Ձեր վստահելի աղբյուրը

Հայ գիրքը նախորդ տարվա ընթացքում ներկայացվել է գրքի միջազգային 14 տոնավաճառների՝ Ժնևի, Բուենոս-Այրեսի, Լոս- Անջելեսի, Մինսկի, Փարիզի, Բոլոնիայի, Սալոնիկի, Սանկտ–Պետերբուրգի, Վարշավայի, Թեհրանի, Աշխաբադի, Մոսկվայի, Ֆրանկֆուրտի, որոնցից չորսին՝ հատուկ կարգավիճակով։ Ցուցահանդեսներից բացի Հայաստանը մասնակցել է գրական փառատոների՝ Ջենովայում, Բեռլինում, Փարիզում, մեծ ու փոքր ցուցադրությունների, գիտաժողովների, գրական հանդիպում–երեկոների, գրքի շնորհանդեսների և այլն։

Այս ամենը տեղի է ունեցել Հայ գրատպության 500-ամյակի շրջանակներում: Նշենք, որ Հայ գրատպության 500-ամյակին նվիրված միջոցառումները ամփոփ ներկայացրել էր մշակույթի նախարար Հասմիկ Պողոսյանը Հայ գրատպության 500-ամյակի միջոցառումները նախապատրաստող պետական հանձնաժողովի նիստում:
Այս մասին տեղեկանում ենք մշակույթի նախարարության պաշտոնական կայքից:

Հոբելյանական տարվա ընթացքում հայկական ձեռագիր, հնատիպ, տպագիր գրքի ցուցահանդեսներ բացվել են աշխարհի հայատառ գրատպության կենտրոններում՝ Վենետիկում, Ամստերդամում,Վիեննայում, Փարիզում, Բուխարեստում, Լոնդոնում, Սանկտ Պետերբուրգում, Սոֆիայում, Թբիլիսիում, Մայնցում, Երևանում, Շուշիում և այլն։ Հայ գիրքը ցուցադրվել է աշխարհահռչակ ու հեղինակավոր այնպիսի հաստատություններում, ինչպիսին են անտիկ աշխարհի ամենամեծ՝ Ալեքսանդրիայի գրադարանը, Բրիտանական թանգարանի գրադարանը, Սանկտ-Պետերբուրգի Ռուսաստանի ազգային գրադարանը, ԱՄՆ Կոնգրեսի գրադարանը Վաշինգտոնում և վերջապես, Մայնցի գրատպության թանգարանը: Բացառիկ էր Վենետիկի Կոռեռ և Հնագիտության թանգարաններում ու Մարչանա ազգային գրադարանում բացված ցուցահանդեսը, որտեղ ներկայացված 200 ցուցանմուշները բերված էին Հայաստանից, Ֆրանսիայից և Իտալիայի ամբողջ տարածքից:

2012 թվականը շատ արդյունավետ էր նաև միջազգային համագործակցության տեսանկյունից: Հայաստանյան կառույցներն անդամակցեցին այնպիսի հեղինակավոր կազմակերպությունների, ինչպիսիք են Հրատարակիչների միջազգային ասոցիացիան, Մանկապատանեկան գրքի միջազգային կոմիտեն, Երաժշտական գրադարանների միջազգային ասոցիացիան:
Ընդհանուր առմամբ՝ 170 տարաբնույթ միջոցառումներ են իրականացվել մեկ տարվա ընթացքում։

Գրական այս տարում տպագրվել են մեծ թվով արժեքավոր գրքեր, ուշադրություն դարձվել թարգմանական գրականությանը: Ընդհանուր առմամբ, Հայաստանում 2012 թ. տպագրվել է 1922 գիրք՝ 2011-ի 1851-ի համեմատությամբ: Միայն պետպատվերով հրատարակվել է 172 գիրք՝ 216 մլն. գումարով՝ նախորդ տարվա 177 մլն դրամով տպագրված 138 գրքի փոխարեն:

Գրքին նվիրված միջոցառումների շրջանակում 2012 թ. բացվել է Մատենադարանի նոր մասնաշենքը, վերանորոգվել հին մասնաշենքը, Ազգային գրադարան ի թամանյանական մասնաշենքը, պետական և մասնավոր ֆինանսավորմամբ բարեկարգվել են ոլորտի ենթակառուցվածքները. վերանորոգվել է 7 և վերազինվել ու արդիականացվեցին 13 գրադարաններ, Գյումրիի մարզային գրադարանը տեղափոխվել է նոր շենք՝ վերաբացվել են համայնքային 4 գրադարաններ: Տարվա ընթացքում վերանորոգվել են Ա. Բակունցի տուն-թանգարանը, Ե. Չարենցի անվան գրականության և արվեստի թանգարանը։ ՀՀ նախագահի հատուկ հանձնարարությամբ մեկնարկել են Հ. Սահյանի տուն-թանգարանի վերակառուցումը, Պ. Սևակի տուն–թանգարանի նոր մասնաշենքի կառուցումը և Ս. Խանզադյանի տուն-թանգարանի վերանորոգումը:

Գրքին նվիրված ծրագրերը դեռ շարունակվում են: Արդեն այս տարվա ընթսացքում Ավստրիայի Գրաց քաղաքում կայացել է «Հայաստանի պատկերը Գրացի համալսարանի գրադարանի հավաքածուներում պահվող ձեռագիր և տպագիր գրքերում. հայկական տպագրության 500 ամյակը» գրքի շնորհանդեսը, Պրահայում հայ-չեխական գրական կապերին նվիրված միջոցառումը, Մինսկի գրքի ցուցահանդեսը: Առաջիկայում սպասվում են գրքի ցուցահանդեսներ Բուդապեշտի ազգային գրադարանում և Լեհաստանում, գրքի միջազգային տոնավաճառներ՝ Լոնդոնում, Բանգկոկում, Բոլոնիայում և այլն: