ՀՀՇ-ն թող գնա իր ճանապարհով, իսկ ՀԱԿ-ը կմնա ՀԱԿ. Ինչպե՞ս է Գիմիշյանը պատկերացնում ապագա Կոնգրեսը
Նախկինում Հայ Ազգային կոնգրեսի մաս կազմած «Քրիստոնեաժողովրդական վերածնունդ» կուսակցության նախագահ Սոս Գիմիշյանը իրեն չի պատկերացնում ՀՀ առաջին նախագահ Լևոն Տեր-Պետրոսյանի պատկերացրած կուսակցության կազմում: Փոխարենը մտադիր է պահպանել ՀԱԿ-ը` որպես կուսակցությունների միասնական դաշինք:
Panorama.am-ի թղթակցի հետ զրույցում Գիմիշյանն ասաց, որ ինքն այդ նախաձեռնությանը լավ է վերաբերում, նույնիսկ ուրախ է: «Ես լավ եմ վերաբերվում, որ Լևոն Տեր-Պետրոսյանը ՀՀՇ կուսակցությունը մեկ երկու կուսակցության հետ, կարծում եմ ոչ ավելի կլինեն, նոր կուսակցություն ստեղծեն միասնական: Ես պատկերացնում եմ` մյուս քաղաքական ուժերը, որոնք Հայ Ազգային կոնգրեսի հիմքն էին կազմում անդամներն էին, կփորձի պահպանել Հայ Ազգային կոնգրեսը մյուս կուսակցություններով` առանց ՀՀՇ-ի ու մնացած մի քանի կուսակցություններով», -փոխանցեց պարոն Գիմիշյանը:
Հայ Ազգային կոնգրեսի ստեղծման գաղափարը, որը Լևոն Տեր-Պետրոսյանինն է եղել, Գիմիշյանն ասում է, որ իրեն շատ է դուր գալիս ու դա ինքն ուզում է պահպանել, ասենք` «ՀԺԿ-ի, Գառնիկ Մարգարյանի կուսակցության, ԺՈւԿ-ի հետ, Վաղարշակ Հարությունյանի կուսակցության, Կանաչների և այլն, այսինքն նրանք, ովքեր չեն համաձայնի ՀՀՇ-ի հետ միասին նոր կուսակցություն ստեղծել»:
Գիմիշյանի խոսքով, նրանք գնում են իրենց ճանապարհով, իսկ ՀԱԿ-ը կմնա ՀԱԿ: «Այսպես եմ պատկերացնում ես, ՀԱԿ-ը ունի խմբակցություն, դա կմնա, ՀԱԿ-ը որպես դաշինք կմնա, իսկ նրանք թող կուսակցություն ստեղծեն, բարի», -նկատեց Գիմիշյանը:
Նրա մեծ ցանկությունն է, որ Հայ Ազգային կոնգրեսը երկար տարիներ գործեր քաղաքական դաշտում: «Եթե այդ գաղափարը մեզ հաջողվի իրագործել, հույս ունեմ գնացած ուժերը հետ կգան, նոր ուժեր կմիանան մեզ: Կուզենայի, որ ՀԱԿ-ը երկար տարիներ գործեր քաղաքական դաշտում: Առաջնորդները գալիս գնում են, բայց քաղաքական ուժերը պետք է սերունդների առջև իրենց պարտքը կատարեն»,- նկատեց Գիմիշյանը` առայժմ պատկերացում չունենալով, թե ինչքանով կհաջողվի դա իրենց:
ՀԱԿ-ը պահպանելու հարցում նշված քաղաքական ուժերի նախնական տրամադրությունները հուսադրող են. «Ես կարծում եմ շատ չեն լինի այն ուժերը, որոնք կուզենան ՀՀՇ-ի հետ համատեղ նոր քաղաքական ուժ ձևավորել»:
ՀԱԿ առաջնորդ Լևոն Տեր-Պետրոսյանը օրերս իր հարցազրույցում տեղեկացրել էր, որ ՀԱԿ-ում քննարկվում է մեկ միասնական կուսակցություն ստեղծելու գաղափարը:
Լրահոս
Տեսանյութեր
ՈՒՂԻՂ. Մեկնարկեց ՍԴ նիստը, օրակարգում երկու միջազգային համաձայնագրի սահմանադրականության հարցերն են
