Ձեր վստահելի աղբյուրը

Թուրքիայում մի խումբ անձիք հարձակվել են 1992 թ.-ի Աղդամի իրադարձությունների ադրբեջանական տարբերակը ներկայացնող տաղավարի վրա: Ինչպես հայտնում է «Haber7.com»-ը, միջադեպի հետևանքով 7 մարդ ծեծի է ենթարկվել:

Ըստ աղբյուրի, «Գյոքբյուրոյի թուրքականության միության» կողմից կազմակերպված ադրբեջանամետ ստորագրահավաքի ընթացքում ընդդիմադիրների մի խումբ հարձակում է գործել, կոտրել են տաղավարը և քարերով, մահակներով ու շշերով ծեծի ենթարկել տաղավարի մոտ կանգնած պատասխանատուներին:

Հիշեցնենք, որ 1992 թ.-ի փետրվարի 26-ին, Ղարաբաղյան պատերազմի ընթացքում Աղդամ քաղաքի մերձակայքում չպարզված հանգամանքներում զոհվել են 200-ից 300 մարդ (համաձայն միջազգային Human Right Watch իրավապաշտպան կազմակերպության տվյալների, իսկ Ադրբեջանի կողմից քարոզվող տարբերակով, զոհվել է ավելի քան 600 մարդ), ովքեր Ադրբեջանի իշխանության կողմից միտումնավոր կերպով պահվել են ռազմական գործողությունների կիզակետում: Խոջալուի բնակչությունը մի քանի ամիսների ընթացքում ստիպողաբար մնացել է բնակավայրում և Ադրբեջանի իշխանությունների կողմից միտումնավոր կերպով չի տարհանվել՝ հետագայում նրանց որպես կենդանի վահան օգտագործելու նպատակով:

Խոջալուի բնակչությունը ԼՂՀ ինքնապաշտպանության ուժերի կողմից առանձնացված հումանիտար միջանցքով դուրս է եկել բնակավայրից, առանց որևէ խոչընդոտների անցել է ավելի քան 10 կմ և հասել է մինչև ադրբեջանցիների կողմից վերահսկվող Աղդամ քաղաքը: Ավելի ուշ ադրբեջանական զինված ուժերին բավական մոտ գտնվող հատվածում հայտնաբերվել են զոհվածների մարմինները: Զոհվածների իրական քանակը հայտնի չէ, քանզի պաշտոնական Բաքուն հրապարակում է միմյանց հակասող թվեր: Խաղաղ բնակիչների այս ողբերգական զոհերի հետաքննության համար ստեղծված Ադրբեջանի խորհրդարանի հանձնաժողովը Հեյդար Ալիևի հրամանով լուծարվել է, իսկ հետաքննությանը վերաբերվող նյութերը սկսել են գաղտնի պահվել:

Ֆիլմ` «Սովի և կրակի միջև. իշխանություն` կյանքերի գնով»