Ձեր վստահելի աղբյուրը

Ադրբեջանի նախագահ Իլհամ Ալիևը կարգադրությանը է ստորագրել, որով զրկել է Ադրբեջանում հասարակական մեծ արձագանք ստացած «Քարե երազներ» գրքի հեղինակ ժողովրդական գրող, մշակույթի վաստակավոր գործիչ Ակրամ Այլիսլիին պատվավոր կոչումից ու նախագահական կրթաթոշակից: Տեղեկատվությունն այս մասին տարածել են ադրբեջանական լրատվամիջոցները, հղում անելով համապատասխան կարգադրությանը:

Կարգադրության տեքստում նշվում է, թե նախագահի որոշման համար հիմք է հանդիսացել «պետական կառույցների, հասարակական կազմակերպությունների և բազմաթիվ քաղաքացիների դիմումները»:

Հիշեցնենք, «Քարե երազներ» գրքում, որը տպվել էր դեռևս 2012 թ-ի դեկտեմբեր ամսին «Ժողովուրդների բարեկամություն» ամսագրի համարում, հեղինակը ականատեսների վկայությամբ վերարտադրում է Ադրբեջանի ԽՍՀ տարածքում հայաբնակ բնակչության նկատմամբ ադրբեջանցիների կողմից 1919թ-ին, ինչպես նաև 1988-90 թթ-ին իրականացված վայրագությունները:
Վերջին շաբաթվա ընթացքում ադրբեջանական հասարակական և քաղաքական շրջանակները նախադեպը չունեցող արշավ են սկսել գրողի նկատմամբ, նրան մեղադրելով «ադրբեջանցիներին և թուրքերին խայտառակող ու նսեմացնող» գիրք գրելու, «դավաճանության», «սադրանքի» և այլ հանցագործությունների մեջ: Երիտասարդ ակտիվիստները շրջափակել էին գրողի տունը, մի շարք մտավորականներ հնչեցրել էին պետական պարգևները հետ վերցնելու, երկրից վտարելու կոչեր: Խորհրդարանում առաջարկել էին զրկել գրողին քաղաքացիությունից, պատգամավորներից մեկն անգամ առաջարկել է կտրել նրա ականջը, իսկ իշխանամետ մտավորականները խորհուրդ էին տվել հրապարակայնորեն այրել նրա բոլոր գրքերը: Նախօրեին տեղեկատվություն էր տարածվել, թե աշխատանքից ազատել են Ադրբեջանի հարկային գերատեսչությունում աշխատող գրողի որդուն և կնոջը:

Այսօր «Թուրան» գործակալությանը տրամադրած հայտարարությունում Ակրամ Այլիսլին գրում է, թե իր նկատմամբ իրականացվող արշավն «աննախադեպ է Ադրբեջանի հասարակական կյաքնում»:

«Ես գնահատում են այն որպես իշխանությունների կողմից խոսքի ազատ արտահայտման ուղղված աննախադեպ անհանդուրժողականության դրսևորում», - ասված է հայտարարությունում:

Այս կապակցությամբ գրողը հայտնել է, թե ինքը դիմել է Բաքվում արտերկրյա դիվանագիտական ներկայացուցչույթյուններին , մասնավորապես ԱՄՆ-ի, Մեծ Բրիտանիայի, Նիդերլանդների, Ավստրիայի, Բելգիայի դեսպանատներ, ինչպես նաև ԵՄ, ԵԱՀԿ, ԵԽ գրասենյակներ վեպը կարդալու և դրա վերաբերյալ կարծիք հայտնելու խնդրանքով: