Լևոն Ջուլֆալակյան. «Երկսեռ մարդիկ դեմ են տղամարդկային մարզաձևերի զարգացմանը»
Միջազգային օլիմպիական կոմիտեի (ՄՕԿ) գործադիր կոմիտեն երեքշաբթի Լոզանում կայացած նիստի ընթացքում առաջարկել է հանել ըմբշամարտ մարզաձևը 2020 թ. ամառային Օլիմպիական խաղերի ծրագրից: Նիստի ընթացքում ՄՕԿ–ի գործող կոմիտեի անդամները քննարկել են այն զեկույցը, որուն ավելի քան 30 չափանիշների հիման վրա գնահատական էր տրվում սպորտի 26 տեսակից յուրաքանչյուրին, որոնք այժմ ներկայացված են ամառային Խաղերի ծրագրում։
Ինչպես գիտեք, ռուս մարզական պաշտոնյաները` նախարար Վիտալի Մուտկոյի գլխավորությամբ, արդեն հայտնել են, որ իրենք ցնցված են ՄՕԿ-ի գործող կոմիտեի այդքան անհեթեթ առաջարկից։ Այս նորությունը մեծ աղմուկ է բարձրացրել նաև Հայաստանում, քանզի ըմբշամարտում մենք միշտ էլ բարձր արդյունքներ ենք ունեցել, իսկ այս տարվա լոնդոնյան օլիմպիական խաղերին Հայաստանի հավաքականի արծաթե մեդալը նույնպես այս մարզաձևից էր:
Այս առիթով այսօր «Նովոստի» միջազգային մամուլի կենտրոնում տեղի ունեցավ աշխարհի և Օլիմպիական խաղերի չեմպիոն, Հայաստանի հունահռոմեական ոճի ըմբշամարտի հավաքականի գլխավոր մարզիչ Լևոն Ջուլֆալակյանի մամլո ասուլիսը։
Ջուլֆալակյանը նշեց, որ ինքը նույնպես տհաճությամբ է ընդունել այս նորությունը, որի իրականություն դառնալու մասին անգամ չի էլ ցանկանում մտածել, թեև ստիպված է, քանի որ հիմա, ամեն ինչից առավել, պետք է համախմբվել ու կոնկրետ քայլեր ձեռնարկել, ինչն էլ և պատրաստվում են անել:
«Նախ ուզում եմ շնորհակալություն հայտնել մարզաշխարհի բոլոր ներկայացուցիչներին, ում շրջանում այս նորությունը մեծ արձագանք ստացավ: Զգում էի, որ սրտի ցավով են զանգահարում և հարցնում, թե ինչ է կատարվում: Ես նույնպես մեծ տհաճությամբ ընդունեցի այս նորությունը: Ինչ-որ մեկը ցանկանում է քանդել երկար տարիների արդյունքում ստեղծվածը և հանդես է եկել նման առաջարկությամբ: Ցանկացած բնագավառում կարող են լինել մարդիկ, ովքեր իրենց տեղում չեն և աշխատում են միայն վատ բանի համար: Սա այդ դեպքն է: Բոլորս էլ գիտենք, որ օլիմպիական խաղերի պատմության հիմքում ընկած է ըմբշամարտ մարզաձևը: Այն ի սկզբանե եղել է օլիմպիական մարզաձև, և հիմա հանդես են գալիս նման անհեթեթ առաջարկներով: Նույնն է, թե շենք կառուցես, իսկ հետո հանես հիմնական սյուներից մեկը: Ի՞նչ կլինի այդ դեպքում: Իհարկե, հետզհետե շենքը կքանդվի: Նշվում է, որ ըմբշամարտ մարզաձևը դիտարժան և մասսայական չէ, ինչի հետ ես, բնականաբար, համաձայն չեմ, քանի որ մրցաշարերի ժամանակ դահլիճները միշտ էլ լեցուն են երկրպագուներով: Օլիմպիական կարգախոսում նշվում է, որ պետք է միասնական լինենք, արդար և ազնից պայքար մղենք: Իսկ ի՞նչ են անում իրենք: Ճիշտ հակառակը: Նոր մարզաձևեր ավելացնելու փոխարեն հանում են դրանք»,- նշեց Ջուլֆալակյանը:
Հունահռոմեական ոճի ըմբշամարտի Հայաստանի հավաքականի գլխավոր մարզչի խոսքերով, եթե սա, այնուամենայնիվ, տեղի ունենա, ապա մարզաձևը կկորցնի իր հետաքրքրությունը:
«Սա մեծ հարված կլինի այն երեխաներին, ովքեր տարիներ շարունակ զբաղվել են ըմբշամարտով և հիմա արդեն հույսով սպասում են օլիմպիական խաղերին: Մեզ մոտ բազմաթիվ երեխաներ են մարզվում, մարզադահլիճները միշտ լեցուն են, սակայն ամեն ինչ կարող է փոխվել: Չեմ ուզում մտածել, որ նման բան կարող է տեղի ունենալ, սակայն այս կյանքում ամեն ինչ հնարավոր է:
Ցավալի է, որ որոշ մարդիկ իրենք էլ չգիտեն` ինչեր են խոսում` դրանով իսկ առաջ բերելով մեծ խնդիրներ: Ես դրանց անվանում եմ երկսեռ մարդիկ, ովքեր երևի թե դեմ են տղամարդկային մարզաձևերի զարգացմանը»,- նշեց Ջուլֆալակյանը:
Նա կոչ արեց բոլորին համախմբվել և օգնել այս հարցում` վստահություն հայտնելով, որ Հայաստանի ըմբշամարտի ֆեդերացիան, Սպորտի նախարարությունը և Հայաստանի օլիմպիական կոմիտեն անպայման քայլեր կձեռնարկեն` հարցին լուծում տալու համար:
Ըմբշամարտն այն մարզաձևն է, որտեղ միշտ եղել է ու կա համախմբվածություն: Ես վստահ եմ, որ այս անգամ ևս միահամուռ ուժերով կհասնենք մեր նպատակին: Մենք կպայքարենք լրջորեն»,- նշեց Ջուլֆալակյանը:
Հավելենք, որ օլիմպիական խաղերի ծրագրի վերաբերյալ վերջնական որոշումը կընդունվի սեպտեմբերին` Բուենոս Այրեսում կայանալիք ՄՕԿ-ի 125-րդ նիստի ժամանակ: Այդ օրը կընտրվի նաև 2020 թ. օլիմպիական խաղերի մայրաքաղաքը, որին հավակնում են Մադրիդը, Ստամբուլը և Տոկիոն։
Լրահոս
Տեսանյութեր
Լավագույն դրամատիկ տենորներից Արսեն Սողոմոնյանը համերգաշարով ցույց կտա՝ արվեստը չունի սահմաններ
