Ձեր վստահելի աղբյուրը

Հայաստանի նախագահի թեկնածու Հրանտ Բագրատյանը տրամաբանություն չի տեսնում մյուս նախագահի թեկնածու Պարույր Հայրիկյանի` ՍԴ դիմելու և միասնական թեկնածուի մասին հայտարարության միջև: «Ես ունեմ բավականին ինտենսիվ նամակագրություն Պարույրի հետ. դուք գիտեք դիմի, թե չդիմի, ես աշխատում եմ ուղղակի, առանց խաղեր տալու»,- լրագրողների հետ այսօրվա հանդիպման ժամանակ հայտարարեց Հրանտ Բագրատյանը: 

Այնուհետև շարունակեց. «Ես ուզում եմ, որ այս թեման մնա այլևս Պարույրի մեջ` իր խնդիրն է դիմի-չդիմի, չի կարելի դիմել և խնդիրը կապել միասնականության հետ. սա փաստորեն պահանջ է ուղղված իշխանությանը, թե գնա ստիպի, որ դառնան միասնական թեկնածու, որ հետո գանք քեզ շնորհավորենք: Ես այսպես եմ ընկալում, ուրիշ կերպ չեմ էլ կարող ընկալել»:

Նա հայտարարեց, որ Պարույր Հայրիկյանի ու Րաֆֆի Հովհաննիսյանի հետ ինտենսիվ հանդիպումներ է ունենում և ասաց, որ ինքը պայմանավորվել է հանդիպումների մասին որևէ լուր չտալ, մինչդեռ այդ պայմանը մյուս թեկնածուներից մեկի, մասնավորապես Պարույր Հայրիկյանի կողմից խախտվել է: «Խոսում էինք այդ մասին, ի՞նչ կարիք կար առաջ ընկնել և ասել, թե տեսեք մենք միասնական թեկնածուի մասին ենք խոսում: Սա անընդունելի է: Ես սա ավելի շուտ միասնական թեկնածուի թեզի տակ եղած ընդդիմադիր դաշտը, այդ թվում ձեր խոնարհ ծառային, զրոյացնելու փորձ անելն է», -հայտարարեց Բագրատյանը` իրենց պայմանավորվածությունը խախտող համարելով Պարույր Հայրիկյանին:

Նրա խոսքով, այս պարագայում իշխանությունն է նաև փորձեր անում զրոյացնել ընդդիմադիր դաշտը. «Որոշել ոչ միայն առաջին տեղը, որոշել ոչ միայն երկրորդ տեղը, որը կշնորհավորի, որոշել երրորդը, չորրորդը, որ ընդդիմություն չմնա: Նման ագահություն իշխանության կողմից ծանր վիճակ է առաջացնում Հայաստանում»:

Թեկնածուն խոստացավ այլևս լուրջ չվերաբերվել հայտարարություններին, հարցադրումներին ու չպատասխանել դրանց, քանի որ արդեն իսկ հստակ հայտարարություն արել է:

Ի վերջո, եթե Պարույր Հայրիկյանը, Բագրատյանի խոսքով, միասնական թեկնածուի հարց է բարձրացնում, կարող է հանել իր թեկնածությունը` հօգուտ ապագա միասնական թեկնածուի: «Սա տղամարդու արարք կդիտվի` առաջինը դու հանի և օրինակ ցույց տուր: Ի դեպ, սրանք այն խոսքերն ու քննարկումներն են, որոնք ես երբևէ լրագրողներին չեմ ներկայացրել: Բայց քանի որ ընտրություններին մնում են յոթ օր և հասարակությունը կարող է սխալ ինֆորմացված գնալ ընտրության: Ես սա ազնվորեն ասում եմ», -հայտարարեց Բագրատյանը:

Նա մեկ այլ բացահայտում էլ արեց իրենց քննարկումներից. «Ես Պարույրից և Րաֆֆիից սպասում եմ հայտարարության, որ ընտրություններից հետո պաշտոնի չեն գնում ու չեն շնորհավորում, քանի որ ընտրացուցակների մասով մեր հայտարարությունը չհարգվեց»: Մինչ այժմ, Բագրատյանի խոսքով, սակայն նման հայտարարություն մյուս թեկնածուների կողմից չի արվել:

Այդ քննարկումների արդյունքում դեռևս չէր հստակեցվել միասնական թեկնածուով գնալու ֆավորիտը: Հարցին, թե բացառո՞ւմ է Բագրատյանը, որ կզիջեր մեկ այլ թեկնածուի օգտին, թեկնածուն ասաց. «Այո, այս պահին բացառում եմ, որովհետև ես ինձ համարում եմ միակ ընդդիմությունը»: