Ձեր վստահելի աղբյուրը

Նախօրեին Ադրբեջանի ԱԳ նախարար Էլմար Մամեդյարովը, ելույթ ունենալով ՄԱԿ-ի բաց դեբատների ժամանակ, մասնավորապես հայտարարել է, որ «Հայաստանի մղած պատերազմն Ադրբեջանի դեմ և ադրբեջանական տարածքների օկուպացիան բացասաբար է անդրադարձել քաղաքացիական բնակչության վրա»:

Ադրբեջանցի պաշտոնյայի այս հայտարարությանն արձագանքել է ՀՀ ԱԺ փոխնախագահ Էդուարդ Շարմազանովը. «Ադրբեջանի ղեկավարությունը ոչ մի կերպ չի ցանկանում հրաժարվել նացիստական Գերմանիային բնորոշ սուտ ու կեղծիք տարածելու քարոզչությունից: Պարոն Մամեդյարովը երևի հավատացել է գեբելսյան սկզբունքին` եթե ուզում ես, որ քո ստին հավատան, ավելի ահավոր սուտ հորինիր:

Ինչ վերաբերում է Հայաստանի կողմից «ագրեսիայի» դրսևորմանը և ադրբեջանական տարածքների «օկուպացիային», պետք է նշեմ, որ ողջ աշխարհին է հայտնի՝ Հայաստանը երբեք էլ պատերազմ չի սանձազերծել Ադրբեջանի դեմ: Իսկ Պարոն Մամեդյարովի հայտարարությունն ընդամենը խորամանկ փորձ է ԼՂ հակամարտությունը ներկայացնելու որպես տարածքային վեճ: Ճշմարտությունը հետևյալն է՝ ի պատասխան ԼՂ բնակչության ինքնորոշման օրինական պահանջի` ադրբեջանական իշխանությունները սանձազերծեցին ագրեսիվ պատերազմ և գնդակոծեցին խաղաղ բնակչությանը: Ավելին՝ Ադրբեջանն է դեռևս օկուպացրած պահում ԼՂՀ որոշ շրջաններ»,-տարածած հայտարարության մեջ նշել է Շարմազանովը:

Անդրադառնալով Մամեդյարովի ելույթի այն հատվածին, համաձայն որի՝ 21 տարի առաջ Խոջալուում իրականացվել են ադրբեջանցի խաղաղ քաղաքացիների զանգվածային սպանություններ՝ Էդուարդ Շարմազանովն ընդգծել է, որ ադրբեջանցի պաշտոնյային չէր խանգարի ծանոթանալ իր իսկ երկրի նախկին նախագահ Այազ Մութալիբովի՝ չեխ լրագրող Դանա Մազալովային տված հայտնի հարցազրույցին, որտեղ Մութալիբովը մեղադրում է ադրբեջանական ընդդիմությանը իշխանությունը զավթելու նպատակով սեփական ժողովրդի նկատմամբ սպանդ իրականացնելու գործում («Նեզավիսիմայա Գազետա», 2.04.92)։

Նաղորդող՝ Կարեն Նազարյանը ՄԱԿ-ում հիշեցրել է Խոջալուի, Բաքվի, Կիրովաբադի վայրագությունների մասին