա պայմանավորված, ինչո՞վ են զբաղված թիմի անդամները:

-Ե՛վ խորհրդարանական ընտրությունների, և՛նախագահական ընտրությունների ժամանակ ՀՀԿ-ում ձևավորվում են քարոզչական խմբեր, որոնք քարոզչական գործունեություն են ծավալում տարբեր մարզերում: Այս նախագահական ընտրություններին ևս, ստեղծվել են քարոզչական խմբեր, որոնք տարբեր համայնքներում ներկայացնում են ՀՀԿ-ի թեկնածուի նախընտրական ծրագիրը, քննարկում դրանց լուծմանը հասնելու ուղիները: Մյուս կողմից, բնական է, որ նախագահական ընտրությունների հիմնական ծանրությունը Սերժ Սարգսյանի ուսերին է, քանի որ հասարակությունն ակնկալում է հենց նրանից լսել իրենց հետաքրքրող հարցերի պատասխանը ու հայտնել իր մտահոգություններն այս կամ այն հարցի շուրջ:

- ՀՀԿ նախընտրական տեսահոլովակներից հետո կարծիքներ հնչեցին, որ ՀՀԿ-ն այնպես է իրադարձությունները ներկայացնում, որ կարծես վերջին երկու տասնամյակում գրանցված բոլոր հաջողությունների հեղինակը միայն ինքն է:

-ՀՀԿ-ի շատ ներկայացուցիչներ իսկապես կանգնած են եղել պետականաշինության, բանակաշինության ակունքներում և տարբեր իրավիճակներում պատասխանատվություն կրել երկրում տեղի ունեցող իրավիճակների համար: Իսկ 1999 թվականից կառավարության բոլոր ղեկավարները հանրապետականներ են եղել և մենք պատասխանատվություն ենք կրել ինչպես բացթողումների, այնպես էլ տարբեր ոլորտներում արձանագրված առաջընթացի համար: Սակայն մենք հարգում ենք մեր այն գործընկերներին, ում հետ ժամանակի ընթացքում միասնական ենք գործել ու միասին նպաստել երկրի զարգացմանը: