Ձեր վստահելի աղբյուրը

«Ո՞ւր են նրանց 70-80 տոկոս ձայները, որ թեկնածուները ապացուցում էին, թե ունեն և մեղադրում սոցիոլոգներին կեղծ թվեր ներկայացնելու մեջ»,- գնահատելով անցած նախագահական ընտրությունները ասուլիսում հայտարարեց սոցիոլոգ Ահարոն Ադիբեկյանը` ընդգծելով, որ շատ լավ կլիներ, եթե ներկա լինեին նախագահի այդ թեկնածուները` Րաֆֆի Հովհաննիսյանը, Արամ Հարությունյանը, Պարույր Հայրիկյանը…

Նրա խոսքով, լավ կլիներ, որ ներկա լիներ հենց Րաֆֆի Հովհաննիսյանը, ով պնդում է, որ հենց իր ձայներն են գողացել, ոչ թե Հրանտ Բագրատյանի կամ Պարույր Հայրիկյանի:

Անդրադառնալով տարբեր սոցհարցումների արդյունքներին, Ա.Ադիբեկյանը նշեց, որ մեծ մասամբ դրանք ճիշտ կանխատեսումներ էին արել` առաջատար մատնանշելով ՀՀ նախագահ Սերժ Սարգսյանին և երկրորդ տեղը տալով Րաֆֆի Հովհաննիսյանին:

«Սոցիոմետրի»` ընտրություններից մի քանի օր առաջ արված վերջին հարցումներն էլ էին տվել այդ ցուցանիշը: Սակայն, ամենակարևորը այդ կանխատեսումներում այն էր, որ մատնանշվել էին նաև այն մարզերը, որտեղ Սերժ Սարգսյանը կստանար քիչ ձայներ:

«Մեզ թվում էր, որ Ր.Հովհաննիսյանին ավելի շատ ձայներ կտան կանայք, քան Սերժ Սարգսյանին, բայց սխալվեցինք` Ս.Սարգսյանի ընտրողների մեջ կանայք ավելի շատ են, քան Ր.Հովհաննիսյանի: Միայն մի կետով Ր.Հովհաննիսյանը առավելություն ուներ Սերժ Սարգսյանի նկատմամբ` նրան ընտրել են աղքատները…. երևի կարծելով, որ իրենց աղքատությունը կապված է նախագահի դեմքի հետ»,- ասաց բանախոսը:

Ա.Ադիբեկյանը նշեց, որ Ր.Հովհաննիսյանը գրեթե բոլոր շերտերից ձայն է տարել` 6 տոկոսը եղել են նախկինում ՀՀԿ-ին ընտրողները, 29.4 տոկոսը ՕԵԿ-ինն էր, իսկ նախկինում 23 տոկոս «Ժառանգություն» ընտրողները այս անգամ նրան չեն ընտրել:

«Սերժ Սարգսյանը հենվում է բոլոր քաղաքական ուժերին, բացի ծայրահեղական ՀԱԿ-ից. նրան ձայն տվողների 61 տոկոսը ՀՀԿ-ականներն են, 16 տոկոսը նախկինում ԲՀԿ ընտրածներն են, 1.7-ը ստացել է «Ժառանգությունից», 10 տոկոսը ՀՅԴ-ից, ՕԵԿ-ականների 25 տոկոսն է ընտրել»,- թվարկեց սոցիոլոգը: