Անդրիաս Ղուկասյանը երկուշաբթի անալիզներ կհանձնի

Առողջություն 11:10 09/02/2013

Անդրիաս Ղուկասյանը երկուշաբթի անալիզներ կհանձնի

Անդրիաս Ղուկասյանի նախընտրական շտաբը տարածել է հայտարարություն ՀՀ Առողջապահության նախարար Դերենիկ Դումանյանի կողմից կատարված առաջարկի վերաբերյալ:

«Ամբողջությամբ կողմնակից լինելով Անդրիաս Ղուկասյանի առողջության ընթացիկ վիճակի վերաբերյալ անհրաժեշտ տեղեկությունը հանրությանը տրամադրելուն` միաժամանակ ունենք մտահոգություն, որ Առողջապահության նախարարի առաջարկը Անդրիաս Ղուկասյանի համալիր ստուգման մասին նրան հարկադրաբար հացադուլից հանելու միջոց կդառնա` հոսպիտալացնելու պատճառաբանությամբ, ինչի մասին ակնարկել է Դերենիկ Դումանյանը:

Անընդունելի համարելով հարկադրանքի որևէ մոտեցում, ինչպես նաև քննարկելով խնդիրը Անդրիաս Ղուկասյանի բժիշկների հետ` որոշել ենք` Անդրիաս Ղուկասյանը փետրվարի 11-ին կհանձնի արյան և այլ անալիզներ` չլքելով հացադուլի վայրը: Այդ հետազոտությունների արդյունքում, եթե ակնհայտ դառնա անհրաժեշտ լրացուցիչ բժշկական ստուգումների անցկացումը, ապա դրա վերաբերյալ կընդունվի հավելյալ որոշում»,-ասված է տարածած հայտարարության մեջ:

Հիշեցնենք, որ նախօրեին Դ. Դումանյանը երեկ այցելել էր Ղուկասյանին, հորդորել դադարեցնել հացադուլը` տեղեկացնելով, թե այն ներկայումս և հացադուլից հետո առողջության և կյանքի հետ կապված ինչ բարդություններ և հետևանքներ կարող է առաջացնել։ Նախարարը շեշտել էր, որ յուրաքանչյուր պահի վիճակը կարող է կտրուկ վատանալ, առաջարկել է իր ցանկությամբ ընտրված որևէ կլինիկայում ՀՀ գլխավոր մասնագետների մասնակցությամբ կազմակերպել նրա առողջական վիճակի հետազոտություն:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: