Ձեր վստահելի աղբյուրը

Սահմանադրագետ Վարդան Այվազյանն այն կարծիքին է, որ Անդրիաս Ղուկասյանի առողջական վիճակի վատացումը չի կարող որպես անհաղթահարելի խոչընդոտ ճանաչվել նախագահական ընտրությունների հետաձգման համար: Panorama.am-ի զրուցակիցը համարում է, որ Ա. Ղուկասյանի հայտարարած հացադուլի պահանջը «բացարձակ անտրամաբանական ու հակասահմանադրական է»:

Հիշեցնենք, որ ՀՀ նախագահի թեկնածու Անդրիաս Ղուկասյանը Կենտրոնական ընտրական հանձնաժողովից պահանջում էր անվավեր ճանաչել ՀՀ նախագահի թեկնածու Սերժ Սարգսյանի գրանցումը: ԿԸՀ-ն չբավարարեց նրա պահանջը, ինչի համար էլ թեկնածուն հունվարի 21-ին անժամկետ հացադուլ հայտարարեց:
Այսօր Ա. Ղուկասյանի ինքնազգացողությունը վատացել է:

«Նրա պահանջը անտրամաբանական ու հակասահմանադրական է, և քանի որ այդ պահանջի հետևանքով նրա առողջական վիճակի վատացումը, կարծում եմ, որ չպետք է դիտվի անհաղթահարելի խոչընդոտ: Բացի այդ առողջական վիճակի վատթարացումն իր կամքից անկախ չի եղել»,-ասաց Վ. Այվազյանը:

Ամեն դեպքում, սահմանադրագետը հիշեցրեց, որ անհաղթահարելի խոչընդոտ լինել-չլինելը միայն ու միայն որոշում է Սահմանադրական դատարանը:

«Մենք ինչքան էլ դատողություններ անենք, դա որոշում է Սահմանադրական դատարանը»,-ասաց Այվազյանը:

Սահմանդրության 52 հոդվածը սահմանում է. Հանրապետության Նախագահի թեկնածուներից մեկի համար անհաղթահարելի խոչընդոտներ առաջանալու դեպքում Հանրապետության Նախագահի ընտրությունը հետաձգվում է երկշաբաթյա ժամկետով: Անհաղթահարելի ճանաչված խոչընդոտները չվերանալու դեպքում նշանակվում է նոր ընտրություն, իսկ քվեարկությունն անցկացվում է նշված երկշաբաթյա ժամկետը լրանալուց հետո՝ քառասուներորդ օրը: Մինչև քվեարկության օրը թեկնածուներից մեկի մահվան դեպքում նշանակվում է նոր ընտրություն, իսկ քվեարկությունն անցկացվում է նոր ընտրություն նշանակելուց հետո՝ քառասուներորդ օրը:

Սահմանադրության 100 հոդվածի 4-րդ կետի համաձայն. «Սահմանադրական դատարանն օրենքով սահմանված կարգով՝
անհաղթահարելի կամ վերացած է ճանաչում Հանրապետության Նախագահի թեկնածուի համար առաջացած խոչընդոտները»:

ՀՀ օրենքը Սահմանադրական դատարանի մասին օրենքի Հոդված 75-ը Սահմանում է.

Սահմանադրության 100-րդ հոդվածի 4-րդ կետով նախատեսված գործերի քննությունը (Հանրապետության Նախագահի թեկնածուի համար առաջացած խոչընդոտներն անհաղթահարելի կամ վերացած ճանաչելու վերաբերյալ գործերի քննությունը)
1. Սահմանադրության 100-րդ հոդվածի 4-րդ կետով նախատեսված` իրենց առնչվող հարցերով սահմանադրական դատարան կարող են դիմել Հանրապետության Նախագահի թեկնածուները:

2. Հանրապետության Նախագահի թեկնածուի համար առաջացած խոչընդոտներն անհաղթահարելի ճանաչելու հարցով սահմանադրական դատարան կարելի է դիմել ոչ ուշ, քան Հանրապետության Նախագահի ընտրության օրվանից ութ օր առաջ։
3. Սույն հոդվածում նշված գործերի դատաքննությունն իրականացվում է բանավոր ընթացակարգով:
4. Սահմանադրական դատարանը գործն ընդունում է քննության, գործը քննում և գործով որոշում է ընդունում դիմումն ստանալուց հետո` չորսօրյա ժամկետում։

5. Սահմանադրական դատարանը կարող է անհաղթահարելի ճանաչել այն խոչընդոտները, որոնք արդեն իսկ առաջացել են և տվյալ թեկնածուից անկախ պատճառներով անհնարին են դարձնում նրա հետագա մասնակցությունն ընտրական գործընթացներին: