Վալերի Բուայե. «Երբեք այլևս Թուրքիա չեմ գնա»

Հասարակություն 14:53 26/02/2013

Ֆրանսիայի ԱԺ պատգամավոր Վալերի Բուայեն, ով Հայոց ցեղասպանության հերքումը քրեականացնող օրինագծի հեղինակն է, թուրքական «Ջիհան»(CHA) լրատվական կայքին տված հարցազրույցում նշել է, որ Ֆրանսիայի սահմանադրական խորհրդին ցեղասպանության ժխտումը քրեականացնող 2 նոր օրինագիծ է ներկայացրել և առաջարկել է այս խորհրդի աշխատանքները ուսումնասիրող մի հանձնաժողով ստեղծել :

Բուայեն, նշելով թե YouTube-ում իրեն ուղղված հայհոյանքներ պարունակող հարյուրավոր տեսանյութեր կան, ասել է. «Լավ է, որ թուրքերեն չեմ հասկանում, սակայն ֆրանսերեն սպառնալիքներ էլ եմ ստանում: Մի որոշ ժամանակ ստիպված եմ ապրել ոստիկանության հսկողության տակ: Նախկինում գնացել եմ Թուրքիա, սակայն այլևս չեմ գնա, եթե նույնիսկ կառավարությունը անվտանգության երաշխիքներ տա: Գիտակցում եմ, որ Թուրքիայում կյանքիս անվտանգությունը ապահովված չի լինի: Ինձ և ընտանիքիս վտանգի տակ չեմ դնի»:

Ֆրանսիացի պատգամավորը հայտնել է, որ այդ սպառնալիքները իրեն չեն ստիպի հետքայլ անել և հույս ունի, որ Ֆրանսիայի ներկայիս նախագահը, ով այս հարցում Սարկոզիի հետ համակարծիք է, կկատարի Հայոց ցեղասպանության ժխտումը քրեականացնող նախագծի վերաբերյալ նախընտրական շրջանում տված խոստումները:

Բուայեն, պատասխանելով «Ջիհանի» այն հարցին, թե Խոջալուի դեպքերի վերաբերյալ ինչ դիրքորոշում ունի ասել է. «Ադրբեջանը նավթի և փողի ուժով միջազգային հանրությանը սխալ տեղեկություններ է հրամցնում: Մարդասպանին հերոսացնող պետության խոսքերին ինչպե՞ս կարող եք հավատալ»:

Բուայեն նշել է, որ Ղարաբաղ այցելելու համար իրեն «պերսոնա նոն գրատա» են հայտարարել:

Հայտնելով, որ ինքը կտրականապես դեմ է Թուրիքայի` ԵՄ անդամակցությանը, Բուայեն ասել է, թե Թուրքիան ոչ աշխարհագրական ոչ էլ մշակութային տեսակետից ԵՄ մասը կազմել չի կարող:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: