Ձեր վստահելի աղբյուրը

 Ոչ մի ուժ իրավունք չունի միջամտել Իրանի ներքին գործերին:
Այդ մասին իրանական «թաբնաք.իռ» կայքի հաղորդմամբ հայտարարել է Իրանի Մեջլիսի ազգային անվտանգության և արտաքին քաղաքականության հարցերով հանձնաժողովի փոխնախագահ Մանսուր Հաղիղաթփուրը:

Իրանցի խորհրդարանականը, դիմելով Ադրբեջանի Մեջլիսի պատգամավոր Նոուռուզխանին, մասնավորապես նշել է. «Որոշ երկրներ փորձում են իրանցի երիտասարդների շրջանում պառակտություններ մտցնել, սակայն նրանք թող չկարծեն, որ դա իրենց կհաջողվի: Թուրքիայի դեսպանը կարմիր շապիկով և Թուրքիայի դրոշով ներկայանում է Թավրիզի ֆուտբոլային թիմի խաղերին և երկրպագում այդ թիմին, իրանական թառը ՅՈՒՆԵՍԿՕ-ում գրանցվում է Ադբեջանի իսկ իրանցի բանաստեղծ Մոլավին՝ Թուրքիայի անվանը»:

Հիշեցնենք, որ Հաղիղաթփուրը, վերջերս իրանական «ազարիհա.օրգ» կայքին տված հարցազրուցում, անդրադառնալով ներկայիս Ադրբեջանի Հանրապետության ստեղծման շարժառիթներին, մասնավորապես նշել էր. «Պատմական փաստաթղթերի համաձայն՝ Արաքս գետից հյուսիս ընկած տարածքը կոչվել է Արան, իսկ Արաքսից հարավ ընկած տարածքը՝ Ազարբայջան. Այսինքն՝ և Արանը և Ազարբայջանը Իրանի մաս են կազմել: Այնուհետև, երբ Արաքսի հյուսիսային հատվածը վերանվանվեց Ադրբեջան, նպատակը մեկն էր՝ Արաքսից հյուսիս և հարավ ընկած տարածքները անվանել Հյուսիսային և Հարավային Ադրբեջան: Այդ առթիվ նույնիսկ Դեմոկրատական կուսակցություն ստեղծվեց, որի նպատակն իրանական Ադրբեջանն անջատելն էր»:

Հիշեցնենք, որ վերջերս ԻԻՀ ԶՈւ ԳՇ պետ, բրիգադի գեներալ Սեյյեդ Հասան Ֆիրուզաբադին Ադրբեջանի վարած հակաիսլամական քաղաքականության վերաբերյալ Ադրբեջանի նախագահ Իլհամ Ալիևին ուղղված հայտարարության մեջ Ադրբեջանն անվանել էր որպես Արան և մասնավորապես նշել. «Ադրբեջանի նախագահ Իլհամ Ալիևը պետք է ուշադրություն դարձնի, որ չի կարելի ճնշել ժողովրդի զարթոնքը: Ես մի անգամ ևս նախազգուշացրել եմ, որ Արանի ժողովրդի երակներում իրանցու արյուն է հոսում և նրանց սիրտը բաբախում է առ իսլամ, Ղուրան և Ալի ունեցած սերը»:

Նկատենք, որ իրանցի պատմաբանները և վերլուծաբանները իրենց հոդվածներում ներկայիս Ադրբեջանի Հանրապետության մասին խոսելիս հաճախ այն անվանում են Արան և, անդրադառնալով Ադրբեջան պետության ստեղծման թեմային, մասնավորապես նշում են. «Ներկայիս Ադրբեջանի Հանրապետության տարածքն իրականում այլ պատմական անուն է ունեցել: Թուրքմենչայի և Գյուլիստանի պայմանագրերի համաձայն` Արաքսից հյուսիս ընկած շիաբնակ տարածքներն Իրանից անջատվում և անցնում են Ռուսական կայսրության տիրապետության տակ: 1911թ. Բաքվում հիմնվում է Մուսավաթական կուսակցությունը, որի հիմնադիրներ Ռասուլ Զադեն, Քազեմ Զադեն և Շարիֆ Զադեն, պանթուրքիստական գաղափարներից ելնելով, հովանավորվում էին Օսմանյան Թուրքիայի կողմից, իսկ արդեն 1918թ.-ին առաջին անգամ Արան և Շիրվան տարածքներում հռչակվում է մի պետություն, որը կրում է «Ադրբեջանի Հանրապետություն» շինծու անունը:

Նախորդող տեղեկատվություն՝
ԻԻՀ հոգևոր առաջնորդի ներկայացուցիչ. Պատմության ընթացքում Ադրբեջանն Իրանից անջատված չի եղել

Իրանցի երաժշտագետ. Թառի վերաբերյալ Ադրբեջանի ներկայացրած պնդումները կեղծ են