Ձեր վստահելի աղբյուրը

ԵԱՀԿ/ ԺՀՄԻԳ դիտորդներին զարմացրել է որոշ տեղամասերում անվավեր քվեաթերթիկների բարձր տեսակարած կշիռը, որը սակայն, նրանց կարծիքով, կարող էր կապված լինել Հայ ազգային կոնգրեսի ազդեցության հետ: Այս մասին նշված է դիտորդական առաքելության այսօր հրապարակված միջանկյալ զեկույցում:

Զեկույցի «ամփոփիչ արդյունքների հրապարակում» բաժնում դիտորդները նշել են. «Փետրվարի 25-ին ԿԸՀ-ն հրապարակեց ընտրությունների վերջնական արդյունքները, ըստ որի պարոն Սարգսյանն ընտրվեց նախագահ: Ամփոփիչ արձանագրությունը ստորագրվեց ԿԸՀ բոլոր յոթ անդամների կողմից»:

Վերջիններս իրենց դիտարկումներն են արել ԿԸՀ հրապարակած արդյունքների վերաբերյալ. «ԵԱՀԿ ԺՀՄԻԳ ԸԴԱ կողմից ԿԸՀ հրապարակած վերջնական արդյունքների վերլուծությունը վկայում է սերտ փոխկապակցվածություն ընտրողների մասնակցության ու գործող նախագահին տրված ձայների միջև` միջինից բարձր մասնակցության ցուցանիշով տեղամասերում պարոն Սարգսյանին տրված ձայները մեծ մասնաբաժին ունեն: 1988 ընտրատեղամասերից 1746-ն ունեն 300 կամ ավելի գրանցված ընտրողներ:

Դրանցից 144-ում ընտրողների մասնակցությունը գերազանցել է 80 տոկոսը, ինչն անհավանականորեն բարձր է, դրանցից 115-ում գործող նախագահը ստացել է ձայների 80 տոկոսից ավելին:70-ից 80 տոկոս մասնակցություն ունեցած 303 տեղամասերից 198-ում գործող նախագահը ստացել է ձայների 70 տոկոսը: 249 տեղամասերում, որտեղ մասնակցությունը եղել է 50 տոկոսից ցածր, պարոն Սարգսյանը 50 տոկոսից ավել ձայներ ստացել է 55-ում, իսկ պարոն Հովհաննիսյանը 50 տոկոսից բարձր ստացել է 155-ում: Բարձր մասնակցությամբ տեղամասերում գործող նախագահի ստացած բարձր ցուցանիշների դիտարկված միտումը ընտրական գործընթացի ամբողջականության նկատմամբ վստահության մտահոգություն է առաջացնում»:

Անվավեր քվեաթերթիկների վերաբերյալ զեկույցում նշված է. «ԿԸՀ հրապարակած վերջնական արդյունքների համաձայն` անվավեր են ճանաչվել 50976 քվեաթերթիկներ (բոլոր ձայների 3.4 տոկոսը), ինչը փոփոխվում է լայն միջակայքով` 8-8d ընտրատարածքում 7.9 տոկոսից և 7-րդ ընտրատարածքում 7.3 տոկոսից մինչև 1.5 տոկոս 18-րդ, 20-րդ և 24-րդ ընտրատարածքներում»: Զեկույցի հեղինակները չեն բացառել, որ այս բարձր ցուցանիշը հնարավոր է «իր համախոհներին քվեաթերթիկներն անվավեր դարձնելու կոչ արած ՀԱԿ պոտենցիալ ազդեցության հետևանք լինի»: Սրանով հանդերձ դիտորդները նկատել են, որ «որոշ տեղամասերում անվավեր ճանաչված քվեաթերթիկների քանակը մտահոգություն է առաջ բերում, օրինակ 7/9, 8/8, 12/22, 19/1, 19/5, 19/21, 28/26 և 34/29 տեղամասերում անվավեր քվեաթերթիկների քանակը գերազանցում է բոլոր ձայների 20 տոկոսը»:

Ամփոփելով զեկույցի այս հատվածը` զեկույցի հեղինակները նշել են. «ԵԱՀԿ ԺՀՄԻԳ ԸԴԱ-ն հնարավորություն ունեցավ համեմատել ՏԸՀ-ներից ստացված 55 արձանագրությունների տվյալները ԿԸՀ կայքում հրապարակված պաշտոնական արդյունքների հետ: Որևէ էական հակասություն չգտնվեց, չնայած 12 դեպքում առկա էր աննշան տեխնիկական սխալ` կապված տեղամասերում գրանցված ընտրողների քանակի հետ»:

Նախորդող հրապարակում`
ԵԱՀԿ ԺՀՄԻԳը նոր զեկույց է ներկայացրել