Ձեր վստահելի աղբյուրը

 Ադրբեջանական «Ictimai TV» հեռուստաալիքի եթերում անցկացվել են Ադրբեջանում հայերի ջարդերի մասին պատմող «Քարե երազներ» գրքի, այսպես կոչված, քննարկումներ: Քաղաքական ու հասարակական գործիչներն ողջ հաղորդման ընթացքում դատապարտել են հեղինակ Աքրամ Այլիսլիին, ով միայնակ եկել էր պաշտպանելու իր դիրքորոշումը: 

«Այլիսի (Այլիսն այն քաղաքն է, որտեղ կատարվել են գրքում նկարագրված հիմնական գործողությունները: Գրքի հեղինակը ծնունդով այդ քաղաքից է, այդ պատճառով իրեն անվանում են Աքրամ Այլիսլի-Panorama.am) մասին գրել եմ այն, ինչ աչքովս եմ տեսել»,- հայտարարել է հեղինակը և նշել, որ վեպում ամեն ինչ ճիշտ է նկարագրված:

Մեկնաբանելով այս հայտարարությունը` ադրբեջանցի գրող Էլչին Միրզաբեյլին ասել է, որ նկարագրելով հայերի ջարդերը Բաքվում՝ Այլիսլին ջուր է լցնում թշնամու ջրաղացին՝ հույս ունենալով, որ դա կգնահատվի Եվրոպայի կողմից:

Պատգամավոր Զահիդ Օրուջի այն հարցին, թե արդյոք Այլիսլին Ղարաբաղը, Նախիջևանը, Այլիսը ադրբեջանական հողեր է համարում, վերջինս պատասխանել է, որ աշխարհում ոչ մի ազգ էլ հետագայում չի ապրում այն վայրերում, որտեղ սկզբնապես կազմավորվել է, իսկ վեպը գրելու գլխավոր դրդապատճառը եղել է այն, որ ցույց տա, որ հայերն ու ադրբեջանցիները դարեր շարունակ ապրել են միմյանց հարևանությամբ: «Դուք ամեն օր հայհոյում եք հայերին, հետո ինչպե ՞ս եք ապրելու նրանց հետ»,- հարցրել է Այլիսլին:

Պատգամավոր Ֆարաջ Գուլիևը իր հերթին նշել է, որ շարքային և ոչ շարքային հայեր չեն լինում: «Մենք պետք է բոլոր հայերի մասին միշտ էլ վատը խոսենք: Բոլոր հայերը պետք է հեռանան մեր տարածքներից, իսկ դուք խոսում եք միասին ապրելու մասին, դուք դրանով վնասում եք մեր պետությանը»,- հայտարարել է պատգամավորն ու նշել, որ Այլիսլին պետք է հրաժարվի կամ իր ստեղծագործությունից, կամ էլ ադրբեջանի ժողովրդից:

Ադրբեջանական «Թուրան» լրատվական գործակալությունը, անդրադառնալով այս քննարկումներին, նշել է, որ Այլիսլիի համար հատուկ «դատավորներ» էին ընտրվել: «Օրինակ պատգամավոր Զահիդ Օրուջը, ում հաղթանակը 2005 թվականի ընտրություններում Մարդու իրավունքների եվրոպական դատարանը ճանաչել է կեղծված և իշխանությունը բազմահազարանոց փոխհատուցում է վճարել այդ ընտրատարածքում հաղթած Նեյմաթ Ալիևին: Փաստորեն Օրուջը, առանց ամաչելու, իր գրպանում կրում է մանդատ, որը նա ստացել է կոպիտ խախտումների միջոցով»,- նշում է կայքը:

Մյուս «դատավոր» Էլչին Միրզաբեյլին առնվազն հինգ անգամ կտրուկ փոխել է իր քաղաքական դիրքորոշումը: Նա մեկ ընդդիմադիր է եղել, այնուհետև սկսել է պաշտպանել իշխանությանը, և այդպես մի քանի անգամ: Իսկ Հանրային հեռուստատեսության հաղորդավար Անար Յուսիֆօղլուն մի քանի տարի առաջ հրապարակայնորեն ասել է, որ իրենց հեռուստաալիքում կա անձանց «սև» ցուցակ, ում արգելվում է եթեր հրավիրել:

«Այս «քննարկումները» շատ նման են մեր խորհրդային անցյալին: Ու ոչ թե հանգիստ, թեթև բրեժնևյան լճացմանը, այլ ստալինիզմին. իհարկե, ցավոք, դեռևս առանց Մեծ հայրենական պատերազմի հաղթանակի, բայց, ի ուրախություն, դեռ առանց զանգվածային գնդակահարումների: Սահմանափակվում ենք «հասարակական քննարկումներով» և «համազգային քննադատություններով»: Իսկ Այլիսլին իրեն արժանապատվորեն է պահում: Ակնհայտ է, որ դա ստեղծված իրավիճակից բխող խոսքեր չեն, այլ իրոք նրա դիրքորոշումն է»,- նշվում է նյութում:

Նշենք, որ «Գոլոս Ռոսիի»-ին տված հարցազրույցում, Աքրամ Այլիսլին ասել է, որ չէր սպասում, որ իրեն կզրկեն իր կոչումներից, շքանշաններից: «Գրողի նկատմամբ հետապնդումները նման վեպի համար նորմալ չէ: Մեր շարքային քաղաքացիներն ասում են, որ կարող են ապրել հայերի հետ միասին: Միևնույն ժամանակ պաշտոնական իշխանություններն ատելություն են քարոզում»,- հայտարարել է Այլիսլին և նշել, որ Ադրբեջանում ամեն ինչ ընթանում է ամենավատ սցենարով, որը կարող էր լինել միայն 1930-ական թվականներին:

Հատկանշական է, որ «Youtube»-ից հանվել է այն տեսանյութը, որում Ադրբեջանի «համազգային առաջնորդ» Հեյդար Ալիևը Աքրամ Այլիսլիին Ադրբեջանի «Փառքի շքանշան» է հանձնում:
Ադրբեջանական մամուլը Այլիսլիի դեմ Ադրբեջանի իշխանությունների հրահրած զանգվածային հետապնդումների իրական պատճառն համարում է այն, որ նա վեպում ներկայացրել է Հեյդար Ալիևին բացասական լույսի ներքո և ակնարկել է, որ Բաքվում հայերի ջարդերը կազմակերպիչը հենց Հ.Ալիևն է եղել: