Գևորգ Դանիելյանը խորհուրդ է տալիս զգույշ լինել ու խնդրում ուշադիր կարդալ Աքրամ Այլիսլիի «Քարե երազներ» վեպը

Հասարակություն 13:26 27/02/2013

«Ինձ թվում է, որ շատերս ադրբեջանցի գրող Աքրամ Այլիսլիի «Քարե երազներ» վեպի առնչությամբ հիացական գնահատականներ ենք տալիս ուշադիր չկարդալով այդ աշխատանքը և համարժեք չպատկերացնելով, թե ինչ միտումներ է հետապնդում այդ վեպը: Նկատենք, որ նույն սցենարն է, ինչ այսօրվա ադրբեջականան գաղափարախոսությունը»,- ասուլիսում նման տեսակետ հայտնեց ՍԴ խորհրդական, Սահմանադրական իրավունքի կենտրոնի խորհրդի նախագահ, իրավ. դոկտ., պրոֆ. Գևորգ Դանիելյանը:

Վեպում ներկայացված են 1919 թ-ին Նախիջևանի Ագուլիս բնակավայրում հայերի նկատմամբ ադրբեջանցիների իրականացրած վայրագությունները և զուգահեռներ են անցկացված 1988-1990 թվականներին Սումգայիթում և Բաքվում տեղի ունեցած հայերի կազմակերպված ջարդերի հետ:

Գ. Դանիելյանը նշեց, որ, ըստ վեպի, Բաքվի ջարդերը կազմակեպել են այն մարդիկ, որոնք այդտեղ բռնությունների են ենթարկվել, չեն կարողացել վրեժխնդիր լինել, փորձել են վրեժխնդիր լինել հայազգի բնակչության նկատմամբ: «Սա ակնհայտ սուտ է: Վեպի հիմնական սյուժեն հենց դրան է վերաբերում»,- նշեց նա:

Միաժամանակ Գ. Դանիելյանը նշեց, որ իրեն հավատ չի ներշնչում, որ գրողի նկատմամբ հետապնդումներ են սկսվել. 72-ամյա կնոջը ազատում են գրադարանավարուհու աշխատանքից, իրեն զրկում են մի քանի պարգևներից, դժգոհություններ են հայտնում նրա նկատմամբ: «Գիտենք, որ եթե ադրբեջանցին իր երկրում որևէ մեկին ընկալում է որպես դավաճան, ձեռքն է վերցնում կացինը, չի բավարարվում միայն քննադատություններով: Պետք է մի փոքր զգույշ լինել»,- ասաց նա:

Գ. Դանիելյանը կարծում է, որ այս ամենը արվել է նրա համար, որ հայերը պատրանքի մեջ ընկեն, թե Ադրբեջանում կան մարդիկ, որոնք կարողանում են ազատ խոսել ու վայրագ ձևով հետապնդումների չենթարկվել: Նա խնդրեց աշխատությունը ևս մեկ անգամ ուշադիր կարդալ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: