Ձեր վստահելի աղբյուրը

Նախագահի թեկնածուներից Վարդան Սեդրակյանը նույնիսկ այսօր, ընտրության օրը տարբերվում է մյուս թեկնածուներից իր արտասովոր վարքագծով: Եթե բոլոր թեկնածուները կամ նրանցից շատերը այսօր ողջ թիմով աշխատում են հետևել ընտրական գործընթացին և իրավիճակը կառավարելի դարձնել, ապա էպոսագետը առավոտյան գնացել է հիվանդանոց, այնուհետև վերադարձել տուն, սուփրա սեղան փռել ու կինո է դիտում:

«Գիտե՞ք հիմա ինչ եմ անում, «Շողակաթով» էն շան մասին հայտնի ֆիլմն եմ նայում՝ փափուկ բազկաթոռիս մեջ նստած: Ավստրալիական ֆիլմա, էնքան լավնա, ես շատ եմ սիրում, որովհետև ուսանողական ժամանակներում էս ֆիլմը շատ էի դիտում: Էս պահին, օրինակ, շանն են պաչում, ընտանիքով, հենց հիմա միացրեք, դուք էլ կնայեք: «Լիսան» շատ լավ ֆիլմա: Չգիտեմ՝ հիշում եք, թե չեք հիշում, ասուլիսներից մեկի ժամանակ ասել էի՝ էսօր տղայիս ծնունդնա, համ էլ: Իմ ընկերներով հավաքվել, նստել, նշում ենք»,- մեզ հետ զրույցում ասաց էպոսագետ թեկնածուն:

-Հավանաբար խորոված եք արել ու ինչպես քարոզարշավի մեկնարկը տվեցիք խորոված ուտելով, հիմա էլ ընտրությունների օրն եք նշո՞ւմ կամ ամփոփո՞ւմ:
-Չէ, ճիշտն ասած, որպեսզի սխալ ինֆորմացիա չլինի, ոչ թե խորոված, այլ քյուֆթա ենք ուտում: Քանի որ լյարդի հետա պրոբլեմ ունեմ, խմելը ոչինչ, բայց խորոված ուտելը բժիշկն արգելել է: Ասել են միայն տավարի միս կուտես, դրա համար էլ քյուֆթա ենք ուտում:

-Պարոն Սեդրակյան, ի՞նչ եք կարծում լուսաբացին կամ առավոտյան, կունենա՞նք առիթ Ձեզ շնորհավորելու՝ որպես ընտրված նախագահ:
-Դե…հիմա, եթե էս ամեն ինչը շատ սիրուն խաղարկվեց, ամսի 21-ին ես հայտարարություն կանեմ…Ձեզ մենակ մի բան կասեմ, որ նախագահական ընտրությունները նոր միայն սկսում են:

-Ինչո՞վ բացատրել կամ պայմանավորել Ձեր կատարյալ հանգստությունն ու անտարբերությունը ընտրական գործընթացների և այսօրվա ընտրությունների նկատմամբ: Ձեր մրցակիցները պայքարի մեջ են, մինչդեռ Դուք այս օրն էլ ապրում եք սովորականի պես: Սա ինքնավստահությո՞ւն է, խաբված լինելու ինքնազգացողությո՞ւն, թե՞ հիասթափություն:
-Դուք, որպես լրագրող և ընտրող մի եզրակացություն միայն կարող եք անել այս ամենից ելնելով. այն, ինչ կատարվում է հիմա դրսում, կարող եք անվանել՝ ինչ ուզում եք, բայց ոչ նախագահական ընտրություններ: Այսինքն՝ քարոզարշավի ժամանակ, երբ ես հիշատակում էի այն երանելի եռյակի մասին, որ մեկին փամփուշտներով են գուրգուրում, մեկին՝ և այլնով… մի քիչ կոկետություն կանեն, կշնորհավորեն իրենց ղեկավարին, ոչ թե առաջնորդին, և ամեն մեկը խելոք իրենց դերը կխաղան, իսկ ես կսկսեմ նոր ազգային ազատագրական պայքար: Սա թերահավատություն էլ չէ ընտրությունների հանդեպ, սա ուղղակի ծիծաղելի է:

-Ո՞ր պահից սկսած Ձեզ հայտնի դարձավ կամ սկսեցիք դատողություններ անել, որ սրամք նախագահական ընտրություններ չեն:
-Այն պահից սկսած, երբ ուղղորդված հրապարակումներ եղան իմ մասին: Ավելի հստակ, երբ ցույց տվեցին Հայրիկյանի գործով ձերբակալված երկու կասկածյալների լուսանկարները: Իհարկե, էլի կարող էին ձերբակալել նրանց, եթե Պարույր Հայրիկյանը շատ էր ցանկանում, իրեն կարող էին ցույց տալ մարդկանց, որոնք ընդամենը ձերբակալված են, և դեռ հարցաքննություն էլ չէր եղել: Սա կոնկրետ քայլ էր, և դրանից հետո պարզ դառավ, թե իշխանությունները ինչ են պատրաստվում անել:

-Այդ դեպքում, եթե Ձեզ համար պարզ դարձավ այն, ինչը Դուք կանխատեսել եք և վստահաբար հավատում եք, ուրեմն ինչո՞ւ ինքնաբացարկ չհայտնեցիք և դուրս չեկաք այդ, Ձեր գնահատմամբ, խաղից: Եթե Ձեզ համար ակնհայտ էր, որ սրանք ընտրություններ չեն, ուրեմն ինչո՞ւ մնալ ընտրապայքարում և խաբել կամ հիասթափեցնել այն ընտրազանգվածին, որոնց մոտ հավատ էիք հասունացրել:
-Դուք մոռանում եք, որ միայն ես չէ, որ այսօր տանն եմ նստած ու իմ նախընտրական շտաբն էլ, ընդհանրապես, այսօր չի հավաքվել, այսօր նրանք ազատ են: Իմ ընտրողները ինձնից հիասթափված չեն, իսկ ընտապայքարից իմ դուրս գալը ավելորդ խոսակցությունների տեղիք կտար, ու հենց դուք էլ կմտածեիք, որ եթե այս մարդը դուրս եկավ ընտրապայքարից, ուրեմն կապ ուներ միջադեպի հետ, իրա տեղը ցույց տվեցին, ասեցին՝ խելոք մնա:

-Քարոզարշավի մեկնարկից հետո առաջին 10-15 օրերին ինքնավստահ հայտարարում էիք, որ սոցհարցումներով Ձեր վարկանիշով առաջին տեղում եք և Ձեզ արդեն նախագահ էիք հռչակում, խոսում էիք կատարվող փոփոխությունների մասին: Շատ չանցած հուսալքված հայտարարություններ արեցիք ու այսօր էլ պնդում եք, որ սա միջոցառում է, ընտրություններ չեն, ու չեք հավատում, որ ձայներ կհավաքեք: Այդքան մեծ բա՞ն փոխվեց այս ընթացքում, և միայն մեկ-երկու հրապարակումներո՞վ:
-Ազգը հավատաց ոչ թե այդ հրապարակումներին, այլ դրանցից հետո հավատաց, որ բոլորովին այլ ընթացքով են գնում ընտրությունները: Մանավանդ չմոռանանք կա ինչ-որ լրատվամիջոց, որը լավ գիտենք՝ ում է պատկանում, և որ այնտեղ հենց այնպես ոչինչ չի գրվում: Ես դրանք հրապարակումներ չեմ համարում, ավելի շուտ մեսիջ եմ համարում: Մառանում եք, որ ես հենց սկզբից հայտարարել էի, որ իմ քարոզարշավը կանեմ միայն հեռուստատեսությամբ և լրատվական կայքերով: Ուստի մարդիկ ճիշտ հաշվարկել էին կայքերում տեղեկատվություն տարածելու մոտեցումը:

-Փաստորեն, համարո՞ւմ եք, որ Ձեր ընտրողները 100%-ով հետ են կանգանել Ձեզ ընտրելու տրամադրվածությունից:
-Իմ ընտրողները հետ չեն կանգնել, պարզապես գիտեմ, որ ինձ գրելու են 0.0-0.1%, իսկ էն թվերը, որ լինելու են մյուս թեկնածուների պարագայում, կյանքում չհավատաք, թե դրանք ընտրողների ձայներն են:

-Կնշանակի նույն գրողները չէին գրելու, երբ դեռ չկար միջադեպը, ու Դուք կասկածվող անձ չէիք, բայց հիմա նրանք գրելո՞ւ են այդ թվերը: Այսինքն՝ այն ժամանակ Դուք հավատում էիք ընտրությունների արդյունքներին, այսօր՝ ոչ՞:
-Այն ժամանակ կար լուրջ հակառակորդ, ում հետևից ազգը գնում էր, գրելը շատ դժվար կլիներ: Բայց հիմա մի քանի կեղծ ընդդիմադիրների ներկայության պարագայում էլ մեծ բան չի փոխվել: Մարդիկ ասել են՝ տեսնենք՝ ով կշնորհավորի, ով կընդունի խաղի կանոնները: Ժողովրդի համար էլ վերջում պարզ կդառնա՝ ով էր դրածոն և ով ժողովրդի թեկնածուն:

-Այսինք՝ Դուք չե՞ք պատրաստվում շնորհավորել ընտրված թեկնածուին:
-Ո՛չ, և էդ ամփոփիչ թերթիկը չեմ ստորագրելու:

-Այս ընթացքում եղե՞լ է դեպք, որ ինչ-որ պահի փոշմանել եք, որ առաջադրվել եք:
-Ո՛չ, ես 46 տարեկան եմ, իմ կյանքում չի եղել որևէ բան, որ ես փոշմանեմ:

-Իսկ վստա՞հ եք, որ վաղը-մյուս օրը չեք փոշմանի այսօրվա դրսևորած Ձեր անտարբերության ու չպայքարելու համար:
-Չէ, չէ, պայքարի շատ ձևեր կան: Ի վերջո անտարբերությունն էլ է պայքարի ձևերից մեկը: Իմ ընտրողները զանգում են ինձ, Ֆեյսբուքի էջին են գրում: Առաջարկում եմ հասարակ մարդկանց դուք հարց տաք, թե դուք հավատո՞ւմ եք, որ Վարդան Սեդրակյանը որևէ կապ ունի Հայրիկյանի մահափորձի հետ:

-Գուցե ինքներդ փորձեիք այդ սոցհարցումն անցկացնել՝ մանավանդ որ ֆինանսական խնդիր առանձնապես չունեիք:
-Ես արդարանալու խնդիր չունեմ: Մարդիկ մի վայրկյան անգամ չեն կասկածում, որ ես էլ իրենց ինչ-որ բան ցույց տամ կամ ապացուցեմ:

-Վաղը, երբ արդեն կունենանք նոր ընտրված նախագահ և Դուք չեք ունենա այլևս նախագահի թեկնածուի կարգավիճակը, ո՞րն է լինելու Ձեր հաջորդ քայլը:
-Մի անհանգստացեք: Վաղը երկրում իրավիճակ չի փոխվելու: Իսկ մինչև ամսի 21-ը ոչինչ չեմ ձեռնարկի: 21-ին ասուլիս կտամ, իսկ թե ինչ կանեմ հետո, դա արդեն ստրատեգիական հարց է, չեմ ուզում խոսել այդ մասին:

-Այսօր որպես ՀՀ քաղաքացի էլ չհետաքրքրվեցի՞ք և չհետևեցի՞ք ընտրական պրոցեսներին:
-Ճիշտն ասած, չէ: Բայց էդ կնիքի պահով, որ էդքան պնդում են՝ ճիշտ են ասում: Ես էլ բերեցի տուն, խոնավ անձեռոցիկով փորձեցի ու մաքրվեց: Կարող ես հանգիստ մատդ թրջել ու մաքրել այն: Դա արվում է նրանց համար, որ 100-200 հազար մարդ ունեն, պտտվում, իրենց գործն են անում:


Նյութը թողարկում ենք այն ժամանակ, երբ արդեն ոչ գովազդ, ոչ հակագովազդ չի կարող համարվել