Ձեր վստահելի աղբյուրը

«Շատ դրական երևույթ կլինի ոչ միայն այն, որ իրապես պարտված թեկնածուն շնորհավորի ընտրված նախագահին, այլ ավելի գեղեցիկ ու ճիշտ քաղաքական գործընթաց կլինի, եթե իշխանությունն ընդունի իր պարտությունը: Ցավոք սրտի 1991թ-ից Հայաստանում որևէ իշխանություն այդ ուժն իր մեջ չունեցավ պարտությունն ընդունելու, իսկ այդ պարտությունները միշտ են եղել»,- լրագրողների հետ հանդիպմանն այսօր հայտարարեց «Ժառանգություն» կուսակցության փոխնախագահ Արմեն Մարտիրոսյանը` հավելելով, որ հույս ունի, թե այս անգամ մենք դրա ականատեսը կլինենք:

Ա.Մարտիրոսյանը վստահություն հայտնեց, որ Րաֆֆի Հովհաննիսյանը հաղթական ավարտի կհասցնի պայքարը. «Ես ոչ թե հավատում եմ, որ կլինի իշխանափոխություն, այլ այդ իշխանափոխությունն արդեն եղել է փետրվարի 18-ին»,- ընդգծեց նա:

Արմեն Մարտիրոսյանի ներկայացրած սցենարը, որը նա հավանական է համարում, հետևյալն է. գործող նախագահը պետք է հանձնի իշխանությունը, խորհրդարանական նոր ընտրություններ նշանակվեն:

Սակայն, ըստ  «Ժառանգություն» խմբակցության նախկին պատգամավորի. «Շատ լավ գիտենք, որ իրավական մեխանիզմներ դրա համար չկան և այս պարագայում կարևոր է ոչ այդքան այդ մեխանիզմների բացակայությունը, որքան ընդհանուր մթնոլորտը: Ես 100 տոկոս համոզված եմ, որ նախագահի փոփոխության արդյունքում և քաղաքական նոր իրավիճակի ձևավորման ժամանակ խորհրդարանն ինքը կլուծարվի, որովհետև բոլորովին այլ իրողություններ են լինելու: Ես որևէ խնդիր դրանում չեմ տեսնում, քանի որ իրավականը միշտ գալիս է լրացնելու քաղաքականի հիմնավորվածությունը» ,-նշեց նա:

Ա. Մարտիրոսյանը շարունակեց` խորհրդարանական նոր այդ ընտրություններից հետո կձևավորվի բոլորովին նոր կոալիցիա, արդեն ժողովրդի կողմից իրապես վստահություն ստացած քաղաքական ուժերով, որը և կձևավորի Հայաստանի նոր կառավարությունը: Իսկ այդ կառավարությունը «բնականաբար կգլխավորի նախագահ Րաֆֆի Հովհաննիսյանը»:

Բանախոսը տեղեկացրեց նաև, որ նախօրեին Րաֆֆի Հովհաննիսյանը բավականին երկար զրույց է ունեցել Դաշնակցության ներկայացուցիչների հետ, իսկ թե ինչի մասին են խոսել նրանք` Ա.Մարտիրոսյանը հորդորեց սպասել մինչև երեկո և հանրահավաքում անձամբ Ր.Հովհաննիսյանից այդ մասին տեղեկանալ: