«Կին առաջնորդ» ֆորում. Պահանջում ենք չեղյալ հայտարարել ԱԳՆ շենքի աճուրդի ամոթաբեր գործարքը

Հասարակություն 15:40 04/03/2013

«Կին առաջնորդ» ֆորումի համակարգող խորհուրդը բողոքի հայտարարություն է տարածել ՀՀ Արտաքին գործերի նախարարության շենքի աճուրդի կապակցությամբ: Հիշեցնենք, որ շենքի աճուրդը նախատեսված է անցկացնել վաղը:

«Հայտնում ենք մեր վրդովմունքը և մտահոգությունը ՀՀ կառավարության կողմից Արտաքին գործերի նախարարության շենքի աճուրդի հայտարարման վերաբերյալ: Ցավով ստիպված ենք եզրակացնել, որ անկախացումից քսաներկու տարի անց Հայաստանի իշխանությունները դեռևս չեն գիտակցում անկախ պետության առաքելությունը և առաջնորդվում են սխալ և խեղված արժեքային համակարգով, որտեղ գերակա արժեք է համարվում ոչ թե ժողովուրդը, հոգևորը և պետականությունը, այլ` փողը:

Ուզում ենք հիշեցնել կառավարության ներկայացուցիչներին, ովքեր ձեռնարկել և իրականացնում են այդ գործարքը, որ աճուրդի կարող են հանել իրենց անձնական ունեցվածքը միայն և ոչ թե պետականության խորհրդանիշ հանդիսացող շինությունները, որոնք հայ հասարակության սեփականությունն են:

Ուզում ենք հիշեցնել, որ «Հանրապետության հրապարակը» այդպես է կոչվում այնտեղ գտնվող պետական հաստատությունների և ոչ թե տուրիստական կենտրոնների նպատակով:

Ստիպված ենք նշել, որ պետական գործիչներից պահանջվում է պետական մտածողություն, ազգային արժանապատվություն և ոչ թե առևտրականի հմտություններ: Պետականաշինությունը բիզնես ծրագիր չէ և վաճառականի հոգեբանությամբ մարդիկ այնտեղ անելիք չունեն:

Մենք ահազանգում ենք և պահանջում ենք չեղյալ հայտարարել Արտաքին գործերի նախարարության շենքի աճուրդի ամոթաբեր գործարքը, որը դժվար է այլ կերպ որակել, քան ազգային և պետական շահերի դավաճանություն»,-ասված է հայտարարության մեջ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: