Ձեր վստահելի աղբյուրը

Քիչ առաջ Ազատության հրապարակի հարթակում մի քանի երիտասարդ ակտիվիստներ պահանջեցին Արմեն Մարտիրոսյանից հրապարակավ բացատրել, թե ինչու Րաֆֆի Հովհաննիսյանը առանց ժողովրդի կարծիքը հաշվի առնելու գնաց ՀՀ նախագահի նստավայր` Սերժ Սարգսյանի հետ հանդիպմանը:

Դրան ի պատասխան «Ժառանգություն» կուսակցության փոխնախագահ Արմեն Մարտիրոսյանը բարձրախոսով հայտարարեց, որ փորձ է արվում սադրիչ գործողություններ իրականցնել: Հետևելով նրա հայտարարությանը` ոստիկանության աշխատակիցները բեմից դուրս հրավիրեցին ակտիվիստներին: Կուսակցության վարչության անդամ Ստյոպա Սաֆարյանից ակտիվիստներից Կարեն Հարությունյանը պահանջեց պարզաբանումներ տալ Մարտիրոսյանի հայտարարության վերաբերյալ: Սաֆարյանը նշեց, որ «Ժառանգությունը» բեմահարթակից հայտարարել է, թե Րաֆֆի Հովհաննիսյանի թիմից դուրս որևէ հայտարարություն կդիտարկվի սադրանք, և քաղաքացիական այս նախաձեռնությունը չի կիսում «Ժառանգության» տեսակետը:

Լրագրողներին Ս. Սաֆարյանը հայտնեց, որ մինչև նախագահական հասնելը, Րաֆֆի Հովհաննիսյանը խորհրդակցել է հանրահավաքի մասնակիցների հետ, և այդ որոշումը բխում էր հենց ժողովրդի շահերից: Հարցին, թե ինչու Հովհաննիսյանը գնաց բանակցելու, Սաֆարյանն ասաց. «Մեր երկիրն այժմ հայտնվել է փակուղու առջև, մենք փորձում ենք ելք գտնել այդ փակուղուց: Ինչպես քարոզարշավի ժամանակ ասել է Հովհաննիսյանը, այս ընտրությունները պետք է տարբերվեն նախորդներից: Մենք չպետք է կրկնենք նախորդ սխալները, պետք է ելքեր գտնենք ցանկացած փակուղային վիճակներում»: