Է. Անտինյան. «Հանգամանքները դասավորվել են այնպես, որ Րաֆֆի Հովհաննիսյանը հաղթելու շանս չունի»
«Նախորդ տարիների նախագահական ընտրություններից առաջ լիդերը պարզ էր, որին աջակցող ուժեր կային, իսկ ընտրություններից հետո վիճարկում էին արդյունքները և հավաքվում այդ լիդերի շուրջ: Այս ընտրություններում Րաֆֆի Հովհաննիսյանի ոչ միայն չեն ճանաչել որպես լիդեր, այլև ընտրությունն ավարտվելուց հետո վիճարկվում է նրա լիդերության հարցը: Բացի այդ ընտրությունները որակապես տարբերվում են նաև նրանով, որ թշնամանք չկա, երկրում ատելության մթնոլորտ ստեղծված չէ, որը ձեռքբերում է»,- այսօր լրագրողների հետ հանդիպմանն անդրադառնալով հետընտրական զարգացումներին, նշեց քաղաքագետ Էդուարդ Անտինյանը:
Նրա խոսքով, Րաֆֆի Հովհաննիսյանը իր գործողություններում որևէ սխալ թույլ չի տվել, քարոզարշավը իրականացրել է փայլուն, սակայն «հանգամանքները իր համար դասավորվել են այնպես, որ ինքը հաղթելու շանս չունի»:
Ըստ քաղաքագետի, դա պայմանավորված է երեք հիմնական գործոններով: Առաջին գործոնը նա պայմանավորեց միջազգային ուժային կենտրոնների ազդեցությամբ, երբ մասնավորապես, Ռուսաստանն ու ԱՄՆ-ն Հայաստանում փոփոխություններ իրականացնելու որևէ մտադրություն չեն ունեցել:
«Ռուսաստանը մտադրություն չուներ Հայաստանում փոփոխություն անելու, եթե ունենար, ապա ունեինք թեկնածու՝ Գագիկ Ծառուկյանը, ով Ռուսաստանի համար կարող էր ավելի ընդունելի լինել: ԱՄՆ-ի պարագայում վերջինս Հայաստանի հետ կապված երկու խնդիր ունի՝ հայ-թուրքական հարաբերություններն ու Ղարաբաղի հարցի կարգավորումը: Երկու դեպքում էլ ԱՄՆ-ն համոզվել է, որ Սերժ Սարգսյանի հետ կարելի է բանակցել, թեպետ Սերժ Սարգսյանը ոչինչ չի զիջել, բայց պատրաստ է գնալ բանակցությունների»,- նշեց քաղաքագետը:
Որպես երկրորդ գործոն քաղաքագետն առանձնացրեց «իշխանական բուրգի ճաքերը, երբ մարդիկ անցնեն Րաֆֆի Հովհաննիսյանի կողմը», ապա նշեց, որ դա ևս չի կարող տեղի ունենալ. «Րաֆֆի Հովհաննիսյանն ու իր թիմակիցները կառավարման համակարգում չեն եղել: Նրան, որպես գործընկեր, վարչական մեքենան չի ընկալում»,- համոզմունք հայտնեց Է. Անտինյանը:
Ինչ վերաբերում է երրորդ գործոնին, ապա քաղաքագետը նշեց, որ եթե ընտրություններին չեն մասնակցել Լևոն Տեր-Պետրոսյանը, Ռոբերտ Քոչարյանն ու Գագիկ Ծառուկյանը, դա չի նշանակում, որ նրանք դերակատարություն չունեն:
«Կաջակցե՞ն նրանք արդյոք Րաֆֆի Հովհաննիսյանին: Ո՛չ: Որովհետև եթե նրանք ցանկանային կանգնել Րաֆֆի Հովհաննիսյանի կողքը, ապա պետք է ցանկանային, որ հարթակի «հսկիչ փաթեթը» լիներ իրենց ձեռքում: Որևէ դեպքում իրենք խաղադրույք չէին կատարի Րաֆֆի Հովհաննիսյանի խաղի վրա: Դա բացառվում է: Րաֆֆի Հովհաննիսյանը մեկ ասում է, որ ինքը նախագահ է, մեկ ասում, որ մինչև ապրիլի 9-ը պետք է իշխանությունը ամեն գնով վերցնել, մեկ էլ խոսվում է մայիսի 5-ի ավագանու ընտրությունների մասին , մեկ էլ, որ այս պայքարը կարող է մի քանի տարի շարունակվել: Ո՛չ Լևոն Տեր-Պետրոսյանը, ո՛չ Գագիկ Ծառուկյանը, ո՛չ էլ Ռոբերտ Քոչարյանը սրբազան պատերազմ չեն հայտարարելու Սերժ Սարգսյանին, այն պարզ պատճառով, որ սա իրենց «ջիհադը» չի»,- ընդգծեց քաղաքագետը և հավելեց. «Եթե մինչև ավագանու ընտրությունները Րաֆֆի Հովհաննիսյանը հստակ քայլ չանի, հաջողություն չի ունենա»:
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
