Ձեր վստահելի աղբյուրը

Քիչ առաջ «Ժառանգություն» կուսակցության խոսնակ Հովսեփ Խուրշուդյանն ու համանուն խմբակցության քարտուղար Զարուհի Փոստանջյանը, ինչպես նաև Րաֆֆի Հովհաննիսյանի նախընտրական շտաբի իրավական խորհրդատու Կարեն Մեջլումյանը հանձնեցին Հովհաննիսյանի դիմումը ՍԴ:

Դատարանից դուրս գալուց հետո լրագրողների հետ ճեպազրույցում Հ. Խուրշուդյանը նշեց, որ ՍԴ դիմում ներկայցնելն ընդամենը պայքարի իրավական կողմն է, որը որևէ կերպ չի կանգնեցնում կամ բացառում պայքարի քաղաքական մեթոդները:
Խուրշուդյանը նշեց, որ ակցիաները և հանրահավաքները չեն դադարելու, իսկ ՍԴ դիմելը ընդամենը օրենքի ընձեռած հնարավորություններից լիակատար օգտվելու միջոց է:

«Սա ընդամենը հնարավորություն է ՍԴ անդամներին իրենց վրայից մաքրել նախորդ որոշումների արդյունքները»,-ասաց Խուրշուդյանը` պատասխանելով լրագրողների հարցին, թե ինչ ակնկալիքներ ունեն Րաֆֆի Հովհաննիսյանի ներկայացուցիչները ՍԴ-ից` հաշվի առնելով հանգամանքը, որ նախորդ ընտրությունների ժամանակ ևս թեկնածուները ևս նմանատիպ հայցով դիմել են ՍԴ և բոլոր հայցերը չեն բավարարվել:

Խուրշուդյանը նշեց, որ ՍԴ դիմելու համար առկա են բոլոր իրավական հիմքերն ու պացույցները: Հովհաննիսյանի ներկայացուցիչը մասնավորապես նշեց, որ 120 տեղամասերում, որտեղ ընտրողների մոտ 40 տոկոսը բացակայում է հանրապետությունից, գրանցվել է ընտրությունների մասնակցության 80-90 տոկոս ցուցանիշ, և հենց այդ տեղամասերի շնորհիվ է, որ Սերժ Սարգսյանը ստացել է պաշտոնապես ներկայցվող արդյունքը:

Կուսակցության խոսնակը նշեց, որ ընտրությունների կեղծման մասին են վկայում նաև միջազգային դիտորդական առաքելությունների` մասնավորապես ԵԱՀԿ/ԺՀՄԻԳ դիտորդների միջանկյալ զեկույցը:

Պատասխանելով Panorama.am-ի այն հարցին, թե արդյոք կիսում է նա իր գործընկեր Ս. Սաֆարյանի կարծիքը, թե դիմում են ՍԴ այն պատճառով, «որ հետո չասեն` ինչու չդիմեցիք և որ ՍԴ-ն Րաֆֆի Հովհաննիսյանի ներկայացուցիչներին վստահություն չի ներշնչում», Խուրշուդյանը նշեց, որ Սաֆարյանը պարզ լեզվով ներկայացրել է իրենց բոլորի համընդհանուր կարծիքը: Միևնույն ժամանակ նա ձեռնպահ մնաց ՍԴ-ի կայացնելիք որոշման մասին կանխատեսումներ անել:

Սահմանդրական դատարանն տասն օրվա ընթացքում կքննարկի դիմումը:

ԿԸՀ հրապարակած տվյալներով` փետրվարի 18-ին կայացած ՀՀ նախագահի ընտրություններում Սերժ Սարգսյանը հավաքել է ձայների 58.64 տոկոսը, Րաֆֆի Հովհաննիսյանը` 36.75 տոկոսը, Հրանտ Բագրատյանը` 2.15 տոկոսը, Պարույր Հայրիկյանը` 1.23 տոկոսը, Անդրիաս Ղուկասյանը` 0.57 տոկոսը, Վարդան Սեդրակյանը` 0.42 տոկոսը, Արման Մելիքյանը` 0.24 տոկոսը:
Րաֆֆի Հովհաննիսյանը չի ընդունում ընտրությունների արդյունքները, դրանք համարում է կեղծված և որոշել է դիմել Սահմանադրական դատարան, որով «պահանջվում է վավերացնել և ամրագրել ս.թ. փետրվարի 18-ին տեղի ունեցած նախագահական ընտրությունների ընթացքում հայ ժողովրդի կատարած ընտրության իրական արդյունքները և չեղյալ ճանաչել ԿԸՀ-ի կողմից փետրվարի 25-ին հրապարակած կեղծ թվերը»:
Սերժ Սարգսյանին պաշտոնում վերընտրվելու կապակցությամբ շնորհավորական ուղերձներ են հղել են ԱՄՆ-ի, Ռուսաստանի, Ֆրանսիայի, Թուրքիայի, Իրանի, Իսրայելի, Չինաստանի, Հնդկաստանի և այլ երկրների ղեկավարները, ինչպես նաև Եվրոպական հանձնաժողովի ներկայացուցիչներ: