Ձեր վստահելի աղբյուրը

«Երեկ տարածվել է ՀՀ նախագահի մամլո քարտուղարի հայտարարությունը` առ այն, որ Սերժ Սարգսյանը միշտ էլ պատրաստակամ է հանդիպելու բոլոր քաղաքական ուժերի առաջնորդների հետ, իսկ մնացյալ արձագանքները այդ հայտարարության, կարծում եմ, Նախագահի հետ հանդիպումից խուսափելու քաղաքականություն է»: Այս մասին այսօր ՀՀ կառավարությունում լրագրողների հետ ճեպազրույցում ասաց ՀՀ կրթության և գիտության նախարար Արմեն Աշոտյանը:

Հարցին` ինչպես է գնահատում ընդդիմության այն հայտարարությունները, թե ընտրությունները կեղծվել են, Ա.Աշոտյանը նշեց, որ 58 տոկոս ձայներ է ստացել Սերժ Սարգսյանը, և միջազգային բոլոր դիտորդական առաքելությունները պնդում են, որ այս ընտրությունները լավագույնն էին մեր նորագույն պատմության մեջ:

«Պետք է սովորել ընդունել սեփական պարտությունը: Ամբողջ նախընտրական քարոզարշավը մեր փաստացի թիվ մեկ ընդդիմադիր մրցակիցը վարեց շատ քաղաքակիրթ, արևմտյան տեխնոլոգիաների լայն կիրառմամբ: Սա ենթադրում է, որ հետընտրական գործելաոճը նույնպես պետք է լինի այն մշակույթի շրջակներում, որն այդ թեկնածուն փորձում է ներմուծել Հայաստան: Ցավալի է, երբ որ հետընտրական զարգացումների մշակույթը կարծես թե կրկնում է նախորդ բոլոր ընտրություններից հետո եղած մշակույթները: Դա այն դեպքում, երբ արևմտյան մշակույթը ենթադրում է, որ պարտված թեկնածուներն առաջինն են զանգահարում և շնորհավորում հաղթած նախագահին»,- ասաց Աշոտյանը:

Իրականում, ըստ նրա, իր խորը հիասթափությունն է արտահայտել, քանի որ կարծում էր` հետընտրական զարգացումները պետք է լինեին այն տրամաբանության մեջ, որ փորձում էր սերմանել Րաֆֆի Հովհաննիսյանը քարոզարշավի ընթացքում: «Չեմ ուզում ասել, որ նա խաբեց իր ընտրողին` «պուպուշ» արևմտյան տեխնոլոգիաներով, բայց համենայնդեպս կտրուկ և զգալի էր փոփոխությունը, «մոդեռն Րաֆֆիից դեպի վատ իմաստով ավանդական պարտված ընդդիմադիր թեկնածու»,-նշեց նա:

Ըստ Աշոտյանի, Րաֆֆի Հովհաննիսյանն անցկացրել է գեղեցիկ քարոզարշավ, ինչը հուսադրող էր, որ ընդդիմադիր դաշտում կստեղծվի նոր քաղաքական մշակույթ: «Հասկանում եմ, որ նա գուցե այլ հաշվարկներ ունի, կարող եմ մտածել, որ այս հանրահավաքները նպատակ ունի իր շուրջը սոսնձել բոլոր այն 37% ձայները, որ նա ստացել է, քանի որ իր տեխնոլոգները շատ լավ հասկանում են, որ դա ըմբոստ էլեկտորատն է, որ քվեարկել է ընդդեմ Սերժ Սարգսյանի: Դա Րաֆֆի Հովհաննիսյանի անձնական քաղաքական կապիտալը չէ, և հետընտրական զարգացումները նրան կարող են տանել այն ուղղությամբ, որ նա դառնա ոչ թե այդ պահին 37 տոկոս ձայն հավաքած ընդդիմադիր քաղաքական գործիչ, այլ քաղաքական գործիչ, որը տնօրինելու է այդ 37 տոկոս ձայները հետընտրական շրջանում: Իհարկե իր շահերն այստեղ բախվելու են ՀԱԿ-ի, ՀՅԴ-ի և մի շարք այլ քաղաքական ուժերի շահերի հետ, որոնք այս ընթացքում, չեմ կարծում, որ տան իրենց նախկին քաղաքական կապիտալը Րաֆֆի Հովհաննիսյանին»,- ասաց Ա.Աշոտյանը:

Նրա խոսքերով՝ դրանով է բացատրում նաև իրենց ակտիվ ներգրավումը երեկվա միտինգներին նպատակ հետապնդելով՝ թույլ չտալ, որպեսզի ընդդիմադիր գործչի թիվ մեկ սանդղակը հասնի միան Րաֆֆիին և փորձել շատ պատեհ պահի, շատ գեղեցիկ ձևով Րաֆֆի Հովհաննիսյանին հանել բեմահարթակից: «Ակնհայտ է նաև, որ Րաֆֆի Հովհաննիսյանի կերպարը արևմտամետ քաղաքական գործչի կերպար է, իսկ ընդդիմադիր ձայները տնօրինող ուժերը հիմնականում հյուսիսային, ռուսամետ քաղաքական գծի հետևորդներ են եղել: Խոսքը գնում է ԲՀԿ-ի, ՀԱԿ-ի և ՀՅԴ-ի մասին: Ակնհայտ է, որ Րաֆֆի Հովհաննիսյանի հետևում կանգնած ուժերը գուցե փորձեն Հայաստանում ընդդիմադիր էլեկտորատը դարձնել արևմտյան էլեկտորատ, սակայն այդ էլեկտորատի ձայների պառլամենտական տերերը դա թույլ չեն տա»,- նշեց նա: