Ձեր վստահելի աղբյուրը

Այս տարի փետրվարի 7-ը` Մեծ պահքին նախորդող հինգշաբթի օրը, Վարդանանց սուրբ նահատակների հիշատակության տոնն է: 451 թվականի մայիսին Ավարայրի ճակատամարտում հայրենիքի, հայ եկեղեցու և քրիստոնեական հավատի պահպանման համար նահատակված Վարդանանց զորավարներն ու 1036 մարտիրոսներն Առաքելական եկեղեցու մեծագույն սրբերից են:
Արդեն չորրորդ տարին անընդմեջ Երևանի պետական համալսարանը, ի դեմս Մշակույթի կենտրոնի, Մայր Աթոռ Սուրբ Էջմիածնի հետ համատեղ կազմակերպում են Վարդանանց նահատակներին նվիրված միջոցառում, որը հայրենասիրության և ոգու առկայության դրսևորում է: Մինչ միջոցառման սկսելը Մայր տաճարում կմատուցվի պատարագ` Սուրբ Վարդանանց հիշատակին:

Միջոցառումը Տերունական աղոթքով կսկսի Ծայրագույն պատրիարք Ն.Ս.Օ.Տ.Տ. Գարեգին Բ Ամենայն հայոց կաթողիկոսը, ինչից հետո բացման խոսքով հանդես կգա ԵՊՀ ռեկտոր Արամ Սիմոնյանը:

Qahana.am կայքը հայտնում է, որ այսօր ժամը 10.30-ին բոլոր եկեղեցիներում Ս. Պատարագ կմատուցվի: Փետրվարի 7-ին Վարդան, Գարեգին, Մհեր, Սուրեն, Գոռ, Խաժակ, Շուշանիկ, Սահականույշ, Հմայակ, Համազասպ, Ղևոնդ, Հովսեփ, Եղիշե, Սահակ, Մեսրոպ և բոլոր այն մարդկանց, ովքեր չունեն անվանակոչության օր, շնորհավորում են անվանակոչության տոնի առթիվ:

451 թվականի մայիսին, Ավարայրի ճակատամարտում, հայրենիքի, հայ եկեղեցու և քրիստոնեական հավատի պահպանման համար նահատակված Վարդանանց զորավարներն ու 1036 մարտիրոսները Հայաստանյայց Առաքելական Եկեղեցու մեծագույն սրբերից են: Իրենց նահատակությամբ նրանք հաստատեցին հայ ժողովրդի ապրելու կամքը և լինելիության իրավունքը: Հայաստանում քրիստոնեություն ընդունելուց ի վեր Հայ եկեղեցին սերտորեն կապված է եղել հայրենիքի պաշտպանության գործին: Դրա վառ օրինակը Վարդանանց պատերազմն է: Պարսից զորքերի դեմ մղված պատերազմում հայ մարտիկների կողքին էր Հայոց եկեղեցին: Հովսեփ կաթողիկոսի և Ղևոնդ Երեցի առաջնորդությամբ: Մարտից առաջ հայ հոգևորականները ոչ միայն քաջալերում էին զորքին մակաբայեցիների օրինակով, այլև մկրտության և Սբ. Պատարագի խորհրդով առավել ամրապնդում էին նվիրյալների հավատն ու ոգին: «Եվ սեղան կանգնեցնելով` ամենասուրբ խորհուրդը կատարեցին, պատրաստեցին նաև ավազան, և եթե զորքի բազմության մեջ չմկրտված մարդ կար, ամբողջ գիշերը մկրտեցին. Եվ առավոտյան Սբ. հաղորդություն ընդունեցին», - գրում է Եղիշե պատմիչը Վարդանանց պատերազմից առաջ կատարվածի մասին: