Ձեր վստահելի աղբյուրը

Ադրբեջանական «APA» գործակալությունում Եվրոպայի խորհրդի խորհրդարանական վեհաժողովի (ԵԽԽՎ) Մոնիտորինգի հանձնաժողովի Հայաստանի հարցով համազեկուցող Աքսել Ֆիշերի որոշ հայտարարություններ մտահոգություններ են առաջացրել հայկական կողմի մոտ, և ԵԽԽՎ հայաստանյան պատվիրակության անդամ Նաիրա Զոհրաբյանը փետրվարի 7-ին նամակ է գրել համազեկուցողին:

Panorama.am-ի թղթակցի հետ զրույցում, տիկին Զոհրաբյանն ասաց, որ ինքը նամակով խնդրել է պարզաբանել արդյո՞ք ինքն է այդ հայտարարությունների հեղինակը, թե՞ հերթական անգամ ադրբեջանական ԶԼՄ-ները ապատեղեկատվություն են տարածում` խեղաթյուրելով զրուցակիցների մտքերը:

Նշենք, որ օրերս ադրբեջանական «APA» գործակալությունը մեջբերել էր Ֆիշերի հայտարարությունը, որտեղ խոսվում էր այսպես կոչված Հայաստանի «զավթիչ» լինելու մասին և այն մասին, որ Ստեփանակերտի օդանավակայանի բացումը մտահոգիչ է իր համար:

«Մշտապես ձեռնպահ եմ մնում ադրբեջանական լրատվամիջոցներում հրապարակված նյութերին արձագանքելը, որովհետև որպես կանոն դրանք բացարձակ ապատեղեկատվություն են լինում և որպես կանոն, կոնտեքստից կտրված, խեղաթյուրված: Այդուհանդերձ այն հրապարակումը, որը վերագրվում է ԵԽԽՎ Մոնիտորինգի հանձնաժողովի Հայաստանի հարցով համազեկուցող Աքսել Ֆիշերին մտահոգության տեղիք տալիս է», -մեզ հետ զրույցում ասաց Նաիրա Զոհրաբյանը:

ԵԽԽՎ համազեկուցող Աքսել Ֆիշերին ուղղված նամակում տիկին Զոհրաբյանը խնդրել է պարզաբանել` արդյոք ադրբեջանական լրատվամիջոցում իրեն վերագրված հայտարարությունների հեղինակն իսկապես ինքն է: Իսկ եթե պարզվեց, որ Ֆիշերը նման խոսքեր ու մտքեր չի արտահայտել, ապա եվրոպացի դիվանագետը, ըստ Զոհրաբյանի, պետք է անպայմանորեն հերքում տա:

«Այլապես եթե Ֆիշերը կպնդի, որ այդ լրատվամիջոցում հրապարակված ու իրեն վերագրված հայտարարությունը ու ձևակերպումները, որոնք կրկնում են ադրբեջանական քարոզչությանը, իրենն են, իմ հաջորդ քայլը լինելու է այն, որ ԵԽԽՎ-ում բարձրացնելու եմ նրա` Հայաստանի հարցով համազեկուցող լինելու նպատակահարմարությունը, որովհետև նման կողմնորոշումներ ունեցող գործիչը չի կարող իր գնահատականներում լինել անաչառ», -հավելեց Զոհրաբյանը:

Այդուհանդերձ, ԱԺ պատգամավորը կասկածում է, որ ԵԽԽՎ համազեկուցողը նման հայտարարություններ կարող է անել, քանի որ նա ղարաբաղյան հիմնախնդրի մասին երբևէ նման գնահատականներ չի հնչեցրել:

«Բացի այդ, որպես Հայաստանի հարցով համազեկուցող, հույս ունեմ, որ նա այնքան խոհեմություն և սթափություն ունի` հասկանալու, որ նման հայտարարությունները ուղղակիորեն կարող են վտանգել նրա` համազեկուցող լինելու հարցը: Բնականաբար, հայկական կողմը, եթե այդ հայտարարությունները իրականությանը համապատասխանում են, պետք է բարձրացնի այդ հարցը», -ասաց ԱԺ պատգամավորը` նշելով, որ իր և ԵԽԽՎ-ում հայկական պատվիրակության հետագա քայլերը պայմանավորված կլինեն Ֆիշերի պատասխանով: