Ձեր վստահելի աղբյուրը

 ՀԱԿ-ը պատրաստվում է մարտի 22-ին հիմնադիր համագումար անցկացնել: Փաստորեն` նախորդ նախագահական ընտրություներից հետո հետընտրական զարգացումների բուռն շրջանում կազմավորված Հայ ազգային կոնգրեսը կփոխի կարգավիճակը՝ դառնալով կուսակցություն: Թե ինչ ճակատագիր է սպասվում Կոնգրեսի անդամ կուսակցություննրին, դրանցից որն է պատրաստ ձուլվել այդ կուսակցությանը՝ կազմալուծվելով, որը դաշինք կդառնա և որը կլքի Կոնգրեսը, իրադարձություների զարգացումները երկար սպասել չեն տա: Մյասնիկ Մալխասյանը չի պատրաստվում փոխել իր կարգավիճակը Կոնգրեսում ՝ անկախ դրա հին կամ փոփոխվող կարգավիճակից: Ասում է` «կուսակցական չեմ դառնա, կլինեմ համակիր անդամ»: Panorama.am-ին տված հարցազրույցում «Քաղբանտարկյալ» ՀԿ ղեկավար Մյասնիկ Մալխասյանն իր կարծիքն է հայտնել ՀԱԿ-ի՝ կուսակցություն դառնալու նպատակների և հնարավոր հեռանկարի մասին:

-ՀԱԿ-ի` կուսակցություն դառնալու մասին Լևոն Տեր-Պետրոսյանը հանգամանալից հարցազրույց է տվել, նրա պատասխանները շատ սպառիչ են: Ես եղել և մնում եմ ՀԱԿ-ի համակիր և հիմա էլ Կոնգրեսի համակիր եմ: Կարծում եմ՝ ճիշտ քայլ է Կոնգրեսի` կուսակցություն դառնալը և ամուր կառույց պետք է դառնա, որը հայ իրականության մեջ, քաղաքական դաշտում իր հաղթաթուղթը կունենա և դրանով կհարստացնի մեր քաղաքական մշակույթը և վերջապես մրցակցային պայմաններ կստեղծի, ինչից կշահի մեր ժողովուրդը: Ես միշտ կիսել եմ պարոն Տեր-Պետրոսյանի տեսակետը, բայց որպես համակիր, ոչ թե կուսակցության անդամ:

-Ձեր վերջին հարցազրույցում ասել էիք, որ Կոնգրեսում չկան տարաձայնություններ, դրանք հնարովի են: Նույնը պնդում էին նաև ՀԱԿ որոշ անդամներ, մինչդեռ երեկվա հարցազրույցում ՀԱԿ առաջնորդ Լևոն Տեր-Պետրոսյանը չի թաքցրել, որ Կոնգրեսի ներսում իրոք կան լուրջ տարաձայնություններ՝ համարելով որ դա բնական է, քանզի ժամանակի ընթացքում փոխվել են որոշ ուժերի, գործիչների պահանջներն ու հայացքները:
-Ես չեմ հիշում, որ այդպիսի բան եմ ասել: Ես ասել եմ` միշտ էլ հակասություններ կան և ՀԱԿ-ի մեծությունը նրանում է, որ նա կոնկրետ հակասություններով է առաջնորդվում և առաջանում: Դա ՀԱԿ-ի կարևոր մշակույթն է, որ նա չի խուսափում տարակարծություններից: ՀԱԿ-ից, այո, ոչ մեծ քանակի ուժեր են դուրս եկել: ՀԱԿ-ը հիմնականում անկուսակցականների բանակ է: Ինչ վերաբերում է առաջնորդի հայտարարություններին՝ կարծում եմ այդտեղ ավելորդ մեկնաբանությունների կարիքը չկա:

-Տեսակետներ կան, որ իրականում Կոնգրեսի կարգավիճակը փոխելու հիմնական պատճառներից մեկը հենց այս տարակարծությունների են: Արդյո՞ք դրանով կհարթվեն այդ տարակարծությունները:
-Կարծում եմ, այդ հացի պատասխանը ես չէ, որ պետք է տամ, քանի որ ես ՀԱԿ-ում մնում եմ որպես համակիր: Այն ժամանակ, երբ դեռ նոր նոր կազմավորվում էր Կոնգրեսը, Լևոն Տեր-Պետրոսյանն ասել է՝ ինքը չի բացառում, որ կգա մի ժամանակ, որ Կոնգրեսը կվերածվի կուսակցության:Անցած տարիների ընթացքում ՀԱԿ-ը բավական լուրջ դերակատարություն է ունեցել մեր հայ իրականության մեջ: Այն քաղաքացիական նախաձեռնությունները, որոնք առաջընթաց գրանցեցին:Հեռուստատեսությամբ էլ մենք տեսել ենք առաջընթաց՝ ազատ խոսքի արտահայտման հետ կապված, կարծում եմ, որ այդպիսի սկզբունքային քաղաքական ուժերը շատ կարևոր են մեր երկրի, մեր պետականության համար: ՀԱԿ-ը այս 4 տարիների ընթացքում բավական կորուստների գնով ձևավորել է այդ մշակույթը, կարծում եմ պատմությունը կգնահատի դա: Եվ դրանից մեր հասարակությունը կորուստներ, զոհեր տալով նաև շահել է: Հիմա էլ կան քաղաքական մտածողներ, քաղաքական գործիչներ, մտավորականներ, որոնք կամա թե ակամա գնահատվում են:

-Կարծիք կա, որ Կոնգրեսը վերջին երկու տարում կորցրել է հետևորդների մի ստվար բանակ: Դրա վառ ապացույցը թերևս ձեր վերջին հանրահավաքներն էին:
Չե՞ք կարծում, որ եթե Կոնգրեսը կուսակցություն դառնար շատ ավելի վաղ, գուցե այսօր ավելի հաստատուն դիրքեր ունենար և կարողանար էական ազդեցություն ունենալ այս նախըտրական շրջանում: Այս իմաստով մի քիչ ժամանակավրեպ չե՞ք համարում Կոնգրեսի՝ կուսակցություն դառնալու գաղափարը:
-Միգուցե, չի բացառվում, բայց եկեք ժամանակից առաջ չընկնենք: Կարծում եմ, ժամանակը ցույց կտա: Երևի թե այսօր էլ ՀԱԿ-ն ունի իր հետևորդների ստվար բանակը: Կարող է ինչ -որ տեղ այդ քանակը պակասել է, բայց որևիցե մեկը չի կարող ասել, թե ինչ կլինի: Ժամանակը ցույց կտա ինչ զարգացումներ տեղի կունենան:
Հիմա էլ դաշտում լուրջ կշիռ ունի ՀԱԿ-ը, ապագայում էլ կունենա, ես համոզված եմ, որ իր կշիռը, իր դերն ու ազդեցությունը այն դեռ երկար կպահի մեր քաղաքական դաշտում և հայոց պետականության պատմության մեջ:

-Տեսակետ կա, որ Կոնգրեսի վերջնական կազմալուծումը կանխելուն էր միտված այդ փոփոխությունը՝ կուսակցություն դարձնելը: Համամաձա՞յն եք այս տեսակետի հետ:
-Իհարկե համաձայն չեմ: Վարկածներ շատ կարող են լինել, բայց իրականությունն այլ է: Իրականությունն այն է, ինչը պետք է արդարացնենք:

-Ինչ եք կարծում, կլինե՞ն կուսակցություններ, որոնք կհամաձայն ձուլվելու այդ կուսակցությանը :
-Անպայման կլինեն:

-ՀԱԿ-անդամ որ կուսակցությունը պատրաստ կլինի դրան Ձեր կարծիքով:
-Չեմ կարող ասել, թե որոնք կլինեն, բայց կլինեն հաստատ: Ինչ-որ բաներ արդեն նշմարվում են, սպասել է պետք:

-Հնարավոր համարո՞ւմ եք, որ ՀԺԿ-ն միանա:
-Չեմ կարծում, ՀԺԿ-ն որպես առանձին ուժ` կմինա որպես համախոհ , դաշինքը կմնա հավանաբար, այսինքն` բարեկամական հին կարգավիճակը կպահմպանի:

-Ի՞նչ եք կարծում Նիկոլ Փաշինյանն ու Գագիկ Ջհանգիրյանը կդառնան այդ կուսակցության անդամ:
-Չգիտեմ, չեմ կարող ասել :

-Իսկ ի՞նչ կկորցի և ի՞նչ ձեռք կբերի ՀԱԿ-ը իր նոր կարգավիճակին անցնելու ճանապարհին:
-Այն ինչ կորցնելու էր, արդեն կորցրել է, այն ինչ ձեռք կբերի՝ ձեռք կբերի հետագայում և մեզ տեսանելի կդառնա: Նա կշարունակի իր գործունեությունը իր առջև դրած նպատակներն իրագործելու համար: