Օրվա ընտրախախտումներից ու պարզաբանումներից. Ընտրական հավաքածու
Այսօրվա ինֆորմացիոն իրարանցումից մի բան հաստատ կարելի է դրական գնահատել` անտարբեր չենք ընտրական գործընթացներին ու ընթացքին:
Մնացած մասով` թե ինչ խախտումներ են եղել, ով ինչպես է ներկայացնում, կամ ինչպես են դրանք ֆիքսում` ամեն ինչ չէ, որ պարզ է:
Ասենք`
32/5 ընտրատեղամասում.
«Ժառանգություն» կուսակցությունից Yerkir.am-ին հայտնել էին, որ 32/5 ընտրատեղամասում լցոնման դեպք է արձանագրվել:
Ընտրատարածքային հանձնաժողովի նախագահ Սարգիս Սուքիասյանը դրա մասին հարցին պատասխանեց. «Գիտեք, լցոնման մասին խոսք անգամ չի կարող լինել: Ընդամենը մայր ու աղջիկ եկել են ընտրությունների: Ծրարը քվեատուփ լցնելիս մոր ծրարն ընկել է, ինչից հետո նրա աղջիկը վերցրել ու ծրարը քվեատուփ գցել: Իսկ դա ուռճացվել է ու սարքել են լցոնում, չի կարելի նման հայտարարություններ անել»:
«Գյումրու 18-րդ դպրոցում տեղավորված 35/39 տեղամասի հանձնաժողովի նախագահը արգելում է դիտորդներին և ԶԼՄ ներկայացուցիչներին դիտել և հսկել քվեարթերթիկ հատկացնելու գործընթացը մոտիկից, տեսնել մատյանում գրանցման պրոցեսը, և արդյո՞ք` ընտրողն իր անվան դիմաց է ստորագրում քվեաթերթիկ ստանալիս: Հանձնաժողովի նախագահը պարտադրում է դիտորդներին և վստահված անձանց նստել հատկացված տեղերում և չտեղաշարժվել տեղամասում»,- հայտնել էր Asparez.am-ը:
Սրա հետ կապված` թիվ 35 ընտրատարածքային ընտրական հանձնաժողովի նախագահ Գուրգեն Մալխասյան. «Տարածքային ընտրական հանձնաժողովների նախագահները համապատասխան հրահանգավորում են ստացել և բացառվում է, որ նման քայլերի գնան: ԶԼՄ-ները նրա համար են, որ հասարակությանը համապատասխան տեղեկատվություն փոխանցեն, ոչ մի դեպքում նրանց մասնագիտական պարտականությունները չեն սահմանաձակվում: Այս պահի դրությամբ նման ահազանգ տեղամասային հանձնաժողովներից չի ստացվել»:
«Մեդիա կենտրոն»-ի փոխանցմամբ. Արարատի մարզի, Արտաշատ քաղաքի 17/3 ընտրատեղամասից «Իրավունքի Եվրոպա միավորում» դիտորդական խմբի անդամներն ահազանգել են, որ հանձնաժողովի անդամներն ու Սերժ Սարգսյանի վստահված անձինք ճնշում են գործադրում դիտորդների վրա:
Թիվ 17 ԸԸՀ նախագահ Արմեն Մարգարյանը ասաց, թե առաջին անգամ է նման բան լսում, հավելելով, որ եթե նման միջադեպ գրանցված լիներ, ապա նա տեղյակ կլիներ:
Հարցին, թե «080 080 804 թեժ գծին 12։20-ին ահազանգ է ստացվել դիտորդ Խաչատուր Սիրադեղյանից, ով տեղեկացրել է, որ Արտաշատի թիվ 17/01 ընտրատեղամասում երեք վստահված անձինք խոչընդոտում են իր և լրագրող Էլմիրա Մարտիրոսյանի աշխատանքը, թույլ չեն տալիս մոտ գնալ՝ պատճառաբանելով, որ խանգարում են իրենց աշխատանքը», Ա. Մարգարյանն ասաց. «Առհասարակ որևէ բողոք կամ ահազանգ մեր ընտրատարածքի տեղամասերից չի ստացվել»:
Գյումրիի 34/27 ԸՏ-ում ՔՀԻ դիտորդը արձանագրել է, որ Սերժ Սարգսյանի վստահված անձը մտել է քվեախցիկ և մի քանի անձանց ուղղորդել, թե ում ընտրել: Այս մասին ահազանգ է տեղադրել hra.am-ը: Թիվ 34 ԸԸՀ-ի նախագահ Էդվարդ Բաղրամյանն ասաց, թե` «տեղեկատվությունը ուռճացված է»:
«Խնդիրն այն է, որ մեծահասակ կինը չի կարողացել ինքնուրույն քվեարկել, իսկ նրան փորձել է օգնել ՀՀԿ թեկնածուի վստահված անձը, ինչը հանձնաժողովի անդամների կողմից կանխվել է: Այնուհետև օրենքով սահմանված կարգով տիկնոջը օգնություն է ցուցաբերվել: Իսկ մնացած ամեն ինչ նորմալ է»,- նշեց նա:
Iditord-ի փոխանցմամբ` 4/06 ընտրատեղամասի հանձնաժողովի անդամներից մեկը տեղեկացրել է, որ հանձնաժողովի նախագահը հրաժարվում է արձանագրություն կազմել տեղամասի տարածքում թույլատրվածից շատ մարդ գտնվելու փաստի վերաբերյալ: Ըստ աղբյուրի՝ տեղամասում միաժամանակ 19 մարդ է եղել՝ օրենքով թույլատրված առավելագույն 15-ի փոխարեն:
Պարզաբանումներ ստանալու նպատակով Panorama.am-ը դիմեց թիվ 4 ԸԸՀ նախագահի տեղակալ Մանվել Պապոյանին: Նա նշեց, թե` այդ ընտրատեղամասում 11 քաղաքացուց ավել մարդ չի գտնվել, ըստ այդմ՝ օրենք չի խախտվել. «4/06 ընտրատեղամասից մեզ փոխանցել են, որ քաղաքացիներից մեկը դժգոհել է, որ ընտրատեղամասում շատ մարդ կա, սակայն ընտրատեղամասի հանձնաժողովի անդամներն ու վստահված անձինք օրենքի խախտում չեն նկատել»:
Հարցին, թե արդյո՞ք դժգոհող քաղաքացու հետ զրուցել են և արդյո՞ք հենց նա է կուտակումների մասին տեղեկատվություն տարածողը, վերջինս նշեց, որ բողոքելուց հետո քաղաքացին հեռացել է, իսկ մինչև այդ նրան հանձնաժողովի անդամները բացատրել են, որ 11 քաղաքացիների առկայությունը օրենքի խախտում չէ:
ՀՔԱ Վանաձորի գրասենյակի դիտորդները նաև ֆիքսել են, որ «32/14 ընտրական տեղամասում ժամը 10:00-ի դրությամբ գրանցվել է բաց քվեարկության 6 դեպք»: Թիվ 32 ԸԸՀ-ի նախագահ Սարգիս Սուքիասյանը այս միջադեպի հետ կապված նշեց, որ «նման բան չկա և ամենայն հավանականությամբ դեպքը խառնել են 32/5-ում կատարված դեպքի հետ»:
ՀՔԱ Վանաձորի գրասենյակը 2013 թ. փետրվարի 18-ին իրականացնում է ՀՀ Նախագահի ընտրությունների քվեարկության օրվա դիտորդություն: Ժամը 12:00-ի դրությամբ կազմակերպությունը արձանագրել է, որ մասնավորապես 31/05 ընտրական տեղամասում ժամը 09:30-ին ՀՔԱ Վանաձորի գրասենյակի դիտորդը փաստել է լցոնում:
Անհրաժեշտ պարզաբանումներ ստանալու նպատակով, Panorama.am-ը խոսեց թիվ 31 ԸԸՀ նախագահ Վռամ Վանյանի հետ:
«Դա հերյուրանք է, ես հենց նոր էլ կապնվեցի 31/05 ընտրատեղամասի հանձնաժողովի նախագահի հետ, ով ասաց, թե նման բան չի եղել, իսկ համապատասխան գրանցամատյանում նմանատիպ գրառում չկա»:
Հարցին, թե միգուցե հանձնաժողովի անդամները չե՞ն թույլատրել համապատասխան գրառում կատարել, վերջինս ասաց. «Անհնար է, նման բան չի կարող լինել»:
Թե էլ ինպիսի խախտումներ կամ ահազանգեր կան, ներկայացրեց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը:
«Մեր գրասենյակի դիտորդները շատ խայտառակ վիճակի մեջ են հայտնվել` խախտումների ծավալն այնքան մեծ է, որ հազիվ կարողանում ենք գրանցել դրանք», - ասաց նա:
Նշենք, որ ՀՔԱ Վանաձորի գրասենյակը Հայաստանի նախագահի ընտրություններում դիտորդական առաքելություն է իրականացնում Լոռու և Տավուշի մարզերում:
Մասնավորապես, ըստ գրասենյակի տարածած հաղորդագրության, 31/05 ընտրական տեղամասում ժամը 09:30-ին ՀՔԱ Վանաձորի գրասենյակի դիտորդը փաստել է լցոնում, 32/05 տեղամասում ժամը դիտորդը լցոնում է գրանցել ժամը 10:58-ին, 32/14 տեղամասում դիտորդը ժամը 10:00-ին արձանագրել է լրացված ստորագրված քվեաթերթիկների լցոնում քվեատուփի մեջ:
«Ընդ որում արձանագրված լցոնման մասին տեղեկացնելու համար ԿԸՀ-ից զանգահարել են կազմակերպության դիտորդին և նկատողություն արել, թե ինչու է նման ինֆոմացիա տվել», -նշվում է հաղորդագրության մեջ:
Դիտորդները լցոնման մասին հայտարարելուց որևէ փաստ ունե՞ն հարցին պարոն Սաքունցը պատասխանեց. «Եթե դիտորդը տեսել է, որ լցոնում է տեղի ունեցել, դրանից ավել փա՞ստ: Ես ոստիկան չեմ, քննիչ չեմ, դատախազ չեմ: Իմ դիտորդը կոնկրետ դեպքերն է արձանագրել», -հավելեց Արթուր Սաքունցը:
ՀՔԱ Վանաձորի գրասենյակի տարածած հաղորդագրության մեջ նշվում է նաև, որ ընտրակաշառքի բաժանման դեպքեր են գրանցվել: Մասնավորապես, Ժամը 09:30-ին կազմակերպության դիտորդների կողմից թիվ 30 մանկապարտեզի մոտ արձանագրվել է 21 ՏՍ 880 մակնիշի ավտոմեքենայի մոտ քվեարկությունից հետո արդեն քվեարկած ընտրողների կուտակում, որոնք ունեցել են ակնկալիքներ այդ ավտոմեքենայում նստած մարդկանցից /հասցեն` ք. Վանաձոր, Շինարարների 91/, 29/25 տեղամասի տարածքում 11:30-ի դրությամբ ընտրակաշառքի բաժանման դեպք է արձանագրվել:
«Եթե ընտրողները դուրս են գալիս ընտրական տեղամասից ու մոտենում է մեքենա, որի նկատմամբ կա հատուկ հետաքրքրություն, ապա դրա իմաստը որն է, կասե՞ք: Իրավապահ մարմիններն էլ մատը մատին չեն տալիս, հո ոստիկանի նման չեմ գնալու ասեմ` էս ինչ եք անում», -հավելեց Սաքունցը:
ՀՔԱ Վանաձորի գրասենյակի դիտորդների արձանագրած խախտումները` այստեղ:
Լրահոս
Տեսանյութեր
Ինչո՞ւ հանկարծ ՀՀ իշխանությունները որոշեցին խլել արցախցիների կենսաթոշակային խնայողությունները
