Սերժ Սարգսյանը` Րաֆֆի Հովհաննիսյանի և Հրանտ Բագրատյանի մասին (Լուսանկարներ)

Քաղաքական 17:40 16/02/2013

Սերժ Սարգսյանը` Րաֆֆի Հովհաննիսյանի և Հրանտ Բագրատյանի մասին (Լուսանկարներ)

ՀՀ նախագահի թեկնածու Սերժ Սարգսյանը քարոզարշավի վերջին օրը Երևանի Կենտրոն վարչական տարածքի ընտրողների հետ հանդիպման ժամանակ ունեցած ելույթում գովաբանել է նախագահի թեկնածուներ Րաֆֆի Հովհաննիսյանին ու Հրանտ Բագրատյանին և շնորհակալություն հայտնել իր մրցակիցներին:

Իր ելույթում ՀՀ նախագահի թեկնածուն նախ համառոտակի անդրադարձել է հեղափոխությունների պատմությանը` ընդգծելով, որ աշխարհի շատ ու շատ ժողովուրդներ իրենց պատմության ընթացքում անցել են հեղափոխությունների ճանապարհով:

Իշխանությունը բռնի ուժով զավթելու, իշխանությունից կառչելու հեղափոխական բռնության փակ շրջանի դեմ քաղաքակիրթ երկրները, Սերժ Սարգսյանի հավաստմամբ, լուծում են գտել, և այդ լուծման անունը ՍԱՀՄԱՆԱԴՐՈՒԹՅՈՒՆ է:

«Եվ ես շատ ուրախ եմ, որ Հայաստանի Հանրապետության նախագահի այս ընտրությունների քարոզարշավի ընթացքում հաղթում է մեր Սահմանադրությունը, նրա տառը և ոգին: Եվ ես սրա մասին կարող եմ միայն հպարտությամբ խոսել»,- ասել է նա ու ընդգծել, որ այսօր Հայաստանում տեղի է ունենում հեղափոխություն. «Դա սահմանադրական հեղափոխություն է, որ անում ենք բոլորս միասին»:

Նրա խոսքով, դա տեղի է ունեցել հասարակության ակտիվ մասնակցությամբ: «Դա նաև Րաֆֆի Հովհաննիսյանի գեղեցիկ քարոզարշավն է՝ լի հազարավոր, տասնյակ հազարավոր ձեռքսեղմումներով: Դրա միջոցով Րաֆֆին փորձում է հասնել մեր երկրի յուրաքանչյուր քաղաքացուն: Ոմանք դրան փորձում են սարկազմով վերաբերել, բայց, ճիշտն ասած, իրականությունն այն է, որ Րաֆֆին մշակույթ է փոխում մեր երկրում, նոր քաղաքական ավանդույթ է արմատավորում: Նա ապացուցում է, որ ընդդիմադիր լինել՝ չի նշանակում շուրջբոլորը ատելություն տարածել»,- ասել է Սերժ Սարգսյանը:

Անդրադառնալով Հրանտ Բագրատյանին` Սերժ Սարգսյանն նշել է. «Հիշում եք չէ՞, Հրանտ Բագրատյանը ժողովրդին ղրղզական և թունիսական ճանապարհ էր առաջարկում: Եվ շատ ժամանակ չի անցել այն օրվանից: Այսօր, որքան էլ համաձայն չեմ Հրանտի հետ, բայց հետաքրքրությամբ եմ դիտում հեռուստացույցով նրա հարցազրույցները: Եվ ուրախ եմ, որ նրա պես պատգամավորներ կան մեր Ազգային ժողովում, ով ծրագիր է գրում և փորձում է այլընտրանքային ճանապարհ ցույց տալ: Բազմաթիվ անգամ ես ասել եմ, որ նույնիսկ եթե մենք արմատից համաձայն չենք ցանկացած կարծիքի հետ, ապա այդ կարծիքը լռեցնելու իրավունքը չունենք: Մենք պետք է հնարավորություն տանք մարդուն իր կարծիքն արտահայտելու և եթե կարողանում ենք՝ ինքներս էլ հրապարակայնորեն պետք է վիճենք այդ կարծիքի հետ, եթե կարող ենք՝ իհարկե, նաև հերքել»:

Ամփոփելով խոսքը` նախագահի թեկնածուն նշել է. «Ես շնորհակալ եմ ինձ ընդդիմադիրներին: Ես համարում եմ, որ նրանց հետ միասին մենք, իրոք, հեղափոխություն ենք անում Հայաստանում: Եվ դա սահմանադրական հեղափոխություն է: Եվ դա հեղափոխություն է, որ առաջին հերթին, տեղի է ունենում մեր գիտակցության մեջ»:

Հիշեցնենք, որ փետրվարի 18-ին կայանալու են ՀՀ նախագահի ընտրությունների քվեարկությունը: Այսօր` փետրվարի 16-ին ավարտվում է թեկնածուների նախընտրական քարոզչությունը: Վաղն, այսպես կոչված, «լռության օր է»` օրենքով արգելված է ամեն տեսակ քարոզչությունը:

Նախորդիվ` Սերժ Սարգսյան. «Վստահ եմ, որ 2033թ-ին լուծած կլինենք Ղարաբաղի խնդիրը»

Սերժ Սարգսյան. «Այո, այսօր Հայաստանում տեղի է ունենում հեղափոխություն` Սահմանադրական հեղափոխություն» (Լուսանկարներ)

Սերժ Սարգսյանը պատրաստ է համագործակցության` նախագահի թեկնածուների հետ

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: