Ձեր վստահելի աղբյուրը

Թուրքական անգլիալեզու «Հուրիեթ Դեյլի Նյուզ» պարբերականը, հղում անելով դիվանագիտական անանուն աղբյուրներին, գրում է, թե Թուրքիան առաջարկել է ներգրավել Հայաստանին Եվրոպան Ասիային կապող իր խոշոր տրանսպորտային նախագծերում, այն դեպքում, եթե քաղաքական կամք ցուցաբերվի և հստակ առաջընթաց արձանագրվի Լեռնային Ղարաբաղի հակամարտության հարցում: Նշվում է, թե ծրագրի իրականացման արդյունքում տարածաշրջանի բոլոր երկրները հաղթողի կարգավիճակում կհայտնվեն:

«Մենք փորձում ենք ակտիվացնել Լեռնային Ղարաբաղի հակամարտության կարգավորմանը միտված ԵԱՀԿ Մինսկի խմբի գործունեությունը: 2012 թ-ի նոյեմբերին Մինսկի խմբին ենք ներկայացրել «Ինտեգրման տրանսպորտային միջանցքներ նախագիծը», որը կարող է իրականացվել բացառապես խաղաղ պայմաններում, երբ, հայկական զինուժը լքի, մասնավորապես, Լեռնային Ղարաբաղին հարակից շրջանները», - պարբերականի հետ զրույցում հայտնել են թուրքական դիվանագիտական աղբյուրները:

Նշվում է, թե առաջարկը ենթադրում է հարաբերությունների լիակատար կարգավորում ինչպես Թուրքիայի և Հայաստանի, այնպես էլ Հայաստանի և Ադրբեջանի միջև:

Դիվանագիտական աղբյուրների փոխանցմամբ, նոր նախաձեռնության արդիականության համար հիմք են հանդիսացել ինչպես հայ-թուրքական արձանագրությունների սառեցված վիճակը, այնպես էլ Լեռնային Ղարաբաղի հակամարտությունում հաստատված փակուղին, որը, թուրքական կողմի դիտարկմամբ, հանդիսանում է Հարավային Կովկասում կայունության հաստատման և բարգավաճման հիմնական խոչընդոտը:

«Նախագիծը դրական արձագանք է ստացել ԵԱՀԿ Մինսկի խմբի բոլոր երկրների կողմից: Մենք հստակեցրել ենք, որ ծրագիրը նպատակ ունի խաղաղության հեռանկարներ ստեղծել` ի շահ ներգրավված բոլոր կողմերի”, - նշել են աղբյուրները:

Պարբերականի հաղորդմամբ, առաջարկված տրանսպորտային նախագիծն իրականացվելու է երկու փուլուվ: Առաջինը ենթադրում է Թուրքիան, Հայաստանը, Ադրբեջանը և Ռուսաստանի Դաշնությունը իրար կապող երկաթուղային գծերի վերանորոգման և նորերի կառուցման աշխատանքներ: Մինչ տարվա վերջ ավարտին հասցվող Կարս-Թբիլիսի-Բաքու երկաթուղու շահագործման հետ մեկտեղ հնարավոր է թեթև վերանորոգումից հետո գործարկել նաև հայ-թուրքական երկաթուղին: Դրան զուգահեռ դիտարկվում է նոր ժամանակակից երկաթուղու կառուցումը երկու երկների միջև, որը կարող է թափ հաղորդել առևտրաշրջանառությանն ու մարդկանց հոսքը:

«Ակնհայտ է, որ ծրագրում ենք կառուցել նաև նոր լոգիստիկ կենտրոններ, երկաթուղային ուղիների երկայնքով նոր բնակավայրեր, որոնք կարող են դառնալ տարածաշրջանային նոր հանգույց: Ծրագրի միակ նպատակն այս տարածաշրջանում տնտեսական վերելք ապահովելն է` ի շահ բոլոր երկրների ու նրանց ժողովուրդների բարգավաճման», - գրում է թերթը, վկայակոչելով աղբյուրները:

Դիվանագիտական աղբյուրները հայտնում են, թե հաշվի առնելով Կովկասից դուրս գտնվող տարածաշրջանների աճող տնտեսական հեռանկարներն ու դրանց ռազմավարական կարևորությունը, թուրքական տրանսպորտային նախագիծը նպատակ է հետապնդում ներգրավել Հարավային Կովկասի երկրներին Եվրոպան Ասիային կապող ծրագրերում: Լոնդոնի և Պեկինի միջև տրանսպորտային ուղին հնարավոր կդառնա Մարմարայի նախագծի և Բաքու-Թբիլիսի-Կարս երկաթուղու ավարտից հետո, մինչդեռ տարածաշրջանում քաղաքական իրավիճակը կարգավորելու դեպքում հնարավորություն կընձեռվի Հայաստանին ևս միանալ աճող ռազմավարական նշանակություն ունեցող նշյալ նախագծերին:

Պարբերականի հաղորդմամբ, Ադրբեջանը ևս տեղեկացված է թուրքական նախաձեռնության մասին: Ադրբեջանական դիվանագիտական աղբյուրը թուրքական թերթին, մասնավորապես, հայտնել է. «Նրանք գիտեն, մենք ինչ ենք ակնկալում: Մենք հստակ ասել ենք, որ այս նախագիծը հնարավոր կլինի իրագործել միայն, եթե Հայաստանը խաղաղության հաստատմանն ուղղված քայլ ձեռնակի»:

Նշվում նաև, թե հայկական կողմը մինչ օրս անտարբերություն է ցուցաբերել նախաձեռնության նկատմամբ, և Մինսկի խմբի միջոցով որևէ պաշտոնական արձագանք չի ներկայացրել:

Հոդվածի վերջում նշվում է, թե Սերժ Սարգսյանի վերընտրվելուց հետո Թուրքիան, այնուհանդերձ, չի ակնկալում Լեռնային Ղարաբաղի հարցում հայկական մոտեցման կտրուկ փոփոխություն: «Մինչ 2015 թ-ը հայկական վարած քաղաքականության մեջ էական փոփոխություններ չենք ակնկալում», - հայտնել են դիվանագիտական աղբյուրները: